ఊరమాస్ స్క్రిప్ట్‌తో బాల‌య్య‌.. యాక్ష‌న్‌తోనే షూటింగ్ స్టార్ట్‌

నందమూరి బాలకృష్ణ (Balakrishna), గోపీచంద్ మలినేని (Gopichand malineni) కాంబినేషన్ అంటేనే బాక్సాఫీస్ వద్ద మాస్ జాతర మొదలైనట్లే. 'వీరసింహారెడ్డి' వంటి భారీ బ్లాక్ బస్టర్ తర్వాత వీరిద్దరి కలయికలో మరో సినిమా రాబోతుండటంతో నందమూరి అభిమానుల్లో అంచనాలు ఆకాశాన్ని తాకాయి. పక్కా మాస్ అంశాలతో కూడిన ఈ క్రేజీ ప్రాజెక్ట్ త్వరలోనే పట్టాలెక్కనుంది. తాజాగా ఈ సినిమా షూటింగ్ షెడ్యూల్ గురించి ఒక అప్‌డేట్ సోషల్ మీడియాలో వైరల్ గా మారింది.

ఈ భారీ యాక్షన్ ఎంటర్‌టైనర్ రెగ్యులర్ షూటింగ్ మార్చి 5వ తేదీ నుంచి ఘనంగా ప్రారంభం కానుంది. హైదరాబాద్‌లోని అల్యూమినియం ఫ్యాక్టరీలో ఇందుకు సంబంధించిన ఏర్పాట్లు పూర్తయ్యాయి. తొలిరోజే బాలయ్య మార్క్ పవర్ ఫుల్ యాక్షన్ సీక్వెన్స్‌తో సినిమా చిత్రీకరణను మొదలుపెట్టాలని దర్శకుడు గోపీచంద్ నిర్ణయించినట్లు సమాచారం. ఈ భారీ యాక్షన్ ఎపిసోడ్ సినిమాకే హైలైట్‌గా నిలుస్తుందని టాక్. వృద్ధి సినిమాస్ బ్యానర్ పై వెంకట సతీష్ కిలారు ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు.

హీరోలను వెండితెరపై అత్యంత శక్తివంతంగా చూపించడంలో దర్శకుడు గోపీచంద్ మలినేనిది ఒక ప్రత్యేకమైన శైలి. గతంలో వీరిద్దరి కాంబోలో వచ్చిన సినిమా బాలయ్య విశ్వరూపాన్ని ప్రేక్షకులకు పరిచయం చేసింది. ఆ అనుభవంతో ఈసారి అంతకుమించి ఉండేలా, మరింత ఊరమాస్ ఎలిమెంట్స్‌తో స్క్రిప్ట్‌ను సిద్ధం చేసినట్లు వినికిడి. పక్కా కమర్షియల్ హంగులతో ఈ కథ రూపుదిద్దుకుంది.

ఈ సినిమాలో బాలయ్య సరసన లేడీ సూపర్ స్టార్ నయనతార (Nayantara) కథానాయికగా నటిస్తోంది. వీరిద్దరి జంటకు వెండితెరపై మంచి క్రేజ్ ఉంది. గతంలో వీరి కాంబినేషన్లో వచ్చిన 'సింహా', 'శ్రీరామరాజ్యం', 'జై సింహా' వంటి చిత్రాలు ప్రేక్షకులను అలరించాయి. మరోసారి ఈ హిట్ పెయిర్ వెండితెరపై సందడి చేయనుండటం విశేషం. నయనతారతో పాటు ఈ చిత్రంలో నటించబోయే ఇతర నటీనటులు, సాంకేతిక నిపుణుల వివరాలను చిత్ర యూనిట్ అతి త్వరలోనే అధికారికంగా వెల్లడించనుంది.

ప్రస్తుతం టాలీవుడ్‌లో ఈ ప్రాజెక్ట్ హాట్ టాపిక్‌గా మారింది. గోపీచంద్ మలినేని మార్క్ టేకింగ్, బాలయ్య ఎనర్జీ తోడైతే థియేటర్లలో పూనకాలు రావడం ఖాయమని సినీ విశ్లేషకులు భావిస్తున్నారు. యాక్షన్ ప్రియులకు కావాల్సిన అన్ని అంశాలను దర్శకుడు ఈ కథలో పొందుపరిచారట. రికార్డులను తిరగరాసేందుకు సిద్ధమవుతున్న ఈ మాస్ కాంబినేషన్ సందడి చూడాలంటే మరికొన్ని రోజులు వేచి చూడాల్సిందే. షూటింగ్ ప్రారంభం కానున్న నేపథ్యంలో సోషల్ మీడియాలో బాలయ్య అభిమానుల హడావుడి ఇప్పుడే మొదలైంది. భారీ బడ్జెట్‌తో నిర్మిస్తున్న ఈ చిత్రం బాలయ్య కెరీర్‌లో మరో మైలురాయిగా నిలుస్తుందని ఇండస్ట్రీ వర్గాలు ఆశాభావం వ్యక్తం చేస్తున్నాయి.