Director SJ shiva: నిర్మాతల డబ్బు విరాళంగా మారుతోంది

హారర్ థ్రిల్లర్ తో పాటు ఎంటర్ టైన్ మెంట్, ఎమోషన్ ఉన్న సినిమా ‘బకాసుర రెస్టారెంట్ (Bakasura restaurant). ఇందులో  కమెడియన్ ప్రవీణ్ (Praveen) ప్రధాన పాత్ర పోషించారు. వైవా హర్ష టైటిల్ రోల్లో కనిపించనున్నారు.  కృష్ణభగవాన్ ,షైనింగ్ ఫణి, కేజీఎఫ్ గరుడరామ్ ఇతర ముఖ్య పాత్రలు పోషించిన ఈ మూవీని ఎస్జే మూవీస్ పతాకంపై లక్ష్మయ్య ఆచారి, జనార్థన్ ఆచారి నిర్మిస్తున్నారు. ఆగస్టు 8న ప్రపంచ వ్యాప్తంగా రిలీజ్ కాబోతున్న సందర్భంగా దర్శకుడు ఎస్జే శివ (Sj Shiva) తో జరిపిన ఇంటర్వ్యూ.

 
సినిమా కథాంశం…
'బకాసుర రెస్టారెంట్' యమలీల, ఘటోత్కచుడులా ఆడియన్స్ థ్రిల్ కి గురి చేస్తుందంటున్నారు దర్శకుడు ఎస్.జె. శివ. రెస్టారెంట్ పెట్టాలనుకునే 5గురు ఫ్రెండ్స్  జీవితంలోకి ఓ తిండిబోతు దెయ్యం వస్తే వారు తిప్పలు ఎలా ఉంటాయి? వారు రెస్టారెంట్ పెట్టగలిగారా లేదా అనేది ఈ సినిమా కథ అంటున్నారాయన. తెలుగులో ఎన్నో జోనర్లు వచ్చాయి. ఇదొక కొత్త జోనర్. మా సినిమాతోనే ఇంట్రడ్యూస్ చేస్తున్నాం. తిండిబోతు కథ నుంచి వచ్చే కామెడీ కావటంతో హంగర్ కామెడీ అంటున్నాం. నమ్మి  థియేటర్ కి వచ్చే ప్రేక్షకులను ఎంటర్టైన్ చేయడమే మా లక్ష్యం.

 
ప్రవీణ్ లీడ్ రోల్ కి కారణం..
ముందు వేరే హీరోలతో డిస్కస్ చేశాం. కానీ అందరూ సోలో హీరో కథలైతే చేస్తామని అన్నారు. అయితే ఈ కథ అలాంటిది కాదు. ఆ సమయంలో ప్రవీణ్ కూడా హీరోగా ఇంట్రడ్యూస్ అయ్యే ప్లాన్ లో  ఉండటంతో కలసి కథ చెప్పాం. కథే హీరో.. తప్పకుండా చేద్దామని చేశాడు.

 
మీ నేపథ్యం…
లండన్లో ఇంటర్నేషనల్ బిజినెస్ మేనేజ్మెంట్ కోర్సు పూర్తిచేశాను. ‘విరూపాక్ష’ చిత్రానికి అసిస్టెంట్ దర్శకుడిగా కూడా చేశా. గతంలో మా నాన్న గారు కొన్ని సినిమాలు తీశారు. ఆయన కోరిక మేరకు నేను దర్శకుడిగా, మా అన్నయ్య నిర్మాతగా మారాడు.

 

పూర్తిగా ‘బకాసుర రెస్టారెంట్’లో జరిగే కథనా…
రెస్టారెంట్ పెట్టడం వరకే కథ. రెస్టారెంట్ పెట్టాలని కలలు కనే ఓ యువకుడి కథ ఇది. ఈ అంశానికి హారర్, థ్రిల్లింగ్, ఎంటర్టైన్మెంట్, ఎమోషన్ అంశాలు జోడించాం. ఇదొక క్లీన్ కామెడీ ఎంటర్ టైనర్. అందరూ ఫ్యామిలీతో కలిసి చూడదగ్గ చిత్రం.

