RB Choudhary: డైరెక్ట‌ర్ల‌కు.. గాడ్‌ఫాద‌ర్‌! ఆర్‌బీ చౌద‌రి ప‌రిచ‌యం చేసిన డైరెక్ట‌ర్లు వీరే.. ఇప్పుడు టాప్‌లో

ప్రముఖ నిర్మాత, ఆర్ బి చౌదరి ( RB Choudhary) మృతి నేప‌థ్యంలో సౌత్ సినీ ఇండస్ట్రీ షాక్‌లోకి వెళ్లిపోయింది. రెండున్న‌ర ద‌శాబ్దాల క్రితం సినిమాల నిర్మాణ చేప‌ట్టి కుటుంబ సంబంధాలు, మంచి సంగీతం ఉన్న చిత్రాల‌ను మాత్ర‌మే నిర్మిస్తూ త‌న‌కు, త‌న సంస్థ‌కు సూప‌ర్ గుడ్ ఫిలింస్‌కంటూ మంచి పేరు అన‌తి కాలంలోనే సాధించుకున్నారు. అంతేకాదు ఇప్ప‌టివ‌ర‌కు త‌మిళ‌, తెలుగు, మ‌ల‌యాళ‌, హిందీ భాష‌ల‌లో క‌లిపి 100 సినిమాలు నిర్మించ‌గా అందులో దాదాపు 90 శాతం విజ‌య‌వంత‌మైన చిత్రాలే ఉండ‌డం గ‌మ‌నార్హం. వాటిలో తెలుగులో సంక్రాంతి, ప్రియ‌మైన నీకు, సుస్వాగ‌తం, శివ‌రామ‌రాజు, సింహ‌రాశి, నువ్వు వ‌స్తావ‌ని, నిన్నే ప్రిమిస్తా, సూర్య‌వంశం, రాజా వంటి క‌ల్ట్ క్లాసిక్స్ ఉన్నాయి.

అయితే.. అప్‌క‌మింగ్ డైరెక్ట‌ర్లు ఎంతో మందికి అవ‌కాశాలు ఇచ్చి వారికి గాడ్‌ఫాద‌ర్‌గా నిలిచారు అర్‌బీ చౌద‌రి. ఆయ‌న తెలుగులో నిర్మించిన సుస్వాగ‌తంతో భీమినేని శ్రీనివాస రావు (Bhimaneni Srinivasa Rao) , సింహా రాశితో స‌ముద్ర (Samudra ), నువ్వు వ‌స్తావ‌ని చిత్రంతో ప్ర‌తాప్ (V. R. Prathap,), నిన్నే ప్రేమిస్తాతో షిండే ( R. Shinde.), అదృష్టంతో శేఖ‌ర్ సూరి (Sekhar Suri), భీమిలీ క‌బ‌డ్డీ జ‌ట్టుతో తాతినేని స‌త్య (Tatineni Satya) వంటి ద‌ర్శ‌కుల‌ను తెలుగు తెర‌కు ప‌రిచ‌యం చేశారు. అంతేగాక తెలుగులో ఎక్కువ‌గా వెంక‌టేశ్‌, రాజశేఖ‌ర్‌ల‌తో సినిమాలు చేసిన అర్‌బీ చౌద‌రి త‌మిళంలో మాత్రం శ‌ర‌త్ కుమార్‌, ప్ర‌స్తుత త‌మిళ‌నాడు సీఎం విజ‌య్‌తోనే అత్య‌ధిక సినిమాలు నిర్మించారు.

ఇక‌ త‌మిళంలో విక్ర‌మ‌న్ (Vikraman), కెఎస్ ర‌వికుమార్ ( K. S. Ravikumar), లింగుసామి (N. Lingusamy), శ‌శి (Sasi), ఎజిల్ వంటి దిగ్గ‌జ డైరెక్ట‌ర్ల‌ను త‌మ సంస్థ ద్వారానే ఇండ‌స్ట్రీకి ప‌రిచ‌యం చేశారు. వీరిలో చాలామంది ఆత ర్వాత పెద్ద పెద్ద స్టార్ల‌తో సినిమాలు చేసి టాప్ డైరెక్ట‌ర్ల జాబితాలో చేర‌డం విశేషం. చివ‌ర‌గా చౌద‌రి తెలుగులో చిరంజీవి గాడ్‌ఫాద‌ర్ చిత్రానికి స‌హా నిర్మాత‌గా వ్య‌హ‌హ‌రించారు. అంతేగాక గ‌త సంవ‌త్స‌రం విశాల్‌తో 99 వ చిత్రం, కొడుకు జీవాతో 100 వ చిత్రాలు మొద‌లు పెట్ట‌గా అవి షూటింగ్ చివ‌రి ద‌శ‌లో ఉన్నాయి.