Tollywood Heroes: బంగారం సార్.. మా టాలీవుడ్ హీరోలు
ABN , Publish Date - Nov 29 , 2025 | 12:50 PM
టాలీవుడ్ హీరోల గురించి తెలుగు ప్రేక్షకులకు ప్రత్యేకంగా చెప్పాల్సిన అవసరం లేదు.వారు ఎప్పుడు తమ స్వార్థం తాము చూసుకొనే వారు కాదు అని చాలా సార్లు నిరూపించారు.
Tollywood Heroes: టాలీవుడ్ హీరోల గురించి తెలుగు ప్రేక్షకులకు ప్రత్యేకంగా చెప్పాల్సిన అవసరం లేదు.వారు ఎప్పుడు తమ స్వార్థం తాము చూసుకొనే వారు కాదు అని చాలా సార్లు నిరూపించారు. తమను ఆరాధించే ప్రేక్షకుల కోసం అవసరం వచ్చినప్పుడు వారు కూడా తమ వంతు సాయం చేస్తూనే వస్తున్నారు. ఇక గత కొన్నిరోజులుగా ఐ బొమ్మ రవి పోలీసుల అదుపులో ఉన్న విషయం తెల్సిందే. అతనిని చాలామంది రాబిన్ హుడ్ తో పోలుస్తున్నారు. హీరోలు ఎక్కువ రెమ్యూనరేషన్స్ తీసుకోవడం ఆపితే టికెట్ రేట్లు తగ్గుతాయి. అప్పుడు ఏ బొమ్మతో పనిలేకుండా థియేటర్ కి వెళ్లి చూడొచ్చు. అలాంటివి హీరోలు చేయరు అని విమర్శించారు.
తాజాగా ఆంధ్రా కింగ్ తాలూకా సినిమా ప్రెస్ మీట్ లో మైత్రీ మూవీ మేకర్స్ అధినేతల్లో ఒకరైన రవి శంకర్ కు ఒక జర్నలిస్ట్ ఇదే ప్రశ్న వేశాడు. తెలుగులో నిర్మాతకి అండగా ఉండే హీరోస్ ఉన్నారా.. ? అన్న ప్రశ్నకు రవి శంకర్ ఉన్నారని, టాలీవుడ్ హీరోలు అందరూ మంచి మనసు ఉన్నవారిని ఉదహరణలతో సహా చెప్పుకొచ్చాడు. చిరంజీవి దగ్గర నుంచి ఎన్టీఆర్, ప్రభాస్, మహేష్ బాబు, రామ్ చరణ్, పవన్ కళ్యాణ్, రామ్ ఇలా ఎంతమంది టాలీవుడ్ హీరోలు నిర్మాతలకుఅండగా ఉన్నారని చెప్పుకొచ్చాడు.
రామ్ చరణ్ రంగస్థలం సినిమా డబ్బులు రెండేళ్ల వరకు తీసుకుంటూనే ఉన్నాడు. అప్పుడప్పుడు 20 లక్షలు, 25 లక్షలు అడిగి తీసుకుంటుండేవాడు. రూ. 4 కోట్లు బ్యాలెన్స్ ఆయన చేతికి చేరడానికి రెండేళ్లు పట్టింది. అలానే మహేష్ బాబు సర్కారు వారి పాట సినిమా డబ్బులు ఏడాది తరువాత తీసుకున్నారు. చిరంజీవి.. వాల్తేరు వీరయ్యకు అలానే తీసుకున్నారు. రవితేజ, ఎన్టీఆర్, అల్లు అర్జున్, ప్రభాస్ వారు కూడా అంతే.. వారి పారితోషికాలు వారి చేతికి చేరడానికి రెండేళ్లు పట్టింది. రామ్.. ఆంధ్రా కింగ్ తాలూకా సినిమాకు అసలు రెమ్యూనరేషన్ తీసుకోలేదు. కథపై ఉన్న నమ్మకంతో రెండు ఏరియాల హక్కులు తీసుకున్నాడు. ఎన్టీఆర్ అయితే ఎప్పుడు ఉంటే అప్పుడు ఇవ్వండి అంటాడు. వీరందరూ ఒక ఎత్తు అయితే పవన్ కళ్యాణ్ ది మరో ఎత్తు. ఆయన అయితే ఏకంగా మీకు మిగిలితే ఇవ్వండి.. లేకపోతే లేదు అని చెప్తారని చెప్పుకొచ్చాడు. ఇక ఇదంతా విన్నాకా.. ఫ్యాన్స్ అందరూ.. బంగారం సార్.. మా హీరోలు అని చెప్పుకొస్తున్నారు.