Rahul Ravindran: మంగళ సూత్రంపై కామెంట్లు.. రాహుల్‌ను ఆడుకుంటున్న నెటిజన్లు
ABN , Publish Date - Nov 05 , 2025 | 10:21 AM
దర్శకుడు రాహుల్ రవీంద్రన్ భార్య చిన్మయి మంగళ సూత్రం ధరించడంపై చేసిన వ్యాఖ్యలు సోషల్ మీడియాలో పెద్ద చర్చగా మారాయి.
‘అందాల రాక్షసి’తో హీరోగా, చి ల సౌ సినిమాతో ద‌ర్శ‌కుడిగా మంచి పేరు సంపాదించుకున్న రాహుల్ రవీంద్రన్ (Rahul Ravindran) ఇటీవల మంగళ సూత్రం విష‌యంలో చేసిన కామెంట్లు పెద్ద ర‌చ్చ చేస్తున్నాయి. చూస్తూ ఉంటే స‌మ‌స్య అంత‌కంత‌కు పెరిగేలానే ఉంది. ఇప్ప‌టికే ఆయ‌న భార్య, గాయ‌ని చిన్మయి (Chinmayi Sripaada) త‌రుచూ ప‌లు కామెంట్ల‌తో నిత్యం వార్త‌ల్లో నిలుస్తూ ఉన్న సంగ‌తి తెలిసిందే. ఆ ఇష్యూలు అలా ఉండ‌గానే ఇప్పుడు రాహుల్ మాట్లాడిన మాట‌లు పెద్ద దుమార‌మే రేపుతున్నాయి.
విష‌యానికి వ‌స్తే.. గీతా ఆర్ట్స్ స‌మ‌ర్ప‌ణ‌లో రష్మిక మందన్నా (Rashmika Mandanna) కథానాయికగా రాహుల్ రవీంద్రన్ (Rahul Ravindran) తెర‌కెక్కించిన చిత్రం ‘ది గర్ల్‌ఫ్రెండ్’ (The Girlfriend) మ‌రో రెండు రోజుల్లో (నవంబర్ 7న) విడుదల కానుంది. ఈ సినిమా ప్రమోషన్స్‌లో బిజీగా ఉన్న రాహుల్, ఇటీవల ఓ మీడియాకు ఇచ్చిన ఇంటర్వ్యూలో చేసిన వ్యాఖ్యలు ఇప్పుడు సోషల్ మీడియాలో వైర‌ల్‌గా మారాయి.
రాహుల్ మాట్లాడుతూ..పెళ్లి తర్వాత మహిళలు తప్పనిసరిగా మంగళసూత్రం ధరించాలనే ఆచారాన్ని నేను సమర్థించను. అది పూర్తిగా నా భార్య చిన్మయి ఇష్టం. నేను ఎప్పుడూ ఆమెపై బలవంతం చేయలేదు. ఒక మహిళ మెడలో తాళి ఉంటేనే ఆమె పెళ్లయిందని ఎందుకు గుర్తించాలి? మగవాడికి అలాంటి గుర్తు ఉండదు కదా? ఇది లింగ వివక్షలోకి వస్తుంది. సమాన హక్కులు రావాలంటే ఇలాంటి పాత ఆచారాలను ప్రశ్నించాలి” అని చెప్పారు.
ఈ వ్యాఖ్యలు వైరల్ అవ్వడంతో సోషల్ మీడియాలో విపరీతమైన స్పందన వస్తోంది. కొంతమంది నెటిజన్లు రాహుల్–చిన్మయి దంపతులను తీవ్రంగా విమర్శిస్తున్నారు. నీ భార్య తాళి వేసుకోదు.. నువ్వు జంధ్యం వేసుకున్నావా?, హిందూ సంప్రదాయాలను ఎందుకు అవమానిస్తున్నావు? అంటూ కామెంట్లు చేస్తున్నారు. మరికొందరు మాత్రం రాహుల్ అభిప్రాయాన్ని సమర్థిస్తూ.. “ప్రతి ఒక్కరికీ తమ ఆలోచన స్వేచ్ఛ ఉంది. సమాజం మారాలంటే ఇలాంటి అభిప్రాయాలు రావాలి అని చెబుతున్నారు.
ఇక చిన్మయి కూడా తన భర్తకు మద్దతుగా స్పందించింది. ఒక నెటిజన్ మంగళసూత్రం స్త్రీకి భద్రత ఇస్తుందని రాయగా, చిన్మయి సమాధానంగా.. మంగళసూత్రం లైంగిక దాడులు లేదా వేధింపులను ఆపలేదు. పుట్టిన పిల్లలపైనా దారుణాలు జరుగుతున్నాయి కదా అప్పుడు తాళి ఎలా రక్షిస్తుంది?అని కౌంటర్ ఇచ్చింది. ఈ వ్యాఖ్యలతో రాహుల్–చిన్మయి దంపతులపై సోషల్ మీడియాలో చర్చ కొనసాగుతోంది. కొందరు సాంప్రదాయాలను తక్కువ చేసి చూపుతున్నారు అంటుండగా, మరికొందరు వాళ్లు చెప్పింది ఆలోచించాల్సిన విషయమ‌ని అంటున్నారు.
‘ది గర్ల్‌ఫ్రెండ్’ సినిమా రిలీజ్‌కు కేవలం కొన్ని రోజులే ఉండగా, ఈ వివాదం సినిమాపై ప్రభావం చూపే అవకాశం ఉందని సినీ వర్గాలు చెబుతున్నాయి. రిలీజ్ టైమ్‌లో ఇలాంటి సున్నితమైన విషయాలపై వ్యాఖ్యలు చేయడం రిస్క్ అని విశ్లేషకులు అభిప్రాయ పడుతున్నారు.