Sairam Shankar: ‘పట్టుకుంటే 10 వేలు’ పథకం పెట్టడానికి కారణం ఏంటంటే..
ABN , Publish Date - Feb 04 , 2025 | 04:47 PM
డ్యాషింగ్ డైరెక్టర్ పూరీ జగన్నాథ్ తమ్ముడు సాయి రామ్ శంకర్ నుండి సినిమా వచ్చి చాలా కాలం అవుతుంది. చాలా గ్యాప్ తర్వాత ఆయన హీరోగా నటించిన చిత్రం ‘ఒక పథకం ప్రకారం’. ఈ సినిమా ‘తండేల్’ మూవీకి పోటీగా విడుదలయ్యేందుకు ముస్తాబవుతోంది. ఈ నేపథ్యంలో.. చిత్ర హీరో సాయి రామ్ శంకర్ మీడియాకు చిత్ర విశేషాలను తెలియజేశారు.
స్టార్ డైరెక్టర్ పూరీ జగన్నాథ్ తమ్ముడు, టాలీవుడ్ హీరో సాయి రామ్ శంకర్ చాలా గ్యాప్ తర్వాత నటించిన చిత్రం ‘ఒక పథకం ప్రకారం’. మలయాళ డైరెక్టర్ వినోద్ కుమార్ విజయన్ దర్శకత్వం వహించిన ఈ సినిమాను గార్లపాటి రమేష్, వినోద్ కుమార్ విజయన్ నిర్మించారు. ఫిబ్రవరి 7న రిలీజ్ కాబోతున్న ఈ మూవీలో శృతి సోది, ఆషిమా నర్వాల్, సముద్రఖని కీలక పాత్రలు పోషించారు. సాయి రామ్ శంకర్ మల్టీపుల్ షేడ్స్ ఉన్న పాత్రలో నటించిన ఈ సినిమాకు సంబంధించి టీమ్ ఇటీవల ఓ కాంటెస్ట్ అనౌన్స్ చేసిన విషయం తెలిసిందే. సినిమా చూస్తూ.. ఇంటర్వెల్ టైమ్‌కి విలన్ ఎవరో చెబితే స్పాట్‌లో రూ. 10వేలు ఇస్తామని టీమ్ ప్రకటించిన ఛాలెంజ్‌తో.. సినిమాపై బాగానే క్రేజ్ ఏర్పడింది. ఈ క్రేజ్‌కి కంటిన్యూ అన్నట్లుగా చిత్ర హీరో సాయి రామ్ శంకర్ తాజాగా సినిమాకు సంబంధించి ఆసక్తికర విషయాలను మీడియాకు తెలియజేశారు.
‘ఇంటర్వెల్ టైమ్‌కి విలన్ ఎవరో చెప్పండి రూ. 10,000 పట్టుకెళ్ళండి’, ‘పట్టుకుంటే 10 వేలు’ అంటున్నారు. అసలు ఈ ఐడియా ఎవరిది? రెస్పాన్స్ ఎలా ఉంది? దీనికి ముందు ఇంకేమైనా ఆలోచించారా?
రెస్పాన్స్ అయితే అద్భుతంగా వస్తుంది. సినిమా పేరు, రిలీజ్ అవుతుందన్న విషయం తెలియడానికి ఇది బాగా ఉపయోగపడింది. మొదటి నుంచి ఇదొక్కటే అనుకున్నాం. సినిమా చూశాక మా యూనిట్‌లో కీలక సభ్యులందరూ ‘పట్టుకుంటే పదివేలు’ అని చెప్పడంతో.. ఇదే ప్రమోషన్‌గా ఉపయోగించాలని ఫిక్స్ అయ్యాం.
‘ఒక పథకం ప్రకారం’.. టైటిల్ జస్టిఫికేషన్ ఏంటి?
‘ఒక పథకం ప్రకారం’ అంటే 80 శాతం క్రైమ్ జానర్ కథలకు వాడతాం. ఈ సినిమాలో ఉండే ప్రతి పాత్రకు ఎవరి ప్లానింగ్ వారికి ఉంటుంది. కాబట్టి ‘ఒక పథకం ప్రకారం’ అనే టైటిల్‌ని టీమంతా ఆమోదించారు. ఫైనల్‌గా అదే సెలెక్ట్ చేసుకున్నాం.
