ర‌జ‌నీకాంత్ 'జైల‌ర్ 2' సినిమాకు.. వింత‌ ప‌రిస్థితి

బాక్సాఫీస్ దగ్గర సూపర్ స్టార్ రజినీకాంత్ (rajinikanth) మేనియా ఎలా ఉంటుందో చెప్పాల్సిన పనిలేదు. సరైన సినిమా పడితే, వింటేజ్ తలైవర్ స్క్రీన్ పై కనిపిస్తే రికార్డులు బద్దలవ్వాల్సిందే. దర్శకుడు నెల్సన్ దిలీప్‌కుమార్ (nelson dileep kumar) కాంబినేషన్‌లో వచ్చిన జైలర్ ఎలాంటి సెన్సేషన్ క్రియేట్ చేసిందో చూశాం. ఇప్పుడు దానికి సీక్వెల్‌గా రాబోతున్న జైలర్ 2 (jailer 2) పై అంచనాలు ఆకాశాన్ని తాకుతున్నాయి. ఇప్పటికే ట్రేడ్ వర్గాల్లో ఈ సినిమా బిజినెస్ లెక్కలు హాట్ టాపిక్‌గా మారాయి. ముఖ్యంగా రెండు తెలుగు రాష్ట్రాల్లో ఈ సినిమా హక్కుల కోసం భారీ పోటీ నడవగా, ప్రముఖ నిర్మాణ సంస్థ సితార ఎంటర్‌టైన్‌మెంట్స్ ఈ రైట్స్‌ను దక్కించుకుంది. అయితే ఇక్కడ అందరినీ ఆశ్చర్యపరుస్తున్న విషయం ఏంటంటే.. సితార వారు పెట్టిన రేట్, ఈ సినిమా చేరుకోవాల్సిన టార్గెట్..!

ఈ లెక్కలు పూర్తిగా అర్థం కావాలంటే ముందుగా మనం జైలర్ మొదటి భాగాన్ని ఒకసారి గుర్తు చేసుకోవాలి. పార్ట్ 1 రిలీజ్ సమయానికి రజినీకాంత్ మునుపటి సినిమాల ఫలితాల దృష్ట్యా మార్కెట్‌లో కొంత సాధారణ అంచనాలే ఉన్నాయి. తెలుగు రాష్ట్రాల్లో దాదాపు 12 కోట్ల నుంచి 15 కోట్ల రూపాయల మధ్యలోనే థియేట్రికల్ బిజినెస్ జరిగింది. కానీ థియేటర్లలో సినిమా పడ్డాక సీన్ మొత్తం మారిపోయింది. అనిరుధ్ అదిరిపోయే బ్యాక్‌గ్రౌండ్ స్కోర్, నెల్సన్ టేకింగ్, తలైవర్ స్వాగ్ తోడు కావడంతో తెలుగు ప్రేక్షకులు బ్రహ్మరథం పట్టారు. చూస్తుండగానే కలెక్షన్ల వర్షం కురిసింది. రెండు తెలుగు రాష్ట్రాల నుంచే ఏకంగా 100 కోట్ల రూపాయల గ్రాస్ వసూళ్లు నమోదయ్యాయి. అంటే దాదాపు 45 కోట్ల నుంచి 50 కోట్ల మేర షేర్ కేవలం తెలుగు నుంచే వచ్చింది. పెట్టిన పెట్టుబడికి దాదాపు మూడు రెట్లకు పైగా లాభాలు తెచ్చిపెట్టి ట్రేడ్‌ను షేక్ చేసింది.

దీంతో ‘జైలర్ 2’పై ఉన్న క్రేజ్‌ను దృష్టిలో పెట్టుకుని సితార ఎంటర్‌టైన్‌మెంట్స్ అధినేత నాగవంశీ ఈ సినిమా తెలుగు రైట్స్‌ను ఫ్యాన్సీ రేటుకు దక్కించుకున్నారు. ఇండస్ట్రీ వర్గాల నుంచి అందుతున్న సమాచారం ప్రకారం, తెలుగు థియేట్రికల్ హక్కుల కోసం దాదాపు 45 కోట్ల రూపాయలకు పైగానే వెచ్చించారట. అంటే ఇక్కడ గమనించాల్సిన విషయం ఏంటంటే.. మొదటి పార్ట్ ఎంతైతే మొత్తం లాంగ్ రన్‌లో షేర్ వసూలు చేసిందో, ఇప్పుడు పార్ట్ 2 సరిగ్గా అంతే షేర్ సాధిస్తే తప్ప సేఫ్ జోన్‌లోకి రాలేదు. అప్పుడు ఫుల్ రన్‌లో సాధించిన మొత్తం కలెక్షనే ఇప్పుడు సినిమాకు కనీస బ్రేక్ ఈవెన్ టార్గెట్‌గా మారింది. 15 కోట్ల బిజినెస్ నుంచి ఏకంగా 45 కోట్ల పైచిలుకు వ్యాపారానికి వెళ్లడం అంటే మామూలు రిస్క్ కాదు.

అయితే ఈ టార్గెట్‌ను రజినీకాంత్ అందుకోవడం అసాధ్యమా అంటే.. కచ్చితంగా కాదు! ఎందుకంటే మొదటిది – ప్రస్తుతం సీక్వెల్‌పై ఉన్న హైప్ మొదటి పార్ట్ కంటే రెట్టింపు స్థాయిలో ఉంది. రెండోది – సితార ఎంటర్‌టైన్‌మెంట్స్ చేతిలో ఉండటం వల్ల తెలుగు రాష్ట్రాల్లో థియేటర్ల కేటాయింపు, ప్రమోషన్లు అత్యంత భారీ స్థాయిలో ప్లాన్ చేస్తారు. మూడోది – సినిమాకు ఏమాత్రం పాజిటివ్ టాక్ వచ్చినా మొదటి వీకెండ్‌లోనే సగం కలెక్షన్లు రాబట్టే సత్తా తలైవర్ బాక్సాఫీస్ మార్కెట్‌కు ఉంది. కానీ నాణేనికి మరోవైపు ఉన్న సవాళ్లను కూడా చూడాలి. సీక్వెల్స్ అంటేనే అంచనాలు భారీగా ఉంటాయి. ఏమాత్రం తేడా వచ్చినా ప్రేక్షకుల నుంచి వచ్చే ఫీడ్‌బ్యాక్ కఠినంగా ఉంటుంది. దీనితో పాటు ఈ సినిమా రిలీజ్ టైమ్‌కి ఉండే పోటీ కూడా కీలకం కానుంది. ఇతర భారీ చిత్రాల నుంచి గట్టి పోటీ ఎదురైతే థియేటర్లు, కలెక్షన్లపై ఆ ప్రభావం పడే అవకాశం ఉంటుంది. ఏదేమైనా, ట్రేడ్ వర్గాల్లో ‘జైలర్ 2’ తెలుగు డీల్ ఇప్పుడు పెద్ద సెన్సేషన్‌గా మారింది. నెల్సన్ దిలీప్‌కుమార్ తన స్క్రీన్‌ప్లేతో మరోసారి మ్యాజిక్ రిపీట్ చేస్తే ఈ 45 కోట్ల పైచిలుకు టార్గెట్‌ను దాటి సరికొత్త రికార్డులు సృష్టించడం రజినీకాంత్‌కు పెద్ద కష్టమేమీ కాదు.