Arya: ఫీల్ మై లవ్.. 21 వ‌సంతాల ఆర్య
ABN, Publish Date - May 07 , 2025 | 06:38 PM
అల్లు అర్జున్ హీరోగా, అనూ మెహతా హీరోయిన్‌గా ప్రేక్ష‌కుల ఎదుట‌కు వ‌చ్చి సంచ‌ల‌న విజ‌యం సాధించి అనేక రికార్డులు నెల‌కొల్పిన చిత్రం ‘ఆర్య’. నేటితో (మే7) 21 వ‌సంతాలు పూర్తి చేసుకుంది.
అల్లు అర్జున్ (Allu Arjun) హీరోగా, అనూ మెహతా (Anu Mehta) హీరోయిన్‌గా ప్రేక్ష‌కుల ఎదుట‌కు వ‌చ్చి సంచ‌ల‌న విజ‌యం సాధించి అనేక రికార్డులు నెల‌కొల్పిన చిత్రం ‘ఆర్య’. సుకుమార్ (Sukumar) ఈ మూవీ ద్వారా దర్శకుడిగా శ్రీవెంకటేశ్వర క్రియేషన్స్ (Sri Venkateswara Creations)పై ‘దిల్‌’ రాజు (Dil Raju) నిర్మించిన ఈ సినిమా 2004 మే7న విడుదలైంది. ఈ చిత్రం విడుదలై నేటికి 21 ఏళ్లు పూర్త‌వ‌డ‌మే గాక అల్లు అర్జున్ లైఫ్ ట‌ర్నింగ్ మూవీగా నిలిచింది. 2004 మే 7న ‘ఆర్య’ మార్నింగ్‌ షో ప‌డ్డ‌ది మొద‌లు ఫీల్ మై లవ్, ‘వన్‌సైడ్‌ లవ్’ అంటున్నారు ఏంట్రా కొత్తగా ఉంది? హీరో క్యారెక్టర్ ఇలా ఉందేంటి? అంటూ డివైడ్ టాక్ వ‌చ్చిన‌ప్ప‌టికీ మూడో రోజు నుంచి జ‌న ప్ర‌వాహం మొదలై మొత్తం తెలుగు సినిమా ఇండ‌స్ట్రీనే షేక్ చేసే హిట్ అందించారు. కట్ చేస్తే 125 రోజులు ప్రదర్శితమై, టాలీవుడ్‌లో ట్రెండ్‌ సెట్‌ చేసింది.
అయితే అంత‌కుముందు.. 2003 నవంబర్ 19న సినిమా లాంఛనంగా ప్రారంభమైన ఈ ‘ఆర్య’ సినిమాను సుకుమార్ 120 రోజుల్లో పూర్తి చేయ‌గా.. దేవిశ్రీ ప్రసాద్‌ ‘ఫీల్ మై లవ్’ అంటూ ప్రతి ప్రేమికుడు ఆ ప్రేమను ఫీలయ్యేలా, ‘తకదిమితోం’ అంటూ చిందులు తొక్కించారు. ‘అ అంటే అమలాపురం.. ఆ అంటే ఆహాపురం’ అంటూ అక్షరమాలకు కొత్త అర్థం చెప్పించారు. ఇక అలా రూ.4 కోట్లతో నిర్మించి రిలీజ్ చేస్తే డివైడ్ టాక్ తో మొదలై బ్లాక్ బస్టర్ అయ్యి, ఫుల్‌ రన్‌లో రూ.30 కోట్లు వసూలు చేసింది. ఆపై మలయాళంలో డబ్‌ చేసి విడుదల చేస్తే.. అప్ప‌ట్లోనే రూ.35 లక్షల వరకూ వసూలు చేసి అల్లు అర్జున్‌కు మల్లు అర్జున్ అనే పేరు కూడా సంపాదించి పెట్టింది.
తొలి సినిమా గంగోత్రిలో అల్లు అర్జున్ చేసిన పాత్ర‌కు ఆర్య పాత్ర‌తో ఎవ‌రూ గుర్తించ‌లేని విధంగా మారి తనలోని స్టైలిష్ స్టార్ ను పరిచయం చేసిన సినిమా ఈ ఆర్య. గంగోత్రిలో అమాయకుడైన ఓ అబ్బాయి పాత్రలో కనిపించిన బన్నీ.. ఆర్యలో మాత్రం డిఫరెంట్ లుక్ లో కనిపించడంతోపాటు తనలోని అసలైన యాక్టింగ్, డ్యాన్సింగ్ స్కిల్స్ ను బయటపెట్టాడు. యూత్‌ స్టార్ గా మారిపోవడానికి కారణం ఈ ఆర్య సినిమానే. ఈ సినిమాతో అల్లు అర్జున్ కెరియరే ద‌శ తిరిగి పోయింది. ఈ మూవీ త‌ర్వాత త‌న‌కంటూ ప్ర‌త్యేక ఫ్యాన్ బేస్‌ను ఏర్పాటు చేసుకోగ‌లిగాడు.