SS Rajamouli: మహేష్ బాబును.. వణికించిన రాజమౌళి
ABN , Publish Date - Feb 05 , 2026 | 09:42 AM
సూపర్ స్టార్ మహేష్ బాబు, దర్శకుడు రాజమౌళి వీరిద్దరి కలయిక అంటే అంచనాలు ఆకాశాన్ని తాకడం సహజం.
తెలుగు సినిమా ఖ్యాతిని ప్రపంచ స్థాయికి తీసుకెళ్లిన దర్శకుడు రాజమౌళి (SS Rajamouli). అదే విధంగా కోట్ల మంది అభిమానాన్ని సొంతం చేసుకున్న సూపర్ స్టార్ మహేష్ బాబు (Mahesh Babu). వీరిద్దరి కలయిక అంటే అంచనాలు ఆకాశాన్ని తాకడం సహజం. గత 15 ఏళ్లుగా ఊరిస్తున్న ఈ కాంబినేషన్, ఇప్పుడు వారణాసి (Varanasi) అనే భారీ గ్లోబ్ ట్రాటర్ అడ్వెంచర్తో మన ముందుకు వస్తోంది. అయితే, ఈ సినిమా వెనుక ఉన్న కష్టం, రాజమౌళి వేసిన ప్లాన్ చూసి స్వయంగా మహేష్ బాబే భయపడ్డారంటే నమ్ముతారా..? అసలు మహేష్ను రాజమౌళి అంతలా భయపెట్టిన సందర్భం ఏంటి..?
రాజమౌళి పనితీరు ఎలా ఉంటుందో మనందరికీ తెలిసిందే. పర్ఫెక్షన్ కోసం ఆయన ఎంత దూరమైనా వెళ్తారు. ఈ క్రమంలోనే వారణాసి సినిమాలో ఒక కీలకమైన యాక్షన్ సీక్వెన్స్ కోసం మహేష్ బాబు ఏకంగా ఏడాది కాలం పాటు కష్టపడాల్సి వచ్చింది. వినడానికి ఆశ్చర్యంగా ఉన్నా ఇది నిజం. రామాయణ బ్యాక్డ్రాప్లో సాగే ఒక అద్భుతమైన యాక్షన్ సీన్ కోసం మహేష్ తన బాడీ లాంగ్వేజ్ను పూర్తిగా మార్చుకున్నారు. ఇప్పటి వరకు మనం చూసిన మహేష్ బాబు వేరు, ఈ సినిమాలో కనిపించబోయే రాముడి ఛాయలున్న మహేష్ వేరు. ఆ ఒక్క షాట్ కోసమే నెలల తరబడి ప్రాక్టీస్ చేశారంటే ఈ సినిమా స్కేల్ ఏ స్థాయిలో ఉందో అర్థం చేసుకోవచ్చు.
సాధారణంగా మహేష్ బాబు చాలా కాన్ఫిడెంట్గా ఉంటారు. కానీ రాజమౌళి ఈ కథను చెప్పినప్పుడు ఆయన కాస్త ఆందోళన చెందారట. దానికి కారణం సినిమా నిడివి లేదంటే యాక్షన్ సీన్లు కాదు.. ఆ కథలో ఉన్న గాఢత. గ్లోబల్ మార్కెట్ను దృష్టిలో పెట్టుకుని రాజమౌళి రాసుకున్న ఈ స్టోరీ, మహేష్పై పెట్టిన బాధ్యత చాలా పెద్దది. ఇప్పటి వరకు కేవలం తెలుగు ప్రేక్షకులను అలరించిన సూపర్ స్టార్, ఇప్పుడు ప్రపంచ సినిమా వేదికపై తన సత్తా చాటాల్సి ఉంది. అందుకే ఈ ఛాలెంజ్ను చూసి మొదట్లో భయపడినా, ఆ తర్వాత రాజమౌళి విజన్పై ఉన్న నమ్మకంతో మహేష్ సర్వస్వం ధారపోస్తున్నారు.
ఈ సినిమా గురించి మరో ఇంట్రెస్టింగ్ అప్డేట్ ఏంటంటే.. ఇప్పటికే దాదాపు 50 శాతం షూటింగ్ పూర్తయినట్లు సమాచారం. అంతేకాదు, గత కొన్ని రోజులుగా ఈ చిత్రం రెండు భాగాలుగా వస్తుందని ప్రచారం జరిగింది. కానీ, జక్కన్న మరోసారి అందరికీ షాక్ ఇచ్చారు. వారణాసి కేవలం ఒకే పార్ట్గా రాబోతోంది. సుమారు మూడు గంటల పైగా నిడివి ఉండే ఈ చిత్రం, ప్రేక్షకులకు ఒక అద్భుతమైన అనుభూతిని ఇస్తుందని చిత్ర యూనిట్ ధీమాగా ఉంది.
రీజనల్ నుంచి గ్లోబల్ స్టార్గా.. వారణాసి సినిమాతో మహేష్ బాబు మార్కెట్ పూర్తిగా మారిపోనుంది. హాలీవుడ్ ప్రమాణాలతో తెరకెక్కుతున్న ఈ చిత్రం రిలీజ్ అయ్యాక, పాన్ ఇండియా రికార్డులు తిరగరాయబడటం ఖాయం. సినిమా కోసం పడ్డ శ్రమ అంతా, వెండితెరపై ఆ మ్యాజిక్ చూశాక మర్చిపోతామని టీమ్ గర్వంగా చెబుతోంది. ఒక పక్క యాక్షన్ అడ్వెంచర్, మరోపక్క టైమ్ ట్రావెల్ నేపథ్యం.. ఈ రెండింటి కలయికతో రాజమౌళి సృష్టించబోయే అద్భుతం కోసం యావత్ ప్రపంచం ఎదురుచూస్తోంది.