మే 1న.. ‘ఓ తండ్రి కథ’ రిలీజ్

తండ్రి అంటే నిస్వార్థ ప్రేమకు ప్రతిరూపం… కుటుంబానికి అచంచలమైన ఆధారం. తన భావాలను పక్కనపెట్టి పిల్లల భవిష్యత్తు కోసం అహర్నిశలు శ్రమించే త్యాగమూర్తి. అలాంటి తండ్రి గొప్పతనాన్ని హృదయాన్ని హత్తుకునేలా చూపించే భావోద్వేగ చిత్రం ‘ఓ తండ్రి కథ’ మే 1న థియేటర్లలో విడుదలకు సిద్ధమైంది.

కుటుంబ విలువలు, తండ్రి–పిల్లల అనుబంధం, బాధ్యతల వెనుక దాగి ఉన్న త్యాగాన్ని ప్రతిబింబించే ఈ సినిమా ప్రేక్షకులకు ఎమోషనల్ అనుభూతిని ఇవ్వనుంది. వైఎస్‌కె, నిహారిక చౌదరి, వరేణ్య ఆగ్రా, అశోక్ రెడ్డి లెంకల, విజయలక్ష్మీ, తోట సుబ్బారావు, వి. కరుణాకర్ కీలక పాత్రల్లో నటించారు. నంది వెంకట్ రెడ్డి దర్శకత్వంలో, LV క్రియేషన్స్ ఎంటర్టైన్మెంట్ బ్యానర్‌పై అశోక్ రెడ్డి లెంకల నిర్మించారు.

ఇటీవల తెలుగు ఫిలిం ఛాంబర్‌లో నిర్వహించిన ఆడియో, ట్రైలర్ లాంచ్ ఈవెంట్ ఘనంగా జరిగింది. దర్శకులు వి. సముద్ర, సంజీవ్ కుమార్ మేగోటి ముఖ్య అతిథులుగా హాజరై ట్రైలర్, పాటలను విడుదల చేసి టీమ్‌కు శుభాకాంక్షలు తెలిపారు. ఈ సంద‌ర్భంగా వి. సముద్ర మాట్లాడుతూ, “ప్రతి తరం మధ్య తల్లిదండ్రులు–పిల్లల మధ్య భావోద్వేగ సంఘర్షణలు సహజం. మంచి సందేశంతో రూపొందిన ఈ చిత్రాన్ని ప్రేక్షకులు ఆదరించాలి” అన్నారు.

సంజీవ్ కుమార్ మేగోటి మాట్లాడుతూ, “తండ్రి విలువను చూపించే సినిమాలు రావడం అవసరం. అశోక్ రెడ్డి ఈ పాత్రలో జీవించారు. పాటలు హృదయాన్ని తాకేలా ఉన్నాయి” అని తెలిపారు. నటుడు ఘర్షణ శ్రీనివాస్ మాట్లాడుతూ, “బంధాల విలువను గుర్తు చేసే ఈ సినిమా ప్రతి ఒక్కరిని కదిలిస్తుంది” అన్నారు.

నిర్మాత అశోక్ రెడ్డి లెంకల మాట్లాడుతూ, “తండ్రి కష్టం, త్యాగం, బాధ్యతలను చూపించే ఈ కథ ప్రేక్షకులకు దగ్గరవుతుంది” అని విశ్వాసం వ్యక్తం చేశారు. మొత్తంగా, భావోద్వేగంతో కూడిన కుటుంబ కథగా తెరకెక్కిన ‘ఓ తండ్రి కథ’ మే 1న ప్రేక్షకుల హృదయాలను తాకేందుకు సిద్ధంగా ఉంది.