AnaganagaOkaRaju : రికార్డులు తిరగరాస్తున్న నవీన్‌ పొలిశెట్టి

మూడు వరుస విజయాలతో ప్రేక్షకుల హృదయాలలో ప్రత్యేక స్థానాన్ని సంపాదించుకున్నారు నవీన్‌ పొలిశెట్టి (Naveen Polishetty) . తాజాగా  'అనగనగా ఒక రాజు'తో(AnaganagaOkaRaju) మరో విజయాన్ని అందుకున్నారు. ఆయన కెరీర్‌లోనే అతిపెద్ద బ్లాక్‌బస్టర్‌గా నిలిచింది ఈ సినిమా. కేవలం ఐదు రోజుల్లోనే ప్రపంచవ్యాప్తంగా రూ.100.2 కోట్ల గ్రాస్‌ను సాధించి, బాక్సాఫీస్‌ రికార్డులు తిరగరాస్తోందని మేకర్స్ వెల్లడించారు.  థియేటర్లలో ప్రేక్షకుల ఉత్సాహాన్ని రెట్టింపు చేస్తూ, ఈ సంక్రాంతి పండుగను మరింత వైభవంగా మార్చిందని చెబుతున్నారు. సంక్రాంతి కానుకగా జనవరి 14వ తేదీన థియేటర్లలో అడుగుపెట్టిన 'అనగనగా ఒక రాజు' చిత్రం గురించి  మేకర్స్ మాట్లాడుతూ ' కడుపుబ్బా నవ్వించే హాస్యం, కంటతడి పెట్టించే భావోద్వేగాలతో అన్ని వయసుల   ప్రేక్షకులను ఆకట్టుకుంటూ అసలు సిసలైన సంక్రాంతి ఎంటర్టైనర్‌గా నిలిచింది. మొదటి షో నుంచి సినిమాకు మంచి బజ్ ఏర్పడింది.  కుటుంబ ప్రేక్షకుల రాకతో థియేటర్లు కళకళలాడుతున్నాయి. ఫలితంగా ఇది చరిత్రాత్మక విజయాన్ని నమోదు చేసింది. సంక్రాంతికి తీవ్ర పోటీ నెలకొన్నప్పటికీ, కేవలం నాలుగు రోజుల్లోనే అన్ని ప్రాంతాల డిస్ట్రిబ్యూటర్లు బ్రేక్ ఈవెన్ చేరుకోవడం అనేది అరుదైన ఘనతగా మారింది. అన్ని ప్రాంతాల్లోనూ సంచలన వసూళ్లతో భారీ విజయాన్ని సాధించింది. నవీన్‌ పొలిశెట్టి నాలుగో  బ్లాక్‌బస్టర్‌ హిట్టును సాధించారు. ఓవర్సీస్‌లో కూడా ఈ సినిమా  మైల్ స్టోన్ గా నిలిచింది.  యూఎస్‌లో నవీన్‌ పొలిశెట్టి వరుసగా మూడు సినిమాలతో $1 మిలియన్‌కు పైగా వసూళ్లను సాధించిన ఘనతను అందుకున్నారు. ఇది కొద్దిమందికే దక్కిన అరుదైన విజయంగా నిలిచింది. అంతేకాదు, రోజువారీ కలెక్షన్లు బలంగా కొనసాగుతుండటంతో 'అనగనగా ఒక రాజు' ఇప్పుడు ప్రతిష్టాత్మక $2 మిలియన్ మార్క్ వైపు వేగంగా దూసుకెళ్తోంది. ఆంధ్రప్రదేశ్, తెలంగాణలోనూ అసాధారణమైన బలం చూపిస్తూ సంచలన వసూళ్లతో దూసుకుపోతోంది. భారీ సంక్రాంతి పోటీ ఉన్నా డిస్ట్రిబ్యూటర్లు అందరూ కూడా సినిమాకు అండగా నిలిచి, ఉత్తమ విడుదల అందించారు. కీలక ప్రాంతాల్లో తగినన్ని థియేటర్లను కేటాయించారు. సినిమాపై నమ్మకంతో ఈ స్థాయి విడుదల చేశారు. వారి నమ్మకాన్ని నిజం చేస్తూ ప్రేక్షకుల పెద్దఎత్తున థియేటర్లకు కదిలిరావడంతో, రికార్డు స్థాయి వసూళ్లు వస్తున్నాయి' అని తెలిపారు.