Bigg Boss 9: సాయి శ్రీనివాస్ ఎలిమినేట్.. ఫైనల్ రేస్‌పై క్లారిటీ!

బిగ్ బాస్ తెలుగు సీజన్ 9లో ఆదివారం ప్రసారమైన ఎపిసోడ్ మొత్తం డ్రామా, ఎమోషన్, సస్పెన్స్‌లతో నిండిపోయింది. రాము రాథోడ్ స్వయంగా హౌస్‌ను వీడిన తర్వాత మరో ఎలిమినేషన్ జరగడం హౌస్‌మేట్స్‌కు షాక్ ఇచ్చింది. వైల్డ్‌కార్డ్ కంటెస్టెంట్‌గా ఎంట్రీ ఇచ్చిన సాయి శ్రీనివాస్ ఈ వారం బిగ్ బాస్ హౌస్ నుండి ఎలిమినేట్ అయ్యాడు. ప్రేక్షకుల ఓటింగ్ ప్రకారం బాటమ్‌లో ఉన్న సాయి ఈ సీజన్‌కు గుడ్‌బై చెప్పాల్సి వచ్చింది. ఈ వారం దివ్య, సుమన్ శెట్టి బిగ్ బాస్ ఇచ్చిన సీక్రెట్ టాస్క్‌లతో హౌస్‌లో సరదాగా అల్లరి చేశారు. పాల ప్యాకెట్ల దొంగతనం తర్వాత అమాయకంగా నటిస్తూ సుమన్ శెట్టి హౌస్‌మేట్స్‌ను మోసం చేసిన విధానం అందరినీ నవ్వుల్లో ముంచెత్తింది.

నాగార్జున కూడా ఆ వీడియోలను ప్రదర్శిస్తూ “ఇదే అసలైన ఎంటర్‌టైన్‌మెంట్” అంటూ సుమన్ శెట్టిని ప్రశంసించారు.నాగార్జున కంటెస్టెంట్స్‌ను ఒక్కొక్కరిని పిలిచి “టైటిల్ గెలవడానికి ఎవరు దగ్గరగా ఉన్నారు?” అని అడిగారు. అందరి అభిప్రాయాల ప్రకారం తనూజ, ఇమ్మాన్యుయేల్ ఇద్దరు టైటిల్ రేస్‌లో బలమైన కాంపిటెంట్స్‌గా నిలిచారు. వీరిద్దరికీ తలా ఐదు ఓట్లు రావడం గమనార్హం. అదే సమయంలో భరణి, సాయి ఎలిమినేషన్ జోన్‌లో ఉన్నారని అందరూ పేర్కొన్నారు.

గార్డెన్ ఏరియాలో ఏర్పాటు చేసిన స్పెషల్ టాస్క్‌లో భరణి, సాయి మధ్య టఫ్ కాంపిటిషన్ నడిచింది. ఇద్దరి ముందు పెట్టిన బొమ్మ ట్రైన్స్‌లో ఎవరి ట్రైన్ ఆగిపోతే ఆ కంటెస్టెంట్ ఎలిమినేట్ అవుతారని నాగార్జున తెలిపారు. చివరికి సాయి ట్రైన్ ఆగిపోవడంతో అతను హౌస్‌ను వీడాల్సి వచ్చింది.తనూజ వద్ద ఉన్న గోల్డెన్ బజర్‌ను ఉపయోగిస్తే సాయి సేఫ్ అవుతాడు, భరణి ఎలిమినేట్ అవుతాడని నాగార్జున ప్రకటించారు. కానీ తనూజ ఆ అవకాశాన్ని వదులుకోవడంతో సాయి హౌస్‌కు గుడ్‌బై చెప్పాడు.

ఈ ఎపిసోడ్‌తో బిగ్ బాస్ సీజన్ 9లో ఫైనల్ రేస్‌పై స్పష్టత వచ్చింది అని నెటిజన్లు అభిప్రాయపడుతున్నారు. నాగార్జున మాటల ప్రకారం తనూజ, ఇమ్మాన్యుయేల్ ఫైనలిస్టులుగా ఉండే సూచనలున్నాయని భావిస్తున్నారు. మొత్తంగా ఈ వారాంతం ఎపిసోడ్ బిగ్ బాస్ తెలుగు సీజన్ 9లో అత్యంత ఉత్కంఠభరితమైన ఎపిసోడ్‌గా నిలిచింది.