మెగా ఫ్యాన్స్‌కు గుడ్ న్యూస్.. 'మెగా 158'కి ముహూర్తం ఖరారు!

మెగాస్టార్ చిరంజీవి (Chiranjeevi), దర్శకుడు బాబీ కొల్లి (Bobby) కలయికలో రాబోతున్న ‘మెగా 158’ (Mega 158) చిత్రం ఆసక్తిని రేకెత్తిస్తోంది. గతంలో వీరిద్దరి కాంబినేషన్‌లో వచ్చిన ‘వాల్తేరు వీరయ్య’ బాక్సాఫీస్ వద్ద రికార్డు స్థాయి వసూళ్లను సాధించడమే కాకుండా, మెగాస్టార్‌లోని వింటేజ్ మాస్ యాంగిల్‌ను వెలికితీసింది. ఆ విజయం ఇచ్చిన ఊపుతో, ఈ క్రేజీ ప్రాజెక్ట్‌పై అంచనాలు ఆకాశాన్ని తాకుతున్నాయి. బాబీ ఈసారి కూడా చిరంజీవిని ఒక విభిన్నమైన, పవర్‌ఫుల్ మాస్ అవతారంలో వెండితెరపై ప్రెజెంట్ చేయడానికి సిద్ధమవుతుండటం విశేషం.

ఈ ప్రతిష్ఠాత్మక చిత్రానికి సంబంధించిన ముహూర్తపు వేడుక తేదీ ఖరారైంది. ఏప్రిల్ 11, 2026న చిత్ర యూనిట్ అత్యంత వైభవంగా పూజా కార్యక్రమాలతో సినిమాను అధికారికంగా ప్రారంభించనుంది. మెగాస్టార్ చిరంజీవి సినీ ప్రయాణంలో ఈ 158వ చిత్రం ఒక మైలురాయిలా నిలిచిపోతుందని సినీ వర్గాలు భావిస్తున్నాయి. ఈ ప్రారంభోత్సవ వేడుకకు పరిశ్రమలోని పలువురు ప్రముఖులు హాజరయ్యే అవకాశం ఉండటంతో, సోషల్ మీడియాలో ఇప్పుడే ఈ సినిమాకు సంబంధించిన చర్చ మొదలైంది.

సినిమా ప్రారంభమైన కొద్ది రోజుల్లోనే అంటే, ఏప్రిల్ 20 నుంచి రెగ్యులర్ షూటింగ్ మొదలుకానుంది. చిరంజీవి బాడీ లాంగ్వేజ్‌కు, ఆయన ఇమేజ్‌కు సరిగ్గా సరిపోయేలా బాబీ ఒక పక్కా కమర్షియల్ ఎంటర్టైనర్ స్క్రిప్ట్‌ను సిద్ధం చేశారు. ఇందుకోసం చిత్ర యూనిట్ ఇప్పటికే ప్రీ-ప్రొడక్షన్ పనులన్నింటినీ పూర్తి చేసింది. భారీ సెట్స్ తో పాటు, కీలకమైన షెడ్యూల్స్ కోసం లొకేషన్ల ఎంపిక కూడా పూర్తయినట్లు సమాచారం.

కేవీఎన్ ప్రొడక్షన్స్ పతాకంపై వెంకట్ కె. నారాయణ అత్యంత భారీ బడ్జెట్‌తో ఎక్కడా రాజీ పడకుండా ఈ సినిమాను నిర్మించ నున్నారు. సాంకేతిక పరంగా కూడా ఈ చిత్రం అత్యున్నత ప్రమాణాలతో ఉండబోతోంది. నిమిష్ రవి ఈ సినిమాకు సినిమాటోగ్రాఫర్‌గా వ్యవహరిస్తుండటంతో విజువల్స్ సరికొత్తగా ఉంటాయని తెలుస్తోంది. అలాగే, స్టార్ మ్యూజిక్ డైరెక్టర్ థమన్ ఈ చిత్రానికి సంగీతాన్ని అందించనున్నట్లు తెలుస్తోంది. మెగాస్టార్ సినిమాలకు థమన్ ఇచ్చే బ్యాక్ గ్రౌండ్ స్కోర్ మరో లెవల్‌లో ఉంటుందని అభిమానులు గట్టిగా నమ్ముతున్నారు.

ఈ సినిమాలో నటించబోయే ఇతర ప్రధాన నటీనటుల గురించి కూడా అభిమానుల్లో ఉత్కంఠ నెలకొంది. మెగాస్టార్ సరసన కథానాయిక ఎవరనే విషయంతో పాటు, సినిమాలో విలన్ పాత్రలో ఎవరు కనిపిస్తారనే వివరాలు ఇంకా గోప్యంగా ఉంచారు. రాబోయే రోజుల్లో చిత్ర యూనిట్ అధికారికంగా ఇతర టెక్నీషియన్స్, నటీనటుల వివరాలను వెల్లడించనుంది. ఈ సినిమాతో మెగాస్టార్ బాక్సాఫీస్ వద్ద మరోసారి తన సత్తా చాటుతారని ట్రేడ్ విశ్లేషకులు అంచనా వేస్తున్నారు.