Shiva Karthik: గట్టిగా ప్రయత్నించాలన్న కసి అప్పుడే పెరిగింది  

'నటుడికి సంతృప్తినిచ్చే పాత్రలు దక్కినప్పుడు, ఆ పాత్రను చక్కగా పోషించి గుర్తింపు వచ్చి ప్రేక్షకులు ప్రశంసలు కురిపించినప్పుడు వచ్చే ఆనందమే వేరు. చాలా సినిమాలు చేసినప్పటికీ ‘శంబాల’ (Shambala) చిత్రంతో మంచి గుర్తింపు వచ్చింది' అని  శివకార్తిక్ (Shiva Karthik) అన్నారు. ఆది సాయి కుమార్ (Aadi saikumar) హీరోగా తెరకెక్కిన శంబాలా చక్కని విజయాన్ని అందుకున్న సంగతి తెలిసిందే. ఈ సందర్భంగా తన ఆనందాన్ని వ్యక్తం చేస్తూ.. కెరీర్ లో ఎదురైనా ఒడిదుడుకుల గురించి ఎన్నో విషయాల్ని పంచుకున్నారు శివ. 

నేను మాది వ్యవసాయాధారిత కుటుంబంలో పుట్టాను.  గుంటూరు జిల్లాలోని వరగాని మా ఊరు. నాకు ఎలాంటి సినీ నేపథ్యం లేదు. ఒంటరిగానే ఇండస్ట్రీలోకి వచ్చాను. ‘జోష్’ మూవీ కోసం వేల మంది ఆడిషన్స్ ఇస్తే అందులో నేను సెలెక్ట్ అయ్యాను. ఆ తరువాత వరుసగా ‘భీమిలి కబడ్డీ జట్టు’, ‘పిల్లా జమీందార్’ చిత్రాలు చేశాను. కారెక్టర్ ఆర్టిస్ట్‌గా బిజీగా ఉన్న సమయంలోనే హీరోగా ‘లజ్జా’ అనే సినిమాను చేశాను. అది అంతగా వర్కౌట్ కాలేదు. దీంతో అటు హీరోగా, ఇటు కారెక్టర్ ఆర్టిస్ట్‌గా గ్యాప్ వచ్చింది. ఆ సమయంలో నేను ఎన్నో కష్టాలు అనుభవించాను.  అలాంటి టైంలో బాబీ గారు ‘పంతం’ సినిమాలో నా పర్ఫామెన్స్ చూసి చాలా మెచ్చుకున్నారు. నటుడిగా మంచి స్థాయికి వెళ్లాలని, ఇంకా గట్టిగా ప్రయత్నించాలన్న కసి అక్కడి నుంచి నాలో మరింత పెరిగింది. అలా ప్రయత్నిస్తున్న సమయంలో నేను ఆర్జీవీ గారి ‘భైరవగీత’ చిత్రంలో పవర్ ఫుల్ రోల్‌ చేశాను. అది చూసి  బోయపాటి  ‘అఖండ’లో అవకాశం ఇచ్చారు. అయితే ఈ క్రమంలో నేను చేసిన చాలా చిత్రాలకు మంచి పేరు వచ్చింది. ‘ఉగ్రం’ తరువాత మరింతగా నా పర్ఫామెన్స్ గురించి మాట్లాడుకున్నారు. ‘తండేల్’లో మంచి పాత్ర దక్కింది. 

ఎప్పుడూ ఒకే లాంటి సింపతీ పాత్రలు చేయకూడదు.. వెరైటీ పాత్రల్ని చేయాలని అనుకున్నాను. ఆ సమయంలో మనీష్ అని కో డైరెక్టర్ ద్వారా యుగంధర్ ముని వద్దకు నేను వెళ్లాను.  ‘శంబాల’ మూవీలో నాకు అద్భుతమైన పాత్ర దక్కింది.  ఆది గారు ‘శంబాల’ కోసం ఎంతో కష్టపడ్డారు. ఆయన డెడికేషన్ చూసి మాలోనూ మరింతగా కసి పెరిగింది. ఆయనతో పాటుగా, పోటీగా నటించాలని అందరూ వంద శాతం ఎఫర్ట్స్ పెట్టారు.  

ప్రస్తుతం నేను నటుడిగా సంతృప్తికరంగా ఉన్నాను. అయితే విక్రమ్ చేసిన ‘శివ పుత్రుడు’ లాంటి డిఫరెంట్ రోల్స్ చేయాలన్నదే నా కోరిక, కల. అందులో శివ కార్తిక్ కాకుండా కేవలం ఆ పాత్ర మాత్రమే కనిపించాలి. అలా ఓ అద్భుతమైన పాత్ర చేయాలని అనుకుంటున్నాను. నేను కీలక పాత్రలు పోషించిన ‘హైందవ’, ‘వృషకర్మ’ చిత్రాలు ఈ ఏడాదిలో విడుదల కాబోతోన్నాయి.