God of War: టైగర్.. అభిమానుల చిర‌కాల కోరిక! ఇది క‌దా న్యూస్‌
ABN , Publish Date - Oct 28 , 2026 | 09:23 AM
ఎన్టీఆర్, త్రివిక్రమ్ కాంబినేషన్‌లో తెరకెక్కనున్న ‘గాడ్ ఆఫ్ వార్’ సినిమాలో ఆలియా భట్ హీరోయిన్‌గా నటించనున్నట్లు ప్రచారం జరుగుతోంది. ఈ క్రేజీ కాంబినేషన్‌పై పూర్తి వివరాలు.
నందమూరి అభిమానులు ఎప్పుడెప్పుడా అని ఎదురుచూస్తున్న మోస్ట్ యాంటిసిపేటెడ్ కాంబినేషన్ మరోసారి రిపీట్ కాబోతున్న విషయం తెలిసిందే. యంగ్ టైగర్ ఎన్టీఆర్ (NTR), మాటల మాంత్రికుడు త్రివిక్రమ్ శ్రీనివాస్ (Trivikram Srinivas).. ఈ రెండు పేర్లు వింటేనే బాక్సాఫీస్ వద్ద రికార్డుల మోత మోగాల్సిందే. 2018లో వీరిద్దరి కలయికలో వచ్చిన ‘అరవింద సమేత వీరరాఘవ’ ఎంత పెద్ద హిట్ అయిందో అందరికీ తెలుసు. ఇప్పుడు దాదాపు ఎనిమిది ఏళ్ల తర్వాత మరోసారి ఈ ఇద్దరూ పౌరాణిక నేపథ్యంలో గాడ్ ఆఫ్ వార్ సినిమా చేయడానికి సిద్ధమవుతున్నారు. ఇప్పటికే ఈ ప్రాజెక్ట్‌కు సంబంధించిన అధికారిక ప్రకటన కూడా వచ్చేసింది.
అయితే, తాజాగా గాడ్ ఆఫ్ వార్‌కు సంబంధించి సోషల్ మీడియాలో ఓ ఇంట్రెస్టింగ్ వార్త వైరల్ అవుతోంది. ఈ చిత్రంలో ఎన్టీఆర్ సరసన హీరోయిన్‌గా బాలీవుడ్ స్టార్ బ్యూటీ ఆలియా భట్ (Alia Bhatt) ను ఖరారు చేసినట్లు సినీ వర్గాల్లో గట్టిగా టాక్ వినిపిస్తోంది. తారక్ పక్కన ఆలియా అయితే పర్ఫెక్ట్‌గా సరిపోతుందని గురూజీ త్రివిక్రమ్ భావిస్తున్నారట. త్వరలోనే ఆమెను సంప్రదించడానికి మేకర్స్ సన్నాహాలు చేస్తున్నట్లు సమాచారం. ఈ సినిమాను అత్యంత ప్రతిష్టాత్మకంగా పాన్-ఇండియా స్థాయిలో తెరకెక్కిస్తుండటంతో, ఆలియా భట్ ఉంటే నార్త్ మార్కెట్‌లో సినిమాకి తిరుగు ఉండదని మేకర్స్ ప్లాన్ చేస్తున్నారట.
ఇప్పటికే ఎన్టీఆర్, ఆలియా భట్ దర్శకధీరుడు రాజమౌళి తెరకెక్కించిన ‘ఆర్ఆర్ఆర్’ చిత్రంలో నటించిన సంగతి తెలిసిందే. అయితే ఆ సినిమాలో ఆలియా, రామ్ చరణ్ సరసన నటించడంతో.. తారక్‌తో ఆమెకు స్క్రీన్ స్పేస్ చాలా తక్కువగా ఉంది. ఒకవేళ త్రివిక్రమ్ సినిమాలో గనుక ఈ కాంబినేషన్ సెట్ అయితే, ఈసారి వీరిద్దరి మధ్య పవర్-ప్యాక్డ్ సీన్స్ చూసే అవకాశం ఉంటుంది. అంతేకాదు, త్రివిక్రమ్ సినిమాల్లో మహిళా పాత్రలకు ఎప్పుడూ ఒక ప్రత్యేకమైన ప్రాముఖ్యత ఉంటుంది. కేవలం గ్లామర్ కోసమే కాకుండా, కథను మలుపు తిప్పే బలమైన పాత్రలో ఆలియా కనిపించే ఛాన్స్ ఉందని సినీ విశ్లేషకులు అంచనా వేస్తున్నారు.
ప్రస్తుతం యంగ్ టైగర్ ఎన్టీఆర్, ప్రశాంత్ నీల్ దర్శకత్వంలో తెరకెక్కుతున్న 'డ్రాగన్' సినిమాతో ఫుల్ బిజీగా ఉన్నారు. మరోవైపు త్రివిక్రమ్ దర్శకత్వం వహిస్తున్న 'ఆదర్శకుటుంబం' అక్టోబర్‌ 30న ప్రేక్షకుల ముందుకు రానుంది. ఆదర్శ కుటుంబం రిలీజ్ కాగానే ఎన్టీఆర్ సినిమా పనుల్లోకి దిగుతానని ఇటీవల గురూజీ స్పష్టం చేశారు. ఇక ఈ చిత్రంలో ఎన్టీఆర్ సరికొత్త లుక్‌తో పాటు అత్యంత శక్తివంతమైన పాత్రలో కనిపించబోతున్నారని తెలుస్తోంది. త్రివిక్రమ్ మార్క్ డైలాగులు, అదిరిపోయే యాక్షన్ సీక్వెన్స్‌లు ఈ సినిమాకి మెయిన్ హైలైట్‌గా నిలవనున్నాయని సినీ విశ్లేషకులు చెబుతున్నారు. అయితే, ఈ సినిమాలో ఆలియా భట్ నటిస్తుందన్న ఈ వార్తలపై మేకర్స్ నుంచి అధికారిక ప్రకటన రావాల్సి ఉంది. అయినప్పటికీ, ఈ కాంబినేషన్ గురించిన ప్రచారమే అభిమానుల్లో అంచనాలను తారాస్థాయికి చేర్చింది. మరి ఈ చిత్రంలో హీరోయిన్‌గా ఎవరు నటిస్తారు? ఎన్టీఆర్, త్రివిక్రమ్ కాంబో బాక్సాఫీస్ వద్ద ఎలాంటి సరికొత్త రికార్డులు సృష్టిస్తుంది? ఇవన్నీ తెలియాలంటే మరికొన్ని రోజులు ఆగాల్సిందే.