Jr. NTR: వీడియోగ్రాఫర్‌పై.. ఎన్టీఆర్ సీరియ‌స్‌! వీడియో వైరల్

జూనియర్ ఎన్టీఆర్ (Jr. NTR) కు కోపమొచ్చింది. అవును నిజమే... తన పర్మిషన్ లేకుండా ఫోటోలను, వీడియోను తీస్తున్న వ్యక్తిపై ఎన్టీఆర్ అసహనం వ్యక్తం చేశారు. ఇటీవల ఓ స్టార్ హోటల్ లోకి వెళ్తున్న ఎన్టీఆర్ వెనకపడి ఓ వ్యక్తి ఫోటోలను, వీడియోలను తీయడానికి ప్రయత్నించాడు. అక్కడకూ ఎన్టీఆర్ బాడీ గార్డ్స్ అతన్ని వారించే ప్రయత్నం చేశారు. ఫోన్ మాట్లాడుతూ హోటల్ లోకి అడుగుపెడుతున్న ఎన్టీఆర్... ఆ వ్యక్తి చర్యలకు ఆవేశపడి గట్టిగా అరిచేశాడు. దీనికి సంబంధించిన వీడియో ఒకటి సోషల్ మీడియాలో రెండు రోజులుగా చక్కర్లు కొడుతోంది.

ఇదిలా ఉంటే... ఈ వీడియోను చూసిన వారిలో కొందరు ఎన్టీఆర్ అనవసరంగా అతిగా స్పందించారని వ్యాఖ్యానిస్తుంటే... మరికొందరు ఎంత పెద్ద నటుడు అయినా ఫ్రైవసీ కోరుకుంటారని, వారి అనుమతి లేకుండా ఇష్టానుసారం ఫోటోలు తీయడం తప్పని చెబుతున్నారు. ఎన్టీఆర్ వ్యతిరేక వర్గం ఇదే అదనుగా ఈ వీడియోను తెగ వైరల్ చేస్తోంది. ఇక సినిమాల విషయానికి వస్తే... ఎన్టీఆర్ ప్రస్తుతం 'డ్రాగన్' (Dragon) మూవీలో నటిస్తున్నాడు. ప్రశాంత్ నీల్ (Prasanth Neel) దర్శకత్వంలో ఈ సినిమాను మైత్రీ మూవీ మేకర్స్ సంస్థ నిర్మిస్తోంది. 'దేవర' (Devara) సినిమా తర్వాత వస్తున్న 'డ్రాగన్'కు మొదటి నుండి మంచి క్రేజ్ ఉంది. ఈ సినిమాతో ఎన్టీఆర్ తన ఖాతాలో మరో హిట్ ను జమ చేసుకోవడం ఖాయమని అభిమానులు భావిస్తున్నారు.