3 లక్షల మంది బాలికలకు అండగా.. బన్నీ ఫ్యాన్స్!
ABN , Publish Date - Sep 10 , 2026 | 06:41 PM
సామాజిక సేవలోనూ తమదైన ముద్ర వేస్తూ అల్లు అర్జున్ ఫ్యాన్స్ అసోసియేషన్ (AAFA) మరోసారి ప్రశంసలు అందుకుంటోంది.
సినిమా రంగంలో హీరోలంటే కేవలం బాక్సాఫీస్ రికార్డులే కాదు.. రియల్ లైఫ్‌లో సమాజానికి ఆదర్శంగా నిలవడం కూడా. సరిగ్గా ఇదే కోవలో ఐకాన్ స్టార్ అల్లు అర్జున్ అభిమానులు మరోసారి తమ గొప్ప మనసును చాటుకున్నారు. తెరపైనే కాకుండా తెరవెనుక కూడా తాము ఎంత సామాజిక బాధ్యతతో ఉంటామో మరోసారి నిరూపించారు.
కేంద్ర ప్రభుత్వం అత్యంత ప్రతిష్టాత్మకంగా చేపట్టిన 'స్వస్థ్ నారీ వికసిత్ భారత్' కార్యక్రమంలో అల్లు అర్జున్ ఫ్యాన్స్ అసోసియేషన్ (AAFA) భాగస్వామ్యమైంది. హెచ్‌పీవీ వ్యాక్సినేషన్ అలాగే సర్వైకల్ క్యాన్సర్ నివారణపై దేశవ్యాప్తంగా అపూర్వమైన అవగాహన కార్యక్రమాలను నిర్వహించింది.
కేవలం మాటలకే పరిమితం కాకుండా.. ఏకంగా 8 రాష్ట్రాలు అలాగే కేంద్ర పాలిత ప్రాంతాల్లో 820 స్కూల్ అవేర్‌నెస్ ఈవెంట్లను ఈ అసోసియేషన్ విజయవంతంగా పూర్తి చేసింది. దీనిద్వారా దాదాపు 3 లక్షల మంది యువతులు, బాలికలకు హెచ్‌పీవీ వ్యాక్సిన్ ప్రాముఖ్యతను చేరువ చేయగలిగారు.
ఆంధ్రప్రదేశ్, తెలంగాణ, ఒడిస్సా, తమిళనాడు, కేరళ, మహారాష్ట్ర, కర్ణాటక అలాగే అండమాన్ నికోబార్ ఐల్యాండ్స్‌లో నేరుగా స్కూల్స్‌కి వెళ్లి ఈ ప్రచారాన్ని హోరెత్తించారు. బాలికలకు ఆరోగ్యకరమైన భవితను అందించాలనే సత్సంకల్పంతో ముందుకు సాగుతున్న అల్లు అర్జున్ అభిమానుల సమష్టి కృషి నిజంగా అభినందనీయం. సామాజిక బాధ్యతలో ఎప్పుడూ ముందుండే AAFA చేస్తున్న ఈ సేవలు ఎందరికో స్పూర్తిదాయకం.