దర్శకుడు ఇప్పటికే ఇంటర్నేషనల్ అవార్డు అందుకున్నారు? ఆయన ఎక్స్‌పీరియన్స్ ఈ సినిమాకు ఎంత వరకు యూజ్ అయింది?
ఆయన 17 ఏళ్లకే డైరెక్టర్ అయ్యారు. నా ఫస్ట్ మూవీ తర్వాత నుంచి మా మధ్య స్నేహం ఉంది. మేము 2005 నుంచి సినిమా చేద్దామని అనుకుంటున్నాం. కానీ కుదరలేదు. అన్నింటి మీద అవగాహన ఉన్న మంచి టెక్నీషియన్ విజయ్. ఆయన దర్శకనిర్మాతగా ఫాహద్ ఫాజిల్‌తో రెండు సినిమాలు నిర్మించారు. తెలుగులో కూడా అదే ప్యాట్రన్‌లో సినిమాలు చేస్తున్నారు. మా ఇద్దరికీ ఉన్న కామన్ ఫ్రెండ్ వినీత్. వీళ్లిద్దరూ కలిసి తెలుగులో చేద్దాం అనుకున్నపుడు ఇద్దరికీ నా పేరు మైండ్‌లోకి రావడం.. నా అదృష్టంగా భావిస్తున్నాను.
సముద్రఖనిగారు ఇందులో ఉన్నారు. ఆయనతో వర్కింగ్ ఎక్స్‌పీరియన్స్ ఎలా ఉంది?
ఆయన ఆల్రెడీ సక్సెస్ ఫుల్ క్యారెక్టర్ ఆర్టిస్ట్, నటుడు. డైరెక్టర్ కి ఏం కావాలో అదే చేస్తారాయన. అలాంటి నటునితో నటించడం ఎప్పుడూ హ్యాపీనే.
ట్రైలర్‌ని పూరి జగన్నాథ్ చూశారా?
అన్నయ్య ట్రైలర్ చూశారు. కొత్తగా ఉందని అన్నారు. అలాగే పట్టుకుంటే రూ. 10,000 గురించి కూడా చెప్పాను. ఐడియా బాగుందని అన్నారు.
ఈ సినిమాలో మీ పాత్ర గురించి?
ఇందులో నా పాత్ర క్రిమినల్ లాయర్. నెమ్మదిగా నా క్యారెక్టర్‌లో ఒక్కో షేడ్ బయట పడుతుంది. క్రిమినలా లేకపోతే క్రిమినల్ లాయరా అనిపించేలా ఉంటుంది. అయితే ఈ సినిమాలో నా పాత్ర కోసం వన్ మంత్ ట్రైనింగ్, వర్క్ షాప్స్ కూడా చేశాను.
సినిమాలో యాక్షన్‌కి స్కోప్ ఉందా?
ఆయన మలయాళ డైరెక్టర్ అయినప్పటికీ తెలుగు సినిమాలు, ఇక్కడి స్టైల్ బాగా ఇష్టం. ‘మలయాళంలో ఓ పాయింట్ పట్టుకుని వెళ్ళిపోతారు. కానీ ఇక్కడ అలా కుదరదు, కష్టం’ అంటారు డైరెక్టర్ విజయన్. కాబట్టి తెలుగు ఆడియన్స్ తగ్గట్టుగా ఫైట్ సీన్స్‌ని, సాంగ్స్‌ను డిజైన్ చేశారు. తమిళ ఫైట్ మాస్టర్ ఢిల్లీ బాబు ఫైట్స్ కంపోజ్ చేశారు.
ఇందులో క్రైమ్ మాత్రమేనా.. లేక ఏమైనా లవ్ స్టోరీ కూడా ఉంటుందా?
ఇది లవ్ స్టోరీ బెస్ట్ క్రైమ్ మూవీ.
షూటింగ్ చేసేటప్పుడు ఏదైనా మర్చిపోలేని అనుభవం?