 
ఇదొక ప్రయోగం అనుకోవచ్చా?
నిజమే… ఇదొక కొత్త జానర్తో పాటు కమర్షియల్ ఎక్స్పర్మెంట్ అనుకోవచ్చు. గతంలో వచ్చిన ‘యమలీల, ఘటోత్కచుడు’లా ఆడియన్స్ థ్రిల్ ఫీలయ్యే కథ. ఇలాంటి కొత్త కథలనే జనాలు ఆదరిస్తారని నమ్ముతున్నాం. సినిమా మొత్తం కంప్లీట్ ప్యాకేజీలా ఉంటుంది.

 
దిల్ రాజు పంపిణీ చేస్తున్నారట…
అవును... శిరీష్ సినిమా చూసి మెచ్చుకున్నారు. ఈ సినిమా కథ గురించి ఆయన మాతో పలు మార్లు చర్చించారు. ఎస్వీసీ లాంటి సంస్థ ఈ సినిమాను విడుదల చేయడం ఎంతో ఆనందంగా ఉంది.

స్టార్స్ లేకుండా ఇంత బడ్జెట్ వర్కవుట్ అవుతుందా…  
కథను నమ్మి చేశాం. పెద్ద హీరోలను పెట్టినా రిటర్న్స్ వస్తాయని గ్యారంటి లేని రోజులివి. పెద్ద హీరోకు ఇవ్వాల్సిన పారితోషికం మేకింగ్లో పెట్టాం. క్వాలిటీగా సినిమా తీశాం. కంటెంట్ బాగున్న సినిమాలను ఆదరిస్తారని ‘కమిటీ కుర్రాళ్లు’, ‘ఓయ్’, ‘కోర్టు’లాంటి సినిమాలు నిరూపించాయి కదా…. మా సినిమా చూసిన వారికి తమ బ్యాచ్లర్ లైఫ్ తప్పకుండా గుర్తుకు వస్తుంది.

 
మీ తొలి సినిమా అనుభవం ఎలా ఉంది?
సినిమా తీయడం చాలా కష్టం.... ఇక్కడ  ఎవరు కథ ఏమిటి? ఎలా ఉంటుంది అని అడగటం లేదు…  ప్యాడింగ్ ఎవరు? ఎంత ఖర్చు పెట్టారు? ఎంత ఆశిస్తున్నారని అడుగుతున్నారు. సినిమా అనేది ఎంటర్టైన్మెంట్… కానీ దాని గురించి తప్ప అన్నీ అడగటం ఆశ్చర్యం కలుగుతోంది.

సినిమా ఇండస్ట్రీలో కొనసాగుతారా!?
నాకు విఠలాచార్య గారి సినిమాలు అంటే ఇష్టం. ఆ తరహా కథలతో సినిమాలు తీయాలని వుంది. ప్రస్తుతం నా వద్ద ఓ ఫ్యాక్షన్ యాక్షన్ ఎంటర్టైనర్ కథ ఉంది. త్వరలోనే దానికి సంబంధించిన వివరాలు తెలియచేస్తాం. ఇక మా ఎస్జే బ్యానర్లో కొత్త దర్శకులకు మాత్రమే అవకాశం. సో.. నా తదుపరి చిత్రం ఇందులో ఉండదు.

 
‘బకాసుర రెస్టారెంట్’ పార్ట్-2 ఉంటుందా?
లేదు.. ఎందుకంటే బకాసుర పాత్రఈ పార్ట్లోనే ఎండ్ అవుతుంది.

 
దర్శకుడిగా మీ గోల్!?
చాలా తక్కువ వర్కింగ్ డేస్ లో సినిమాలు చేయాలి. ఈ విషయంలో పూరీ గారు నాకు ఆదర్శం. ప్రస్తుతం నిర్మాతల డబ్బు విరాళంగా మారిపోతుందనేది నా ఫీలింగ్. అలా కాకుండా ఓ పద్దతి ప్రకారం ఖర్చు పెట్టాలి. అప్పుడూ అందరూ బాగుంటారు. మా ‘బకాసుర రెస్లారెంట్’ ను ఐదు కోట్లతో తీసినా 12 కోట్ల అవుట్పుట్ కనిపిస్తుంది.