చిన్న సినిమాలకు న్యాయం జరిగే వరకు వెనక్కి తగ్గేది లేదు

తెలుగు సినీ పరిశ్రమలో చిన్న సినిమాలకు సరైన అవకాశాలు దక్కడం లేదంటూ ‘ఓ అందాల రాక్షసి’ దర్శకుడు, నటుడు షిరాజ్ మెహది తీవ్ర అసంతృప్తి వ్యక్తం చేశారు. చిన్న చిత్రాల మనుగడ, థియేటర్లలో స్క్రీన్ల కేటాయింపు, పరిశ్రమలో పెరుగుతున్న గుత్తాధిపత్య ధోరణులపై తాను గత కొంతకాలంగా పోరాటం చేస్తున్నానని తెలిపారు. ఈ క్రమంలోనే పలువురు సినీ ప్రముఖులు, ఫిల్మ్ ఛాంబర్ ప్రతినిధులు, మల్టీప్లెక్స్ సంస్థల నిర్వాహకులకు ఫైనల్ లీగల్ నోటీసులు పంపించినట్లు వెల్లడించారు.

షిరాజ్ మెహది మాట్లాడుతూ, చిన్న సినిమాలు విడుదలకు ముందే ఎన్నో అడ్డంకులు ఎదుర్కొంటున్నాయని ఆరోపించారు. పెద్ద సినిమాలకు లభిస్తున్న స్థాయిలో స్క్రీన్లు, ప్రచారం, వ్యాపార అవకాశాలు చిన్న చిత్రాలకు అందడం లేదని అన్నారు. వంద సినిమాలు విడుదలైతే వాటిలో కొద్ది చిత్రాలకే ప్రాధాన్యం దక్కుతోందని, మిగిలిన సినిమాలు ప్రేక్షకుల దృష్టికి చేరకుండానే కనుమరుగైపోతున్నాయని ఆవేదన వ్యక్తం చేశారు.

ఈ సమస్యలపై స్పందించాలని కోరుతూ ప్రముఖ నిర్మాతలు దిల్ రాజు, సురేష్ బాబు, తెలుగు ఫిల్మ్ ఛాంబర్ వైస్ ప్రెసిడెంట్లు నాగవంశీ, భరత్ భూషణ్, సెక్రటరీ అశోక్ కుమార్, ట్రెజరర్ ప్రసన్న కుమార్‌లకు నోటీసులు పంపినట్లు తెలిపారు. అలాగే PVR INOXకు చెందిన అజయ్ బిజిలీ, మేనేజర్ మహేష్, ఏసియన్ సినిమాస్ ఎండీ సునీల్ నారాజ్, మేనేజర్ ప్రశాంత్‌లకు కూడా ఫైనల్ లీగల్ నోటీసులు జారీ చేసినట్లు పేర్కొన్నారు.

‘ఓ అందాల రాక్షసి’ సినిమా విడుదల సమయంలో తగినన్ని షోలు కేటాయించలేదని షిరాజ్ ఆరోపించారు. హైదరాబాద్ వంటి నగరంలో కేవలం రెండు లేదా మూడు షోలతో ఒక చిన్న సినిమా విజయాన్ని ఎలా అంచనా వేస్తారని ప్రశ్నించారు. ప్రేక్షకులకు సినిమా చేరే అవకాశమే ఇవ్వకుండా నిర్ణయాలు తీసుకోవడం చిన్న చిత్రాలకు అన్యాయం చేస్తున్నట్లేనని అన్నారు.

చిన్న సినిమాల కోసం ప్రత్యేక వ్యాపార వ్యవస్థ అవసరమని షిరాజ్ అభిప్రాయపడ్డారు. ప్రతి చిన్న చిత్రానికి కనీసం ఒక ఓటీటీ వేదిక, ఒక శాటిలైట్ ఛానల్ అందుబాటులో ఉండేలా చర్యలు తీసుకోవాలని సూచించారు. ఇతర భాషల్లో అమలవుతున్న విధంగా సబ్సిడీలు, విక్రయ అవకాశాలు కల్పిస్తే చిన్న నిర్మాతలకు ఊరట లభిస్తుందని చెప్పారు. ఈ విషయంలో తెలుగు ఫిల్మ్ ఛాంబర్ కీలక పాత్ర పోషించాలని కోరారు.

తన ఆరోపణలు, న్యాయపరమైన చర్యలపై ఇప్పటివరకు సంబంధిత వ్యక్తులు బహిరంగంగా స్పందించకపోవడం ఆశ్చర్యకరమని షిరాజ్ అన్నారు. గత ఏడాదిగా పలు వేదికలపై ఈ అంశాన్ని ప్రస్తావిస్తున్నప్పటికీ ఎవరూ ముందుకు వచ్చి వివరణ ఇవ్వలేదని వ్యాఖ్యానించారు. పరిశ్రమలో కొందరు తమ హోదా, ప్రభావం ఆధారంగా వ్యవహరిస్తున్నారనే అభిప్రాయాన్ని వ్యక్తం చేశారు.

ఈ వ్యవహారంపై తెలంగాణ ముఖ్యమంత్రి రేవంత్ రెడ్డికి కూడా ఫిర్యాదు పంపించినట్లు షిరాజ్ వెల్లడించారు. చిన్న సినిమాల సమస్యలపై ప్రభుత్వం దృష్టి సారించాలని కోరినట్లు చెప్పారు. తన పోరాటం వ్యక్తిగత ప్రయోజనాల కోసం కాదని, భవిష్యత్‌లో కొత్త దర్శకులు, నిర్మాతలు ఇలాంటి ఇబ్బందులు ఎదుర్కోకుండా ఒక వ్యవస్థ ఏర్పడాలన్నదే లక్ష్యమని స్పష్టం చేశారు.

‘ఓ అందాల రాక్షసి’ సినిమాకు న్యాయం జరిగే వరకు వెనక్కి తగ్గేది లేదని షిరాజ్ మెహది తేల్చిచెప్పారు. చిన్న సినిమాలకు సమాన అవకాశాలు దక్కే వాతావరణం ఏర్పడే వరకు తన న్యాయపోరాటం కొనసాగుతుందని పేర్కొన్నారు. ఈ అంశంపై సినీ పెద్దలను ప్రశ్నించాలని, చిన్న చిత్రాల సమస్యలను మరింత బలంగా వెలుగులోకి తీసుకురావాలని మీడియాకు కూడా ఆయన విజ్ఞప్తి చేశారు.