Atharvaa Murali: ప్ర‌స్తుతం.. ప్రపంచంలో అత్యంత సంతోషకరమైన వ్యక్తిని నేనే

డీఎన్‌ఏ (DNA Movie) విజయాన్ని ఎంతగానో ఆస్వాదిస్తున్నానని, ఈ తరుణంలో ప్రపంచంలోనే అత్యంత సంతోషకరమైన వ్యక్తిని తానేనని హీరో అధర్వ మురళి (Atharvaa Murali) అన్నారు. ఒలింపియా మూవీస్‌ పతాకంపై జయంతి అంబేత్‌కుమార్‌ సమర్పణలో నెల్సన్‌ వెంకటేశన్ (NelsonVenkatesan) దర్శకత్వంలో ఎస్‌.అంబేత్‌కుమార్‌ నిర్మించిన చిత్రం ‘డీఎన్‌ఏ’. రెడ్‌ జెయింట్‌ మూవీస్‌ గత శుక్రవారం రిలీజ్‌ చేసింది. ఈ చిత్రానికి పాజిటివ్‌ టాక్‌ రావడంతో విజయవంతంగా ప్రదర్శితమవుతోంది. కలెక్షన్లు కూడా ఆశించిన స్థాయిలో ఉండటంతో చిత్ర బృందం ఇటీవ‌ల‌ సక్సెస్‌ మీట్‌ నిర్వహించగా హీరో అధర్వ మురళి, హీరోయిన్‌ నిమిషా సజయన్ (Nimisha Sajayan), నటుల కాళి వెంకట్‌, సుబ్రహ్మణ్య శివ సహా చిత్ర బృందం పాల్గొన్నారు.

ఈ సంద‌ర్భంగా అధర్వ మురళి (Atharvaa Murali) మాట్లాడుతూ, ‘ఈ చిత్రం నిర్మాణం నుంచి విజయం వరకు పాలుపంచుకున్న ప్రతి ఒక్కరికీ ధన్యవాదాలు. సినిమా సక్సెస్‌ చేసిన మీడియా, ప్రేక్షకులకు థ్యాంక్స్‌. సినిమా రిలీజ్‌ అయిన తర్వాత థియేటర్‌ విజిట్‌కు వెళ్ళినపుడు, ప్రతి థియేటర్‌లో అనూహ్య స్పందన లభించింది. ఈ సినిమా విజయం నా కెరీర్‌కు ఎంతో ముఖ్యం. అందుకే సక్సెస్‌ను ఎంజాయ్‌ చేస్తున్నాను. ఇపుడు ఈ ప్రపంచంలో నాకంటే సంతోషకరమైన వ్యక్తి మరొకరు లేరు. ఇంతటి మంచి విజయాన్ని అందించిన దర్శకనిర్మాతలకు ప్రత్యేక ధన్యవాదాలన్నారు.

‘ఒక మంచి చిత్రంలో భాగమైనందుకు ఎంతో సంతోషంగా ఉందని హీరోయిన్‌ నిమిషా (Nimisha Sajayan) అన్నారు. దర్శకుడు నెల్సన్‌ వెంకటేశన్ (NelsonVenkatesan) మాట్లాడుతూ, ‘ప్రస్తుత పరిస్థితుల్లో తమిళ సినిమాలో ఒక చిత్ర విజయం అంటే కేవలం దర్శకుడు మంచి చిత్రాన్ని రూపొందించడమే కాదు. ఆ సినిమా మార్కెటింగ్‌, ప్రమోషన్‌, డిస్ట్రిబ్యూషన్‌, ఇలా ప్రతి ఒక్కటీ అనుకూలంగా ఉన్నపుడే ఆ మూవీ ఘన విజయం సాధిస్తుంది. ఈ సినిమా విజయంలో తెరపైన, తెర వెనుక కృషి చేసిన ప్రతి ఒక్కరికీ ధన్యవాదాలు’ అన్నారు.