మూడు భాషల్లో ఒకేసారి దృశ్యం 3

‘దృశ్యం’ ఫ్రాంచైజీకి ఉన్న ప్రేక్షకాదరణ గురించి తెలిసిందే. ఇప్పటికే మాతృక (మలయాళ వెర్షన్‌) ఆధారంగా తెలుగు, హిందీలో రీమేక్‌ అయిన రెండు భాగాలూ సూపర్‌హిట్‌ అయ్యాయి. ఇటీవలె ‘దృశ్యం 3’ సిద్ధమవుతోందని ప్రకటించారు మలయాళ దర్శకుడు జీతూ జోసెఫ్‌. అప్పటినుంచి ఈ సినిమా గురించిన ఓ వార్త చక్కర్లు కొడుతోంది. అదేంటంటే.. మలయాళంలో తెరకెక్కనున్న పార్ట్‌ 3 కథ వేరు.. హిందీలో రూపొందే చిత్ర కథాంశం వేరు.. అని. ఈ నేపథ్యంలో ‘దృశ్యం 3’ గురించి కీలక అప్‌డేట్‌ ఇచ్చారు దర్శకుడు జీతూ జోసెఫ్‌. ‘‘దృశ్యం 3’ని ఒకే కథతో తెలుగు, మలయాళ, హిందీ భాషల్లో తెరకెక్కిస్తాం. మలయాళ, హిందీ, తెలుగు భాషల్లో ఒకేసారి చిత్రీకరణ జరపడం కుదరకపోవచ్చు.. కానీ, మూడు భాషల్లోనూ ఒకే రోజున విడుదల చేస్తాం. ప్రస్తుతం స్కిప్ట్‌ వర్క్‌ జరుగుతోంది. పూర్తయ్యాక హిందీ టీమ్‌కు అందిస్తాం.. అక్కడ పరిస్థితులకు తగినట్లుగా మేకర్స్‌ మార్పులు చేస్తారు’’ అని చెప్పారు. తెలుగులో పార్ట్‌ 3లో వెంకటేశ్‌ నటిస్తున్నారా లేదా అనేది అధికారికంగా తెలియాల్సి ఉంది. కాగా, తొలి రెండు భాగాల్లో మలయాళ వెర్షన్‌లో కథానాయకుడిగా మోహన్‌లాల్‌, తెలుగులో వెంకటేశ్‌, హిందీలో అజయ్‌ దేవగణ్‌ నటించారు. మలయాళంలో రెండు భాగాలకూ జీతూ జోసెఫ్‌ దర్శకుడు. తెలుగులో, హిందీలో దర్శకులు మారారు.