Varanasi: మహేష్-రాజమౌళి మూవీకి భారీ షాక్.. వైరల్ అయిన కాశీ సెట్ వీడియోలు!

సూపర్ స్టార్ మహేష్ బాబు (Mahesh Babu), దర్శకధీరుడు రాజమౌళి (SS Rajamouli) కాంబినేషన్ అనగానే ఇండియన్ సినిమా హిస్టరీలోనే సరికొత్త రికార్డులు సృష్టించే ప్రాజెక్ట్ వార‌ణాసి (Varanasi) అని వేరే చెప్పక్కర్లేదు. అంతర్జాతీయ స్థాయిలో శ్రీదుర్గా ఆర్ట్స్, షోయింగ్ బిజినెస్ బ్యానర్లపై ఎంతో ప్రతిష్టాత్మకంగా తెరకెక్కుతున్న ఈ మూవీ పై అంచనాలు ఆకాశాన్ని తాకుతున్నాయి. ప్రియాంక చోప్రా, పృథ్వీరాజ్ సుకుమారన్ వంటి అంతర్జాతీయ నటులు కీలక పాత్రల్లో కనిపిస్తుండటంతో ప్రతీ చిన్న అప్‌డేట్ కూడా సోషల్ మీడియాలో విపరీతంగా ట్రెండ్ అవుతోంది. అయితే, ప్రస్తుతం ఈ భారీ ప్రాజెక్ట్‌ను ఒక తీవ్రమైన సమస్య బాగా వేధిస్తోంది. అదే.. వరుసగా ఎదురవుతున్న లీకుల బెడద!

సినిమా షూటింగ్ మొదలైన కొన్ని రోజుల నుంచే లీకేజీల భయం మూవీ టీమ్‌ను వెంటాడుతోంది. గతంలో ఒడిశాలో కీలకమైన షెడ్యూల్ జరుగుతున్న సమయంలో, మహేష్ బాబు అలానే పృథ్వీరాజ్ సుకుమారన్‌లకు సంబంధించిన కొన్ని కీలక సన్నివేశాల విజువల్స్ ఇంటర్నెట్‌లో ప్రత్యక్షమయ్యాయి. ఆ తర్వాత కెన్యాలో జరిగిన యాక్షన్ షెడ్యూల్ సమయానికి వచ్చేసరికి కూడా అదే పరిస్థితి పునరావృతమైంది. రాజమౌళి ఎంతో రహస్యంగా ప్లాన్ చేసిన కొన్ని సీన్స్ సోషల్ మీడియాలో లీక్ కావడంతో చిత్ర యూనిట్ తీవ్ర విస్మయానికి గురైంది. ఈ వరుస ఘటనలతో అప్రమత్తమైన జక్కన్న, సెట్స్‌పై కఠినమైన రూల్స్ అమలులోకి తీసుకొచ్చారు.

సెట్‌లోకి ఎవరూ మొబైల్ ఫోన్లు తేవడానికి వీల్లేదని రూల్స్‌ పెట్టారు. చిత్ర యూనిట్ సభ్యులకు సెక్యూరిటీ చెకింగ్స్ పెంచడమే కాకుండా, సెక్యూర్డ్ ఎన్విరాన్మెంట్‌లో షూటింగ్ నిర్వహించారు. ప్రస్తుతం ఈ ప్రాజెక్ట్ కి సంబంధించి దాదాపు 80 శాతం షూటింగ్ పూర్తయింది. మిగిలిన కనెక్టింగ్ సీన్స్, కొన్ని హై-వోల్టేజ్ యాక్షన్ సన్నివేశాలను ప్రస్తుతం చిత్రీకరిస్తున్నారు. దీనికోసం హైదరాబాద్‌లోని రామోజీ ఫిల్మ్ సిటీలో భారీ వ్యయంతో ప్రత్యేకమైన కాశీ సెట్ వేశారు. రోజువారీ షూటింగ్ ఎంతో వేగంగా జరుగుతుండగా, మళ్ళీ అదే లీకుల వైరల్ వార్త మేకర్స్‌కి పెద్ద షాక్ ఇచ్చింది.

ఈ కాశీ సెట్ నుండి కొన్ని కీలకమైన యాక్షన్ సన్నివేశాలు సోషల్ మీడియాలో లీక్ అయినట్లు వార్తలు ఊపందుకున్నాయి. ఈ విషయం తెలిసిన వెంటనే రాజమౌళి యాక్షన్ మోడ్‌లోకి దిగి, ఏ ఏ సోషల్ మీడియా అకౌంట్స్ ద్వారా ఈ వీడియోలు వ్యాపించాయో గుర్తించి, కాపీరైట్ స్ట్రైక్స్ ద్వారా ఆ క్లిప్పింగ్స్‌ను తక్షణమే డిలీట్ చేయించారు. ఎన్ని జాగ్రత్తలు తీసుకున్నా, ఎంతటి సెక్యూరిటీ ఉన్నా కూడా ఇలా కీలక సీన్స్ బయటకు రావడం రాజమౌళి టీమ్‌కి పెద్ద తలనొప్పిగా మారింది. మరొకవైపు, ఆగస్టు 9న మహేష్ బాబు పుట్టినరోజు సందర్భంగా ఏదో ఒక సర్ ప్రైజ్ వస్తుందని ఫ్యాన్స్ ఎంతో ఆశగా ఎదురుచూస్తున్నారు. అయితే, మేకర్స్ ఈసారి కేవలం ఒక స్పెషల్ లుక్ లేదా పోస్టర్‌ను మాత్రమే రిలీజ్ చేయడానికి ప్లాన్ చేస్తున్నట్లు సమాచారం.

ఫస్ట్ గ్లింప్స్ లేదా టీజర్ కోసం ఆశగా ఎదురుచూస్తున్న అభిమానులకు ఇది కొంచెం నిరాశ పరిచే విషయమే అయినప్పటికీ.. సినిమా క్వాలిటీ విషయంలో రాజమౌళి తీసుకునే జాగ్రత్తల దృష్ట్యా మేకర్స్ ఈ నిర్ణయం తీసుకున్నట్లు తెలుస్తోంది. ఏది ఏమైనా, ప్రపంచస్థాయి లొకేషన్లలో, వేల కోట్ల బడ్జెట్‌తో రూపుదిద్దుకుంటున్న ఈ భారీ అడ్వెంచరస్ థ్రిల్లర్‌కు లీకుల గండం నుండి ఉపశమనం లభించాలంటే.. జక్కన్న సెక్యూరిటీని మరింత కట్టుదిట్టం చేయక తప్పదు. మరి రానున్న రోజుల్లో రాజమౌళి ఎలాంటి కఠిన చర్యలు తీసుకోబోతున్నారో చూడాలి.