Akhanda 2 Collections: ‘అఖండ 2’ మొదటి రోజు వసూళ్లు ఎంతంటే!

వారం వాయిదా తర్వాత ఈ శుక్రవారం ప్రేక్షకుల ముందుకొచ్చిన 'అఖండ 2: తాండవం' థియేటర్లలో దద్దరిల్లుతోంది. బాలకృష్ణ (Balakrishna) కథానాయకుడిగా బోయపాటి శ్రీను దర్శకత్వంలో ‘అఖండ’కు సీక్వెల్‌గా రూపొందిన ఈ సినిమా ఇటీవల ప్రపంచవ్యాప్తంగా విడుదలైందిభారీ అంచనాల మధ్య  విడుదలైన అఖండ 2 మొదటి రోజు వసూళ్లతో   అందరిలోనూ ఆసక్తి నెలకొంది. ఫస్ట్‌డే కలెక్షన్స్‌ను నిర్మాణసంస్థ అధికారికంగా వెల్లడించింది. ప్రీమియర్స్‌తో కలిపి రూ.59.5 కోట్లు వసూలుచేసినట్లు తెలిపింది. ఈ మేరకు పోస్టర్ విడుదల చేసింది.  బాలకృష్ణ కెరీర్‌లోనే మొదటిరోజు ఈ స్థాయిలో వసూలు చేసిన తొలి చిత్రం ఇదేనని పేర్కొన్నారు. సంయుక్త మీనన్ కథనాయికగా నటించిన ఈ చిత్రంలో హర్షాలీ మల్హోత్రా కీలక పాత్ర పోషించారు. థమన్ సంగీతం అందించారు.  

కథేమిటంటే...

'అఖండ' సినిమాకు ఎక్కడ శుభం కార్డు పడిందో అక్కడే ఈ కథ మొదలైంది. అరి వర్గాలను హతమార్చిన అఖండ రుద్ర (బాలకృష్ణ) అష్ట లింగ పీఠంలో తపస్సు చేయడానికి హిమాలయాలకు వెళ్ళిపోతాడు. ఇక్కడ మురళీకృష్ణ (బాలకృష్ణ Balakrishna) ఎమ్మెల్యేగా ఎన్నికై ప్రజలకు సేవ చేస్తుంటాడు. అతని భార్య శరణ్య కన్నుమూయడంతో కూతురు జనని (హర్షాలీ మల్హోత్ర Harshali Malhotra)ని కంటికి రెప్పలా కాపాడుతూ, సైంటిస్ట్ ను చేస్తాడు. ఈ దేశ హితం కోసం ఆమె టీమ్ హిమాచల్ ప్రదేశ్ లో పని చేస్తుంటుంది. వారంతా ఆర్మీ ఆఫీసర్ అర్చన (సంయుక్త Samyuktha) సంరక్షణలో ఉంటారు. ఇదిలా ఉంటే... పీ.ఎం. పీఠంపై కన్నేసిన ప్రతిపక్ష నేత అజిత్ ఠాకూర్ (కబీర్ దుహాన్ సింగ్)... చైనా జనరల్ జంగ్లీ (సాంగ్య Sangay Tsheltrim)తో చేతులు కలుపుతాడు. ఈ దేశాన్ని నాశనం చేయాలంటే ప్రజలలో ఉన్న దైవభక్తిని తొలగించాలని, దేవుడు సైతం తమను కాపాడలేడనే భావనకు వారిని లోను చేయాలని అజిత్ ఠాకూర్ ప్రయత్నిస్తాడు. అందుకు మహా కుంభమేళ ను అనువుగా వాడుకుంటాడు. పవిత్ర గంగాజలాన్ని కలుషితం చేసి తద్వారా ప్రజలు వైరస్ బారిన పడేలా పన్నాగం పన్నుతాడు. ప్రతిపక్ష నేత, చైనా జనరల్ చేసిన ప్రయత్నాలను అఖండ రుద్ర ఎలా అడ్డుకున్నాడు? సనాతన ధర్మాన్ని తుడిచి వేయాలని వారు చేసిన కుతంత్రాన్ని ఎలా ఎదుర్కొన్నాడు? వైరస్ ను రూపుమాపడం కోసం జనని టీమ్ తయారు చేసిన వాక్సిన్ ను నాశనం చేయాలనుకున్న వారి కుట్రలను ఎలా భగ్నం చేశాడు? అనేది మిగతా కథ.

•