RAPO23: పాండిచ్చేరిలో రామ్ పోతినేని ఏం చేస్తున్నారంటే..

ఎనర్జిటిక్ స్టార్ రామ్ పోతినేని (Ram Pothineni) నటిస్తూ దర్శకత్వం వహిస్తున్న RAPO23 టాలీవుడ్‌లో హాట్ టాపిక్‌గా మారింది. భారీ అంచనాల మధ్య తెరకెక్కుతున్న ఈ చిత్రం రూ.100 కోట్లకు పైగా బడ్జెట్‌తో అత్యంత ప్రతిష్ఠాత్మకంగా రూపొందుతోంది. రామ్ కెరీర్‌లోనే అత్యంత భారీ ప్రాజెక్ట్‌గా నిలవనున్న ఈ సినిమాపై అభిమానులతో పాటు సినీ వర్గాల్లోనూ ఆసక్తి నెలకొంది.

ప్రస్తుతం ఈ సినిమా షూటింగ్ అందమైన పాండిచ్చేరిలో శరవేగంగా  సాగుతోంది. చిత్రబృందం అక్కడ 15 రోజుల పాటు షెడ్యూల్‌ ప్లాన్ చేసింది. దీనిలో సినిమాకు అత్యంత కీలకమైన సన్నివేశాలతో పాటు విజువల్‌గా ఆకట్టుకునే ఎపిసోడ్స్‌ను చిత్రీకరిస్తున్నారు. ఈ షెడ్యూల్‌లో సినిమాకు ప్రత్యేక ఆకర్షణగా నిలిచే ఓ పాటను చిత్రీకరిస్తున్నారు. ఈ పాటకు  కొరియోగ్రాఫర్ బృందా మాస్టర్ నృత్య దర్శకత్వం వహిస్తున్నారు. ఆమె రూపొందిస్తున్న స్టెప్పులు, విజువల్ ప్రెజెంటేషన్ ప్రేక్షకులకు కనువిందు చేయనున్నాయని చిత్ర యూనిట్ చెబుతోంది. అంతేకాదు, సినిమాలోని హై వోల్టేజ్ యాక్షన్ సన్నివేశాలను కూడా ఇదే షెడ్యూల్‌లో తెరకెక్కిస్తున్నారు. ఈ యాక్షన్ ఎపిసోడ్స్‌కు విక్రమ్ మోర్ మాస్టర్ ఫైట్స్  కంపోజ్ చేస్తున్నారు. 'కేజీఎఫ్ ఛాప్టర్ 1', 'కాంతారా', 'కరుప్పు' వంటి బ్లాక్‌బస్టర్ చిత్రాల్లో తన స్టన్నింగ్ యాక్షన్‌తో గుర్తింపు పొందిన విక్రమ్ మోర్ ఈ సినిమాకూ అదే స్థాయి విజువల్ ట్రీట్ ఇవ్వనున్నట్లు సమాచారం. భారీ బడ్జెట్, అద్భుతమైన టెక్నికల్ టీమ్, గ్రాండ్ మేకింగ్‌తో రూపొందుతున్న #RAPO23 రామ్ పోతినేని కెరీర్‌లో మరో మైలురాయిగా నిలుస్తుందని యూనిట్ వర్గాలు చెబుతున్నాయి.