RC 17: ఎట్ట‌కేల‌కు.. మెగా కాంబో మూవీ లాంచ్

క్రియేటివ్ డైరెక్టర్ సుకుమార్ (sukumar), మెగా పవర్ స్టార్ రామ్ చరణ్ (ram charan).. ఈ రెండు పేర్లు వింటే సినిమా ప్రేమికులకు ముందుగా గుర్తుకువచ్చేది 'రంగస్థలం'. బాక్సాఫీస్ వద్ద రికార్డుల సునామీ సృష్టించిన ఆ చిత్రం ఎంతటి ఘనవిజయం సాధించిందో ప్రత్యేకంగా చెప్పనవసరం లేదు. ఆ సినిమాలో రామ్ చరణ్ నటన, సుకుమార్ టేకింగ్‌కు విమర్శకుల ప్రశంసలు కూడా దక్కాయి. అయితే, ఆ మ్యాజిక్ రిపీట్ చేయడానికి దాదాపు ఎనిమిదేళ్ల తర్వాత ఈ ఇద్దరి క్రేజీ కాంబినేషన్‌లో వస్తున్న చిత్రమే 'RC17'. ఇప్పుడు ఈ ప్రాజెక్ట్‌కి సంబంధించి మేకర్స్ ఇచ్చిన ఓ అదిరిపోయే అప్డేట్ మెగా అభిమానుల్లో ఫుల్ జోష్ నింపుతోంది.

రామ్ చరణ్ నటించిన పెద్ది సినిమా విడుదలై నెలలు గడుస్తున్నా 'RC17' ప్రారంభం కావడం లేదని అభిమానులు కొంత నిరాశతో ఉన్నారు. అయితే, తాజాగా ప్రముఖ నిర్మాణ సంస్థ మైత్రి మూవీ మేకర్స్ నిర్మాతల్లో ఒకరైన రవిశంకర్ ఒక మూవీ ఈవెంట్‌లో పాల్గొని ఈ సినిమాపై బిగ్ అప్డేట్ ఇచ్చారు. నవంబర్ 1వ తేదీన పూజా కార్యక్రమాలతో 'RC17' చిత్రాన్ని లాంఛ్ చేయబోతున్నట్లు ఆయన అధికారికంగా ప్రకటించారు. అంతేకాదు, పూజా కార్యక్రమాలు పూర్తయిన వెంటనే రెగ్యులర్ షూటింగ్‌ను కూడా శరవేగంగా ప్రారంభించనున్నట్లు స్పష్టం చేశారు. ఎట్టకేలకు సినిమా పట్టాలెక్కుతుండటంతో మెగా ఫ్యాన్స్ ఫుల్ ఖుష్ అవుతున్నారు.

ఇక 'రంగస్థలం' లాంటి ఇండస్ట్రీ హిట్ తర్వాత సుకుమార్, రామ్ చరణ్ కాంబోలో వస్తున్న సినిమా కావడంతో అంచనాలు ఏ రేంజ్‌లో ఉంటాయో ప్రత్యేకంగా చెప్పనవసరం లేదు. ఈ సినిమా కోసం సుకుమార్ మరోసారి అదిరిపోయే కథను సిద్ధం చేసినట్లు సినీ వర్గాల్లో గట్టి ప్రచారం జరుగుతోంది. రామ్ చరణ్‌ను ఇప్పటివరకు ఎవరూ చూడని సరికొత్త కోణంలో, ఒక డిఫరెంట్ అవతారంలో సుకుమార్ చూపించబోతున్నారట. పాత్ర చిత్రణలో సుకుమార్ చూపించే డెప్త్, ఎమోషన్స్ ఈ సినిమాలో నెక్స్ట్ లెవెల్‌లో ఉండబోతున్నాయని తెలుస్తోంది. దీంతో ఈ సినిమాపై అంచనాలు రోజురోజుకూ విపరీతంగా పెరిగిపోతున్నాయి.

ఇక ఈ చిత్రానికి సంబంధించిన ఇతర నటీనటులు, సాంకేతిక నిపుణుల గురించి కూడా సోషల్ మీడియాలో రకరకాల వార్తలు వైరల్ అవుతున్నాయి. ఈ సినిమాకు కోలీవుడ్ రాక్‌స్టార్ అనిరుధ్ రవిచందర్ (Anirudh Ravichander) సంగీతం అందించనున్నట్లు జోరుగా ప్రచారం జరుగుతోంది. అనిరుధ్ మ్యూజిక్ ఇస్తే ఆ కిక్కే వేరుగా ఉంటుంది, కాబట్టి ఈ కాంబినేషన్ బాక్సాఫీస్ వద్ద మ్యూజికల్ సునామీ సృష్టించడం ఖాయం. అలాగే, ఈ చిత్రంలో హీరోయిన్ ఎవరనే దానిపై కూడా ఆసక్తికర చర్చ జరుగుతోంది. కథానాయికగా నటింపజేసేందుకు సారా అర్జున్‌, అనీత్ ప‌డ్డా (Aneet Padda), ప్రీతి ముకుంద‌న్ వంటి ముద్దుగుమ్మల‌ పేర్లు పరిశీలనలో ఉన్నట్లు టాక్ వినిపిస్తోంది.

ఈ అన్ని విషయాలపై నవంబర్ 1న జరిగే పూజా కార్యక్రమంలో పూర్తి స్పష్టత వచ్చే అవకాశం ఉంది. మొత్తానికి నవంబర్ 1 నుంచి 'RC17' పట్టాలెక్కబోతుండడంతో రానున్న రోజుల్లో ఈ సినిమా నుంచి వరుస అప్డేట్స్ రావడం ఖాయం. రంగస్థలం లాంటి బ్లాక్‌బస్టర్ తర్వాత వస్తున్న ఈ క్రేజీ కాంబో బాక్సాఫీస్ వద్ద ఎలాంటి సరికొత్త రికార్డులు సృష్టిస్తుందో వేచి చూడాలి.