Balakrishna: డిసెంబర్ 21.. బాల‌య్య! విడ‌దీయ‌రాని బంధం

ప్రస్తుతం 'అఖండ-2-తాండవం'తో జనాన్ని అలరిస్తున్న నటసింహ బాలకృష్ణ (Nandamuri Balakrishna) జీవితంలో డిసెంబర్ 21కి ఓ ప్రత్యేక స్థానం ఉంది. ఆ తేదీన బాలయ్య హీరోగా కె.రాఘవేంద్రరావు దర్శకత్వంలో రూపొందిన రామకృష్ణా సినీస్టూడియోస్ మూవీ 'పట్టాభిషేకం' విడుదలయింది. 1985 డిసెంబర్ 21న విడుదలైన పట్టాభిషేకం (Pattabhishekam) చిత్రం అప్పట్లో భారీ ఓపెనింగ్స్ చూసింది. ఆ యేడాది అంతటి వసూళ్ళు చూసిన 'పట్టాభిషేకం' ప్రేమకథా చిత్రంగా రూపొందింది. ఇందులో బాలకృష్ణ సరసన విజయశాంతి (Vijayashanti) నాయికగా నటించారు. ఈ చిత్రానికి చక్రవర్తి సంగీతం ఓ ఎస్సెట్ కాగా, ఇందులో శ్రీకృష్ణుని గెటప్ లో బాలయ్య ఓ పాటలో కనిపించి అభిమానులకు ఆనందం పంచారు. అలా నలభై ఏళ్ళ క్రితం 'పట్టాభిషేకం' బాలయ్య ఫ్యాన్స్ ను మురిపించింది.

'పట్టాభిషేకం' విడుదలయిన ఐదు సంవత్సరాలకు అంటే 1990 డిసెంబర్ 21వ తేదీన బాలకృష్ణ హీరోగా రూపొందిన లారీ డ్రైవర్ (Lorry Driver) విడుదలై విజయఢంకా మోగించింది. ఇందులోనూ విజయశాంతి నాయికగా నటించడం విశేషం! 'లారీడ్రైవర్'తోనే బాలయ్యతో తొలిసారి బి.గోపాల్ చిత్రం తెరకెక్కించారు. డిసెంబర్ 21వ తేదీన రిలీజైన బాలయ్య తొలి చిత్రం 'పట్టాభిషేకం'కు కె.రాఘవేంద్రరావు దర్శకుడు కాగా, అదే తేదీన ఐదేళ్ళకు వచ్చిన 'లారీ డ్రైవర్'కు ఆయన శిష్యుడు బి.గోపాల్ డైరెక్టర్ కావడం విశేషం!. ఈ రెండు చిత్రాల్లోనూ విజయశాంతి నాయికగా నటించి మురిపించగా, రెండు సినిమాలూ చక్రవర్తి స్వరకల్పనలోనే రూపొందాయి. ఈ రెండు మూవీస్ కు పరుచూరి బ్రదర్స్ రచయితలు కావడం గమనార్హం! 'లారీ డ్రైవర్'లో బాలయ్య ఫ్యాన్స్ ను మురిపించే పాటలు చోటు చేసుకున్నాయి.

'పట్టాభిషేకం' చిత్రానికి బాలయ్య అన్న నందమూరి హరికృష్ణ నిర్మాత కాగా, 'లారీ డ్రైవర్' సినిమాకు రావు గోపాలరావు సమర్పకుడు. ఈ రెండు చిత్రాల విజయానికి మధ్యలో బాలయ్యకు మరపురాని అనుభూతిని మిగిల్చింది డిసెంబర్ 21వ తేదీ. 'పట్టాభిషేకం' రిలీజైన రెండేళ్ళకు డిసెంబర్ 21వ తేదీన బాలయ్యకు తొలి సంతానంగా బ్రహ్మణి జన్మించింది. ఆమెకు మూడేళ్ళు పూర్తయిన రోజున 'లారీ డ్రైవర్' రిలీజయింది. ఇలా డిసెంబర్ 21వ తేదీతో బాలయ్యకు ఎంతో అనుబంధం ఉంది. అందువల్ల ఆ తేదీని ఆయన ఫ్యాన్స్ సైతం భలేగా గుర్తుంచుకుంటారు. అప్పట్లో అభిమానులు ఓ పండగలా చేసుకొనేవారు.