Mammootty: మమ్ముట్టి ఆరోగ్యం.. స్పందించిన ఎంపీ.. మోహన్‌లాల్‌ ప్రత్యేక పూజలు

మలయాళ మెగాస్టార్‌ మమ్ముట్టి (Mammootty) తీవ్ర అనారోగ్యంతో బాధపడుతున్నారంటూ బుధవారం సాయంత్రం నుంచి పలు మాధ్యమాల్లో వార్తలు వస్తున్న సంగతి తెలిసిందే.  ఆయన అనారోగ్యానికి  గురైన వార్తలతో అభిమానులు ఆందోళనకు గురయ్యారు. ఆ కథనాలను మమ్ముటి టీమ్‌ కొట్టి పారేసింది. ‘‘మమ్ముట్టి ఆరోగ్యం గురించి జరుగుతున్న ప్రచారంలో ఎలాంటి నిజం లేదు. రంజాన్‌ కారణంగా ఆయన షూట్స్‌ నుంచి బ్రేక్‌ తీసుకొని వెకేషన్‌కు వెళ్లారు. విరామం నుంచి తిరిగి వచ్చిన వెంటనే ఆయన మోహన్‌లాల్‌తో కలిసి మహేశ్‌ నారాయణన్‌ (Mahesh Narayan) చిత్రంలో పాల్గొనున్నారు’’ అని టీమ్‌ వెల్లడించింది. దీనిపై ఆయన స్నేహితుడు, ఎంపీ జాన్‌ బ్రిట్టాస్‌ ఖండించారు. మమ్ముట్టి ఆరోగ్యం బాగా లేదన్నమాట వాస్తవమే కానీ.. అది చాలా చిన్న సమస్య అని ఆయన క్లారిటీ ఇచ్చారు. (Mammootty health Update)

‘‘మేమిద్దరం చాలాకాలంగా నుంచి స్నేహితులం. కానీ, మా వ్యక్తిగత జీవితాల గురించి ఎప్పుడూ మాట్లాడలేదు. కొన్ని రోజుల నుంచి ఆ వివరాల గురించి కూడా పంచుకుంటున్నాం. మమ్ముట్టి స్వల్ప అనారోగ్య సమస్యతో బాధపడుతున్నారు. ప్రస్తుతం దానికి చికిత్స తీసుకుంటున్నారు. ప్రస్తుతం ఆయన క్షేమంగా ఉన్నారు. కొన్ని గంటల క్రితమే ఆయనతో ఫోన్‌లో మాట్లాడాను’’ అని మమ్ముట్టిపై వస్తున్న రూమర్‌లకు ఫుల్‌స్టాప్‌ పెట్టారు.
అంతే కాదు మమ్ముట్టి ఆరోగ్యం కోసం మోహన్‌లాల్‌ శబరిమలలో ప్రత్యేక పూజలు నిర్వహించారు. ఆయన ఆరోగ్యం విషయంలో ఆందోళన చెందాల్సిన అవసరం లేదని మోహన్‌లాల్‌ తెలిపారు. ఇలాంటి సమస్యలు  అందరికీ వస్తాయని చెప్పారు.