Chiranjeevi: ప్రియమైన లాలెట్టన్‌.. హృదయపూర్వక అభినందనలు

మలయాళ స్టార్‌ హీరో, లాలేట్టన్‌ (Lalettan) అని అభిమానులు ఎంతో ప్రేమగా పిలుచుకునే మోహన్‌లాల్‌ను (Mohan Lal) దాదాసాహెబ్‌ ఫాల్కే (Dadasaheb Phalke Award) పురస్కారం వరించింది. నటుడు, దర్శకనిర్మాతగా సినీ పరిశ్రమకు చేసిన సేవలకుగానూ కేంద్ర ప్రభుత్వం ఈ పురస్కారానికి ఎంపిక చేసింది. సెప్టెంబర్‌ 23న 71వ జాతీయ ఫిల్మ్‌ అవార్డుల ప్రదానోత్సవంలో మోహన్‌లాల్‌ను భారత ప్రభుత్వం  దాదాసాహెబ్‌ పురస్కారంతో సత్కరించబోతోంది.  మలయాళంలోనే కాకుండా ప్రధాన భారతీయ భాషల్లోనూ పలు చిత్రాల్లో నటించిన మోహన్‌లాల్‌ను ఈ అవార్డుకు ఎంపిక చేయడంపై అభిమానులు, సినీ సెలబ్రిటీలు హర్షం వ్యక్తం చేస్తున్నారు.

తాజాగా టాలీవుడ్‌ మెగాస్టార్‌ చిరంజీవి (Chiranjeevi) మోహన్‌లాల్‌ను అభినందిస్తూ సోషల్‌ మీడియా వేదికగా స్పందించారు. ‘నా ప్రియమైన లాలెట్టన్‌, ప్రతిష్టాత్మక దాదాసాహెబ్‌ ఫాల్కే అవార్డు వరించినందుకు హృదయపూర్వక అభినందనలు. మీ అద్భుతమైన ప్రయాణం, ఐకానిక్‌ పెర్ఫార్మెన్స్‌ భారతీయ సినిమాను సుసంపన్నం చేశాయి. నిజంగా ఇది మీకు తగిన గుర్తింపు’ అని పేర్కొన్నారు. అంతేకాదు మోహన్‌లాల్‌తో ఉన్న ఫోటోని షేర్‌ చేశారు. చిరంజీవికి, మోహన్‌లాల్‌కు మంచి అనుబంధం ఉన్న సంగతి తెలిసిందే. ప్రస్తుతం ట్వీట్‌ సోషల్‌ మీడియాలో వైరల్‌ అవుతోంది.