మాస్ కా దాస్.. ఇంత ధైర్యం ఏంటి సామి! దండం పెట్టాల్సిందే

సినిమా రంగంలో బాక్సాఫీస్ లెక్కలు ఎప్పుడూ ఒకేలా ఉండవు. చిన్న, పెద్ద హీరోలనే తేడా లేకుండా సరైన విడుదల తేదీ దొరకడం అనేది అదృష్టంతో పాటు ఒక పెద్ద వ్యూహం. ఈ కోవలోనే ఇప్పుడు టాలీవుడ్‌లో ఒక ఆసక్తికరమైన చర్చ నడుస్తోంది. మాస్ కా దాస్ విశ్వక్ సేన్ (Viswaksen) నటిస్తున్న తాజా పొలిటికల్ యాక్షన్ డ్రామా ‘లెగసీ’ (Legacy)విడుదల తేదీ గురించిన వార్త సినీ వర్గాలను విపరీతంగా ఆకర్షిస్తోంది. లెగసీ సినిమాను డిసెంబరు 4న థియేటర్లలోకి తీసుకురానున్నట్లు మేకర్స్ ప్రకటించారు. సాధారణంగా ఈ నిర్ణయం చూసేవారికి ఎవరికైనా పెద్ద సాహసం లాగే అనిపిస్తుంది.

లెగసీ సినిమాకు ఒక్క రోజు ముందే ప్రభాస్ (Prabhas), హను రాఘవపూడి (Hanu Raghavapudi) కాంబినేషన్‌లో తెరకెక్కుతున్న భారీ పీరియాడిక్‌ డ్రామా ఫౌజీ (Fauzi) సినిమా రిలీజ్‌ కాబోతుంది. ప్రభాస్ రేంజ్, ఆయన సినిమాల మార్కెట్ స్థాయి గురించి ప్రత్యేకంగా చెప్పనవసరం లేదు. బాక్సాఫీస్ వద్ద ఆయన సినిమా ఉంటే, ఇతర చిత్రాల నిర్మాతలు కనీసం రెండు వారాల పాటు ఆ దారికి వెళ్లేందుకే భయపడతారు. అలాంటిది విశ్వక్ సేన్ టీమ్ కేవలం ఒక్క రోజు గ్యాప్‌తో బరిలోకి దిగడం ట్రేడ్ వర్గాలను విస్మయానికి గురిచేసింది.

ఈ సాహసోపేత నిర్ణయం వెనుక మేకర్స్ ప్లానింగ్ గట్టిగానే ఉందనే ప్రచారాలు వినిపిస్తున్నాయి. పాన్-ఇండియా ప్రాజెక్ట్‌లు భారీ బడ్జెట్‌తో తెరకెక్కుతుండటం వలన షూటింగ్ లేదా పోస్ట్ ప్రొడక్షన్ పనుల వల్ల విడుదల తేదీలు మారడం ఈ మధ్యకాలంలో సాధారణమైపోయింది. ఒకవేళ చివరి నిమిషంలో ‘ఫౌజీ’ అనుకున్న తేదీకి రాకపోతే, డిసెంబరు 4న సోలో రిలీజ్ అడ్వాంటేజ్ పూర్తిగా ‘లెగసీ’కి దక్కుతుంది. ఒకేసారి ప్రత్యామ్నాయ తేదీల కోసం వెతుక్కోకుండా ముందుగానే ఆ డేట్‌పై కర్చీఫ్ వేసి ఉంచాలనేది ఈ వ్యూహంలోని అసలు రహస్యం అని ఇండస్ట్రీలో చర్చ జరుగుతోంది.

ఒకవేళ ప్రభాస్ సినిమా ఎలాంటి వాయిదాలు లేకుండా ఖచ్చితంగా డిసెంబరు 3నే ప్రేక్షకుల ముందుకు వస్తే పరిస్థితి ఎలా ఉంటుంది. ఈ ప్రశ్నకు సమాధానంగా రెండు భిన్నమైన వాదనలు వినిపిస్తున్నాయి. ప్రభాస్ సునామీ ముందు చిన్న, మీడియం రేంజ్ సినిమాలు నిలబడటం కష్టమనేది ఒక వాదన అయితే, కంటెంట్ బలంగా ఉంటే మాస్ చిత్రాలకు తిరుగుండదనేది మరో వాదన. విశ్వక్ సేన్ తనదైన మాస్ అప్పీల్‌తో డిఫరెంట్ జానర్ సినిమాలను ఎంచుకుంటూ దూసుకుపోతున్నారు.

‘లెగసీ’ పొలిటికల్ యాక్షన్ డ్రామా కావడంతో యూత్ అండ్ మాస్ ఆడియన్స్‌ను థియేటర్లకు రప్పించే సత్తా ఈ చిత్రానికి ఉందని అభిమానులు నమ్ముతున్నారు. ప్రభాస్‌ను బాక్సాఫీస్ వద్ద ఢీకొట్టాలని విశ్వక్ సేన్ వేసిన ఈ ప్లాన్ నిజంగానే వర్కవుట్ అవుతుందా, లేక చివరి నిమిషంలో ‘లెగసీ’ రిలీజ్ డేట్ మారుతుందా అనేది కాలమే నిర్ణయించాలి. ఏది ఏమైనప్పటికీ, ఈ పోరుకు సంబంధించిన వార్తలు సోషల్ మీడియాలో ట్రెండ్ అవుతూ సినిమాపై అంచనాలను విపరీతంగా పెంచేస్తున్నాయి.