అభిమాని కుమారుడికి రామ్ చరణ్ పేరు.. చిరంజీవి ఏం చేశారో తెలుసా

మెగా ఫ్యామిలీ హీరోలపై అభిమానులు చూపించే ప్రేమాభిమానాలు ఏ స్థాయిలో ఉంటాయో ప్రత్యేకంగా చెప్పాల్సిన అవసరం లేదు. అదే సమయంలో, తనను ఆరాధించే అభిమానులకు ఏదైనా అవసరమైనా, కష్టం వచ్చినా ‘నేనున్నాను’ అంటూ మెగాస్టార్ చిరంజీవి (Megastar Chiranjeevi) ముందుంటారు. అభిమానులను తన సొంత కుటుంబ సభ్యుల్లా చూసుకునే చిరంజీవి దార్శనికతకు నిదర్శనంగా తాజాగా మరొక అద్భుతమైన సంఘటన జరిగింది.

ప్రస్తుతం శరవేగంగా షూటింగ్ జరుపుకుంటున్న ‘మెగా158’ సెట్‌లో కెమెరా విభాగంలో పనిచేస్తున్న నివాస్ అనే టెక్నీషియన్ పనితీరును మెచ్చుకున్న చిరంజీవి, ఆయనతో సరదాగా ముచ్చటించారు. ఆ సంభాషణలో నివాస్ గురించి తెలుసుకుని చిరంజీవి ఆశ్చర్యపోయారు. నివాస్‌కు మెగా పవర్ స్టార్ రామ్ చరణ్ (Mega Power Star Ram Charan) అంటే ప్రాణం. ఆ వీరాభిమానంతోనే తన కుమారుడికి ‘జస్వంత్ రామ్ చరణ్’ (Jaswanth Ram Charan) అని పేరు పెట్టుకున్నట్లు తెలిసింది. అభిమానులు తమను ఎంతగా ఆత్మీయంగా ఓన్ చేసుకుంటున్నారో తెలుసుకుని ఎంతో సంతోషించిన చిరంజీవి, వెంటనే నివాస్ కుటుంబాన్ని తన ఇంటికి రావాల్సిందిగా స్వయంగా ఆహ్వానించారు.

ఇంటికి పిలిచారనే ఆనందంతో భార్యాపిల్లలతో కలిసి వెళ్లిన నివాస్ కుటుంబానికి అక్కడ మరొక బిగ్ సర్‌ప్రైజ్ లభించింది. స్వయంగా రామ్ చరణ్ కూడా అక్కడ ఉండటంతో నివాస్ కుటుంబ ఆనందానికి అవధులు లేకుండాపోయాయి. చిరంజీవి, రామ్ చరణ్ ఇద్దరూ నివాస్ ఫ్యామిలీతో ఎంతో ఆప్యాయంగా మాట్లాడి, వారితో ఫోటోలు దిగి చిరస్మరణీయమైన జ్ఞాపకాన్ని అందించారు. ఒక సాధారణ టెక్నీషియన్, అభిమానికి మెగాస్టార్, మెగా పవర్ స్టార్ ఇచ్చిన ఈ స్పెషల్ సర్‌ప్రైజ్ ఫోటోలు ప్రస్తుతం సోషల్ మీడియాలో వైరల్ అవుతున్నాయి. నివాస్ నిజంగా ఎంతో అదృష్టవంతుడంటూ మెగా అభిమానులు నెట్టింట కామెంట్లు వర్షం కురిపిస్తున్నారు.

ఇవి కూడా చదవండి:

డిప్యూటీ సీఎం అడిగారు.. ఈ సినిమా చేశా: కింగ్ నాగార్జున

నా ఫ్యాన్స్ అలా పచ్చబొట్టు వేయించుకోండి: శరత్ కుమార్

మూడు రోజుల్లో బ్రేక్ ఈవెన్.. కనకరాజు కుమ్మేశాడు