Tollywood: టాప్ 20 రీ-రిలీజెస్ లోనూ 8 తెలుగు సినిమాలు

ఇప్పటి వరకూ తమిళ సినిమాలు ఒక్కటి కూడా వెయ్యి కోట్లు గ్రాస్ చూడలేకపోయింది. ఒకప్పుడు తెలుగు సినిమాల కంటే మిన్నగా ఉత్తరాదిన, జపాన్, శ్రీలంక, కొలంబియా వంటి దేశాల్లో తమిళ చిత్రాలే భలేగా సందడి చేశాయి. ఆ ఊపంతా ఇప్పుడు కనిపించడం లేదని టాలీవుడ్ జనం కోలీవుడ్ ను చూసి నవ్వుతూ ఉంటారు. ఈ నేపథ్యంలోనే ఒక్కటంటే ఒక్క వెయ్యి కోట్ల సినిమా చూడాలని తమిళ సినీజనం చాలా రోజులుగా తంటాలు పడుతూనే ఉన్నారు. ఇండియాలోనే తొలి వెయ్యి కోట్ల సినిమాగా చరిత్ర కెక్కింది 2017లో రిలీజైన 'బాహుబలి- ద కంక్లూజన్' (Bahubali). ఆ తరువాత 'ట్రిపుల్ ఆర్ (RRR), కల్కి 2898 ఏడి (Kalki 2898 AD), పుష్ప-2 (Pushpa 2)' చిత్రాలు సైతం వెయ్యి కోట్ల క్లబ్ లో చోటు సంపాదించాయి. ఇంత చరిత్ర కలిగిన టాలీవుడ్ మూవీస్ ను రీ-రిలీజెస్ లో కోలీవుడ్ పిక్చర్స్ అధిగమించడం విశేషంగా మారింది. అదే ఇప్పుడు తమిళ తంబీలకు ఆనందం కలిగిస్తోన్న అంశం. అయినా 'బాహుబలి' సిరీస్ ఘనవిజయం మాత్రం యావత్ భారతీయ సినీ ఫ్యాన్స్‌ కు మరపురాని అంశంగా నిలచింది.

ఇంతకూ రీ-రిలీజెస్ లో టాలీవుడ్ సినిమాలను కోలీవుడ్ మూవీస్ ఎలా అధిగమించాయి? రీ-రిలీజెస్ టాప్ టెన్ జాబితా తీసుకుంటే అందులో నంబర్ వన్ ప్లేస్ లో మళ్ళీ మన తెలుగు సినిమానే ఉంది. గత సంవత్సరం రాజమౌళి తన రెండు 'బాహుబలి' చిత్రాలను కలిపి 'బాహుబలి- ది ఎపిక్'గా విడుదల చేయగా, ఆ సినిమా అనూహ్యంగా వసూళ్ళు రాబట్టింది. ఈ చిత్రం రిపీట్ రన్ లో 60 కోట్ల రూపాయల గ్రాస్ చూసింది. ఇక టాప్ టెన్ రీ-రిలీజెస్ లో చోటు దక్కించుకున్న మరో తెలుగు చిత్రం మహేశ్ బాబు 'ఖలేజా'నే! ఈ మూవీ రిపీట్ రన్ లో 12 కోట్ల రూపాయలు పోగేసింది. అయితే టాప్ గ్రాసింగ్ రీ-రిలీజెస్ లో మాత్రం మూడు తమిళ చిత్రాలు చోటు దక్కించుకున్నాయి. 2024 ఏప్రిల్ 20న రీ-రిలీజైన విజయ్ 'గిల్లీ' చిత్రం 26 కోట్ల గ్రాస్ చూసింది. ఈ నాటికీ రీ-రిలీజైన తమిళ చిత్రాల్లో ఈ సినిమాదే పైచేయిగా ఉంది. దీని తరువాత గత సంవత్సరం రజనీకాంత్ బర్త్ డే కానుకగా రిలీజైన 'పడయప్పా' చిత్రం 19 కోట్ల గ్రాస్ సాధించింది. ఈ యేడాది జనవరి 23వ తేదీన అజిత్ కుమార్ 'మంగాత్త' రీ-రిలీజై 17.5 కోట్లు పోగేసింది. అలా మూడు తమిళ చిత్రాలు వసూళ్ళలో డబుల్ డిజిట్ సాధించాయి. మన తెలుగు సినిమాలు రెండే టాప్ టెన్ రీ-రిలీజెస్ లో ఉండడం గమనార్హం! ఆ తీరున టాలీవుడ్ మూవీస్ కంటే కోలీవుడ్ పిక్చర్స్ ఒక్క సినిమాతో పై చేయి సాధించడం నేడు విశేషంగా మారింది.

నీరు గారిన తమిళ తంబీల ఆనందం...

ఫస్ట్ రిలీజుల్లో తమ చిత్రాలు రికార్డులు సాధించక పోయినా, రీ -రిలీజ్ లో ఓ ఘనత సాధించాయని తమిళ తంబీలు ఆనందిస్తున్నారు. అయితే టాప్ 20 రీ-రిలీజెస్ ను తీసుకుంటే మళ్ళీ తెలుగువారిదే పైచేయి అనిపిస్తుంది. అందులో 'జల్సా, ఆర్య 2, మురారి, ఖుషి, సలార్, బిజినెస్ మేన్' వంటి చిత్రాలు కూడా ఉన్నాయి. వీటితో కలిపి టాప్ 20 రీ-రిలీజెస్ లో తెలుగు చిత్రాలు మొత్తం ఎనిమిది ఉన్నాయి. తమిళ సినిమాలు కేవలం నాలుగు మాత్రమే ఈ జాబితాలో చోటు సంపాదించాయి. మొత్తం టాప్ 20 రీ-రిలీజెస్ లో తెలుగు చిత్రాలదే మళ్ళీ పైచేయిగా కనిపిస్తోంది. ఈ జాబితాలో తెలుగు సినిమాలు 8, హిందీ చిత్రాలు 7, తమిళ మూవీస్ 4 ఉండగా ఒకే ఒక్క మళయాళ చిత్రం 'దేవదూతన్' 20వ స్థానంలో ఉంది. పాపం - తమిళ తంబీల ఆనందం ఆట్టే నిలవకుండా టాప్ 20లో అత్యధిక తెలుగు చిత్రాలు నిలవడం విశేషం!