షూటింగ్ కోసం 25 డాగ్స్ తెచ్చాము. ఆ క్లైమాక్స్ సీక్వెన్స్ ఏకంగా 4 రోజులు చేశారు. ఆ టైమ్‌లో డాగ్ మీదకు రావడంతో, గ్రిల్ ఎక్కేశాను. లక్కీగా ఎస్కేప్ అయ్యాను. ఆ ఫైట్ చాలా బాగుంటుంది. ముందుగా ఒక క్లైమాక్స్ సీన్ తీసి, సరిపోవట్లేదని మళ్లీ ఎక్స్టెండెడ్ వెర్షన్ తీశారు డైరెక్టర్. 4 రోజులు అనుకున్న క్లైమాక్స్ దాదాపు 8 రోజులు షూటింగ్ చేశాం.
ఈ మూవీ తర్వాత మీ నుండి వరుస సినిమాలు వస్తాయా?
నాకు ఈ సినిమా మీద గట్టి నమ్మకం ఉంది. మధ్యలో ఫెయిల్యూర్స్ వచ్చినప్పటికీ, నాతో సినిమాలు చేయడానికి నిర్మాతలు వస్తున్నారు. ఈ సినిమా సక్సెస్ అవుతుందనే హోప్ చాలా గట్టిగా ఉంది.
హీరోగానేనా.. లేదంటే ఎలాంటి పాత్రలలోనైనా చేస్తారా?
నా పాత్ర బాగుంటే ఎలాంటి రోల్ అయినా చేయడానికి సిద్ధంగా ఉన్నాను.
ఇప్పటి వరకు మీరు చేసిన సినిమాలకు, ఈ సినిమాకు తేడా ఏంటని అడిగితే..?
గతంలో ఇలాంటి సస్పెన్స్ జానర్ సినిమా, ఇంటెన్స్ ఉన్న క్యారెక్టర్ నేను చేయలేదు. నెల ట్రైనింగ్ తర్వాత రియాలిస్టిక్‌గా చేశామన్న సంతృప్తి లభించింది.
తెలుగులో మాత్రమే విడుదల చేస్తున్నారా? మలయాళంలో కూడా రిలీజ్ అవుతుందా?
ఇప్పటికి తెలుగులో మాత్రమే విడుదల చేస్తున్నాం. నెక్స్ట్ ఇతర భాషల్లో కూడా రిలీజ్ చేసేందుకు ప్లాన్ చేస్తున్నాం. కెమెరామెన్ రాజీవ్ ఇండియన్ టాప్ కెమెరామెన్లలో ఒకరు. అలాగే మలయాళంలో రెండు సూపర్ హిట్ సినిమాలకు దర్శకత్వం వహించారు. తెలుగు కూడా నేర్చుకున్నారు.
ఈ సినిమా విడుదల రోజు ‘తండేల్’ రిలీజ్ కాబోతోంది. మీరేం అనుకుంటున్నారు?
పోటీ ఏముంది? మేము ‘తండేల్’తో పాటు రిలీజ్ చేయట్లేదు. ‘తండేల్’ పక్కన రిలీజ్ చేస్తున్నాం.
ఇటీవల కాలంలో మీకు నచ్చిన సినిమా లేదంటే వెబ్ సిరీస్‌.. ఏదైనా?
దృశ్యం కథ చాలా బాగుంటుంది. మైండ్‌లో నుంచి అసలు పోవట్లేదు.
వెబ్ సిరీస్‌లకు బాగా డిమాండ్ పెరిగింది. మీరు ఎందులోనైనా నటిస్తున్నారా?
ఓ మైథలాజికల్ సిరీస్‌లో చేస్తున్నాను. అందులో 60 ఏళ్ల వయసు ఉన్న పాత్రలో నటిస్తున్నాను. ఇప్పుడు చేస్తున్న సినిమాల లిస్ట్‌లో ‘రీసౌండ్’ ఉంది. ఇంకొన్ని చర్చల దశలో ఉన్నాయి. త్వరలోనే ఆ వివరాలను తెలియజేస్తాను.