ఆగిపోయిన సలార్ 2 .. నీల్ ఏమన్నాడంటే

పాన్ ఇండియా స్టార్ ప్రభాస్ (Prabhas) హీరో ప్రశాంత్ నీల్ (Prashanth Neel) దర్శకత్వంలో తెరకెక్కిన చిత్రం సలార్ (Salaar). ప్రభాస్ రేంజ్ ని అమాంతం పెంచేసిన సినిమాల్లో సలార్ ఒకటి. 2023 లో రిలీజ్ అయిన ఈ సినిమా మంచి విజయాన్ని అందుకుంది. ఇక ఈ సినిమాకు సీక్వెల్ గా సలార్ 2 ని ప్రశాంత్ నీల్ అనౌన్స్ చేశాడు. శౌర్యంగ పర్వం అనే టైటిల్ తో ఈ సీక్వెల్ తెరకెక్కనుందని నీల్ అధికారికంగా ప్రకటించాడు. దాదాపు మూడేళ్ళు అవుతున్నా ఈ సీక్వెల్ ఇంకా పట్టాలెక్కలేదు. ఈ మధ్యలో ప్రభాస్ వరుస సినిమాలతో బిజీగా మారాడు.

నీల్ సైతం శౌర్యంగ పర్వాన్ని పక్కన పెట్టి డ్రాగన్ మీద ఫోకస్ చేశాడు. ఎన్టీఆర్ హీరోగా తెరకెక్కుతోన్న ఈ సినిమా వచ్చే ఏడాది రిలీజ్ కి సిద్ధమవుతోంది. ఇక ఈ మధ్యనే నీల్.. డ్రాగన్ గురించి మాట్లాడుతూ ఇలాంటి గ్యాంగ్ స్టర్ మూవీస్ తీసి బోర్ కొట్టేసింది. డార్క్ మోడ్ లో డ్రాగన్ లాస్ట్ సినిమా అని చెప్పాడు. దీంతో ప్రభాస్ ఫ్యాన్స్ ఉలిక్కిపడ్డారు. అంటే సలార్ సీక్వెల్ లేనట్టేనా.. ? అని అసహనం వ్యక్తం చేశారు.

ఇక ప్రభాస్ ఫ్యాన్స్ తన వ్యాఖ్యలను చాలా సీరియస్ గా తీసుకున్నారు అని అర్ధం చేసుకున్న నీల్.. వెంటనే సలార్ 2 కి సంబంధించిన అప్డేట్ ఇచ్చాడు. ప్రస్తుతం తన ఫోకస్ అంతా డ్రాగన్ మీదనే ఉందని, ఈ సినిమా ఫినిష్ అయిన వెంటనే సలార్ 2 మొదలుకానుందని తెలిపాడు. దీంతో ఫ్యాన్స్ ఊపిరి పీల్చుకున్నారు. వచ్చే ఏడాదిలో సలార్ 2 పట్టాలెక్కనుందని తెలియడంతో ఫ్యాన్స్ ఆనందం వ్యక్తం చేస్తున్నారు. ఇక ప్రభాస్ సినిమాల విషయానికొస్తే ప్రస్తుతం ఆయన ఫౌజీ, కల్కి 2 సినిమాలతో బిజీగా ఉన్నాడు.