Mahesh Babu: పుట్టిన రోజు స్పెషల్.. అదిరిపోయే అప్డేట్ ఇచ్చిన జక్కన్న

సూపర్‌స్టార్‌ మహేశ్‌బాబు (Mahesh Babu) పుట్టినరోజు సందర్భంగా దర్శక ధీరుడు రాజమౌళి అభిమానులకు స్పెషల్‌ ట్రీట్‌ ఇచ్చారు.  మహేష్ బాబుకు పుట్టిన రోజు శుభాకాంక్షలు చెబుతూ వారణాసి నుంచి మహేష్ బాబు కొత్త ఫోటోలను జక్కన్న సోషల్ మీడియాలో పోస్ట్ చేశారు. ‘రౌద్రం ఒక్కటే అతడి స్వభావం కాదు.. అంతకు మించి కోణాలు ఉన్నాయి' ( Fierce isn’t his only shade… RUDHRA in Varanasi) అని అర్థం వచ్చేలా  మహేష్ బాబును ట్యాగ్ చేసి  పోస్ట్ చేశారు.  దీనిని బట్టి రుద్ర పాత్రలో వీరత్వం ఒకటే కాదు అంతకు మించి ఉంటుందని తెలుస్తుంది. 

ఇప్పటివరకు ‘వారణాసి’కి సంబంధించిన ప్రచార చిత్రాలు, వీడియోల్లో మహేశ్‌బాబు లుక్‌ చాలా పవర్‌ఫుల్‌గా కనిపించింది. ఆయన బాడీ లాంగ్వేజ్‌, యాక్షన్‌ షేడ్స్‌, ఇంటెన్స్‌ ఎక్స్‌ప్రెషన్స్‌ అభిమానుల్లో భారీ అంచనాలను పెంచాయి. అయితే “Fierce isn’t his only shade” అంటూ రాజమౌళి చెప్పడంతో.. రుద్ర పాత్రలో యాక్షన్‌కు మించి మరో బలమైన భావోద్వేగ కోణం ఉండొచ్చనే చర్చ మొదలైంది. దీనితో ‘రుద్ర’ పాత్ర ఎలా ఉండబోతోందన్నది ఇప్పుడు ఇండియన్‌ సినిమా ప్రేక్షకుల్లో ఆసక్తికర అంశంగా మారింది.

ఇందులో మహేశ్‌బాబుతో పాటు ప్రియాంక చోప్రా, పృథ్వీరాజ్‌ సుకుమారన్‌ కీలక పాత్రల్లో కనిపించనున్నారు. అంతర్జాతీయ స్థాయిలో తెరకెక్కుతున్న ఈ సినిమాకు కీరవాణి సంగీతం అందిస్తున్నారు.  వచ్చే ఏడాది ఏప్రిల్‌ 7న ఈ చిత్రం ప్రేక్షకుల ముందుకు రానుంది. ఈ ఏడాది అక్టోబర్‌ నాటికి షూటింగ్‌ను పూర్తి చేసి, అనంతరం ప్రమోషన్‌ కార్యక్రమాలను ప్రారంభించేందుకు చిత్రబృందం సన్నాహాలు చేస్తోంది.    

మహేష్ పోస్ట్ వైరల్.. 

మహేష్ కూడా వారణాసి గురించి పోస్ట్ చేశారు. 'రుద్ర ప్రపంచం నుంచి మరికొంత' (A little more of Rudhra’s world) అంటూ స్టైలిష్  ఫోటోలను షేర్ చేశారు. ఆయన పోస్ట్ ప్రేక్షకుల్లో మరింత ఆసక్తి పెంచింది.