Nuvvu Naaku Nachav: నవ్వులు పూయిస్తూ.. న్యూ ఇయర్ మరింత స్పెషల్ గా 

వెంకటేష్ (Venkatesh) కెరీర్లో  సూపర్ హిట్ చిత్రాల్లో ఒకటైన 'నువ్వు నాకు నచ్చావ్' (Nuvvu Naaku Nachavu)మరోసారి ప్రేక్షకుల ముందుకు రానుంది. 2001లో వచ్చిన ఈ చిత్రం రాబోతున్న కొత్త సంవత్సరంలో ప్రేక్షకుల్ని చిల్ చేయడానికి  పూర్తి సాంకేతిక హంగులతో 4 కె లో రీ రిలీజ్ కు  సిద్ధం అయ్యింది. అయితే ఈసారి ఓ ప్రత్యేకత ఉంది.  అప్పట్లో ఈ సినిమా విదేశాల్లో పూర్తి స్థాయిలో రిలీజ్ కాలేదు. ఆ లోటుని తీర్చడం కోసం కూడా ఈ సినిమా జనవరి 1 న ప్రపంచ వ్యాప్తంగా విడుదల కానుంది. 'నువ్వే కావాలి’ వంటి బ్లాక్ బస్టర్ తర్వాత విజయ భాస్కర్- త్రివిక్రమ్ ఫుల్ జోష్ తో చేసిన సినిమా ఇది. కోటి సంగీతం, సిరివెన్నెల- భువన చంద్ర ల సాహిత్యం ఎవర్ గ్రీన్. ఆర్తి అగర్వాల్ ఇప్పుడు మన మధ్య లేకపోయినా, ఎప్పటికీ గుర్తుండి పోతారు. ప్రకాష్ రాజ్, బ్రహ్మానందం, సునీల్, చంద్ర మోహన్, ఎం ఎస్ నారాయణ.. ఇలా చెప్పుకుంటూ పోతే అందరివీ గుర్తుండిపోయే పాత్రలే. 

ఈ సినిమా గురించి నిర్మాత ‘స్రవంతి’ రవికిశోర్ మాట్లాడుతూ 'తెలుగు సినిమా చరిత్రలో ఓ మైలురాయి అయిన 'నువ్వు నాకు నచ్చావ్' ఇప్పుడు 4K లో తిరిగి థియేటర్లలోకి వస్తోంది. ఇది కేవలం రీ-రిలీజ్ కాదు. జనవరి 1, 2026 – కొత్త సంవత్సరాన్ని కుటుంబంతో కలిసి నవ్వులు పూయిస్తూ ప్రారంభించడానికి ఇదే సరైన సమయం. 25 ఏళ్లుగా రకరకాల మాధ్యమాల్లో ఆస్వాదిస్తున్న ఈ అనుభూతిని ఇప్పుడు థియేటర్ల లో సంపూర్ణంగా ఆస్వాదించండి. ఈ సినిమా షూటింగ్ 87 రోజులు జరిగింది. ప్రతి రోజూ నాకు గుర్తుంది. ఎక్కడ ఏమేం తీశామో, ఎలా తీశామో, ఒక టీమ్ వర్క్ లాగా ఎంత ఇష్టపడి పని చేశామో అన్నీ గుర్తున్నాయి అని చెప్పారు.