వాస్తవ ఘటనల ఆధారంగా

‘ఫలక్‌నుమా దాస్‌’, ‘దాస్‌ దా ధమ్కీ’ సినిమాలతో దర్శకుడు, నిర్మాత, రచయితగా తన ప్రతిభను చాటారు విష్వక్సేన్‌. ఇప్పుడు ఆయన తన స్వీయ దర్శకత్వంలో తదుపరి ప్రాజెక్టు ‘కల్ట్‌’ కోసం సిద్ధమవుతున్నారు. వాస్తవ ఘటనల ఆధారంగా తెరకెక్కనున్న ఈ చిత్రాన్ని తారక్‌ సినిమాస్‌, వన్మయే క్రియేషన్స్‌ బ్యానర్లపై కరాటే రాజు, సందీప్‌ కాకర్ల నిర్మిస్తున్నారు. ఈ చిత్రం ఆదివారం ఘనంగా ప్రారంభమైంది. ఈ కార్యక్రమానికి పలువురు ప్రముఖులు హాజరయ్యారు. ఎస్‌.రాధాకృష్ణ(చిన్నబాబు) టైటిల్‌ లోగోను లాంచ్‌ చేశారు. మాజీ మంత్రి తలసాని శ్రీనివాస్‌ యాదవ్‌ ముహూర్తపు షాట్‌కు కెమెరా స్విచ్ఛాన్‌ చేసారు. నిర్మాత అల్లు అరవింద్‌ క్లాప్‌ కొట్టారు. ఈ సినిమాలో విష్వక్సేన్‌ నలభై మంది కొత్త నటులను పరిచయం చేస్తున్నారు. దర్శకుడు తరుణ్‌ భాస్కర్‌ డైలాగ్స్‌ అందిస్తుండగా, రవి బస్రూర్‌ సంగీతాన్ని సమకూర్చుతున్నారు. జాతీయ, అంతర్జాతీయ స్థాయిలో ప్రేక్షకులను ఆకట్టుకునేలా రూపుదిద్దుకోనున్న ఈ చిత్రం తెలుగు, హిందీ, జపనీస్‌, స్పానిష్‌, ఇంగ్లీష్‌ భాషల్లో విడుదల కానుంది.