Varanasi: 'వారణాసి'.. స‌రికొత్త చ‌రిత్ర! ఆ థియేటర్‌లో.. టీజర్ స్క్రీనింగ్

దర్శకధీరుడు ఎస్.ఎస్ రాజమౌళి (S.S. Rajamouli), సూపర్ స్టార్ మహేష్ బాబు కాంబోలో వస్తున్న పాన్ వరల్డ్ చిత్రం వారణాసి (Varanasi). ఇప్పటికే ఈ సినిమా భారతదేశ సరిహద్దులు దాటి అంతర్జాతీయ స్థాయిలో చర్చరకు దారి తీస్తోంది. గ్లోబల్ బ్యూటీ ప్రియాంక చోప్రా కథానాయికగా నటిస్తున్న ఈ సినిమా టైటిల్ అనౌన్స్ మెంట్ టీజర్ వీడియోతోనే ప్రేక్షకుల ఊహలకు రెక్కలు తొడిగింది. ఇందులో మహేష్ బాబు 'రుద్ర' అనే అత్యంత శక్తివంతమైన పాత్రలో కనిపించనున్నారు. ఆయన లుక్, యాటిట్యూడ్ ఈ సినిమాలో ఊహించని విధంగా ఉండబోతున్నాయి. ఈ పాత్ర కోసం ఆయన భారతీయ ప్రాచీన యుద్ధ కళ అయిన కలరిపయట్టు సైతం ప్రత్యేకంగా నేర్చుకున్నారు.

తాజాగా ఈ సినిమాకు సంబంధించిన ఓ అప్ డేట్ సోషల్ మీడియాలో తెగ వైరల్ అవుతోంది. ‘వారణాసి’ టీజర్‌ను పారిస్ (Paris) లోని ప్రఖ్యాత లే గ్రాండ్ లెక్స్ (Grand Rex Paris) థియేటర్‌లో ప్రత్యేకంగా ప్రదర్శించనున్నారు. జనవరి 5న రాత్రి 9 గంటలకు ఈ స్పెషల్ స్క్రీనింగ్ జరగనుండగా, దీనిని ఇండియన్ మూవీస్‌ను యూరప్‌లో రిలీజ్ చేసే సంస్థ ఆన్నా ఫిలింస్ కన్ఫర్మ్ చేసింది. దీంతో లే గ్రాండ్ లెక్స్‌లో ప్రదర్శితమయ్యే తొలి భారతీయ సినిమా టీజర్‌గా ‘వారణాసి’ కొత్త రికార్డు సృష్టించబోతోంది. ఈ టీజర్ స్క్రీనింగ్ కోసం చిత్ర యూనిట్ దాదాపు 22 నుంచి 45 లక్షల రూపాయలు ఖర్చు చేస్తున్నట్లు తెలుస్తోంది. అక్కడి అత్యాధునిక సౌండ్, ప్రొజెక్షన్ సిస్టమ్‌లో ఈ టీజర్ ప్రేక్షకులకు సరికొత్త అనుభూతిని అందించనుంది. ఆర్ఆర్ఆర్ సినిమాను ప్రపంచ సినీ దిగ్గజాల దృష్టికి తీసుకెళ్లి, ఆస్కార్ వేదిక వరకు చేర్చిన రాజమౌళి, అదే తరహా వ్యూహాన్ని వారణాసి విషయంలోనూ అమలు చేస్తున్నారని సమాచారం. ఈ నేప‌థ్యంలో ఇప్పుడు ఫారిస్‌లోని థియేట‌ర్‌కు సంబంధించిన ఫొటోలు, దాని చ‌రిత్ర‌ న్యూస్ సోష‌ల్ మీడియాలో తెగ వైర‌ల్ అవుతుంది.

ఇక దాదాపు రూ.1,300 కోట్ల భారీ వ్యయంతో రూపొందుతున్న ఈ చిత్రం భారతీయ చిత్ర పరిశ్రమలోనే అత్యంత ఖరీదైన సినిమాగా నిలవనుంది. ఈ సినిమాలో మలయాళ స్టార్ హీరో పృథ్వీరాజ్ సుకుమారన్ విలన్ పాత్రలో కనిపించబోతున్నారు. అంతర్జాతీయ ప్రమాణాలకు ఏమాత్రం తగ్గకుండా రాజమౌళి ప్రతి విషయంలోనూ ఎంతో శ్రద్ధ తీసుకుంటున్నారు. ప్రస్తుతం శరవేగంగా జరుగుతున్న ఈ సినిమా చిత్రీకరణ మరో ఎనిమిది నెలల పాటు కొనసాగనుందని తెలుస్తోంది. ఈ విజువల్ వండర్‌ను మార్చి 2027లో ప్రపంచవ్యాప్తంగా విడుదల చేయడానికి నిర్మాతలు సన్నాహాలు చేస్తున్నారు.

అయితే.. ఈ చిత్రం టైటిల్ ఎనౌన్స్మెంట్ స‌మ‌యంలో విడుద‌ల చేసిన టీజ‌ర్ చాలామందికి అర్థ‌మ‌వ‌లేదు. అన్నీ సినిమాల లానే ఇది ఒక టీజ‌ర్ వీడియో అని అనుకున్నారు ఇప్ప‌టికీ అనుకుంటున్నారు. కానీ మ‌ల్టీఫ్లెక్స్‌ల‌లో ముఖ్యంగా ప్ర‌సాద్స్ పీసీఎక్స్, ఐమాక్స్ వంటి స్క్రీన్ల‌లో ఈ టీజ‌ర్ చూసిన వారికి రాజ‌మౌళి ఎలాంటి స‌బ్జెక్ట్ ట‌చ్ చేశాడు, దాని లెవ‌ల్ ఏ రేంజ్‌లో ఉన్న‌ది అర్థ‌మ‌వుతుంది. ఆ టీజ‌ర్ చూసే స‌మ‌యంలో మ‌న‌కు తెలియ‌కుంగానే గూస్ బంప్స్ రావ‌డం, ఆ విజువల్స్‌, వాటి వెన‌కాల దాగి ఉన్న అనేక‌ స్టోరీ లేయ‌ర్లు క‌న‌బ‌డి వావ్ అనిపించ‌క మాన‌దు. అవ‌తార్‌ను మించి స‌రికొత్త ప్ర‌పంచాన్ని చూడ‌బోతున్నామా అనే ఫీల్ త‌ప్ప‌క క‌లుగుతుంది. అలాంటి ఈ వార‌ణాసి టీజ‌ర్ ఇప్పుడు విశ్వ వేదిక‌పై ప్ర‌ద‌ర్శిత‌మ‌వ‌డం మ‌న దేశానికే కాక తెలుగు వారికి కూడా చాలా గ‌ర్వ కార‌ణం.