MS Umesh: ఇండస్ట్రీలో విషాదం.. ప్రముఖ కమెడియన్ మృతి

MS Umesh: ఇండస్ట్రీలో తీవ్ర విషాదం చోటుచేసుకుంది. ప్రముఖకన్నడ హాస్య నటుడు MS. ఉమేష్ (MS. Umesh) (80)కన్నుమూశారు. గత కొంతకాలంగా అనారోగ్యంతో బాధపడుతున్న ఆయన చికిత్స నిమిత్తం హాస్పిటల్ లో చేరారు. ఇక గత రాత్రి ఆరోగ్యం క్షీణించడంతో ఆదివారం ఉదయం మృతిచెందినట్లు వైద్యులు తెలిపారు. దీంతో కన్నడ ఇండస్ట్రీలో విషాద ఛాయలు అలముకున్నాయి.

1960 లో బాలనటుడిగా కెరీర్ ని ప్రారంభించిన ఉమేష్.. రంగస్థల నటుడిగా ఎదుగుతూ మంచి గుర్తింపును సంపాదించుకున్నాడు. మక్కల రాజ్య అనే సినిమాతో కెరీర్ ని ప్రారంభించిన ఉమేష్ కు 1976 లో కథా సంగమ సినిమా మంచి గుర్తింపును తీసుకొచ్చి పెట్టింది. ఈ సినిమా తరువాత ఆయన వెనుతిరిగి చూడలేదు. దాదాపు 350 కి పైగా చిత్రాల్లో ఉమేష్ నటించి మెప్పించాడు. కమెడియన్ గా, సపోర్టింగ్ రోల్స్ లో ఎంతో అద్భుతమైన నటనను కనపరిచారు.

నటుడు రాజ్ కుమార్ దగ్గరనుంచి రజినీకాంత్ వరకు అందరి సినిమాల్లో నటించి తనకంటూ ప్రత్యేక గుర్తింపును తెచ్చుకున్నారు. ఇక ఉమేష్ మరణంపై సినీ, రాజకీయ ప్రముఖులు సంతాపం వ్యక్తం చేస్తున్నారు. కర్ణాటక రాష్ట్ర ముఖ్యమంత్రి సిద్దరామయ్య, కేంద్ర మంత్రి కుమారస్వామి సైతం ఆయనకు నివాళులు అర్పించారు.