AMB మాల్‌లో.. రియల్ లైఫ్ మల్టీథీమ్ అడ్వెంచర్ డెస్టినేషన్

హైదరాబాద్‌లో సాహస వినోదానికి సరికొత్త మైలురాయి.. AMB మాల్‌లో ‘మ్యాజిక్ డిస్ట్రిక్ట్’ ప్రారంభం

హైదరాబాద్ కొండాపూర్‌లోని AMB మాల్ (శరత్ సిటీ క్యాపిటల్ మాల్)లో ఆసియాలోనే మొట్టమొదటి రియల్-లైఫ్ మల్టీ-థీమ్ అడ్వెంచర్ డెస్టినేషన్ ‘మ్యాజిక్ డిస్ట్రిక్ట్’ ప్రారంభమైంది. సాధారణ వినోదానికి భిన్నంగా, సందర్శకులే కథలో భాగమై నడుస్తూ సాహసాలను అనుభవించే వినూత్న కాన్సెప్ట్‌గా దీనిని రూపొందించారు.

AMB మాల్‌లోని ఆరో అంతస్తులో సుమారు 38,000 చదరపు అడుగుల విస్తీర్ణంలో ఏర్పాటు చేసిన ఈ అడ్వెంచర్ జోన్, హైదరాబాద్ వినోద రంగంలో కొత్త అధ్యాయాన్ని తెరిచింది. సినిమా సెట్ల తరహాలో రూపొందించిన ప్రపంచాల్లోకి అడుగుపెట్టి, లైవ్ ఇంటరాక్షన్‌లతో రియల్ అనుభూతిని పొందేలా ఇది ప్రత్యేకంగా డిజైన్ చేశారు.

ఈ ప్రతిష్టాత్మక ప్రాజెక్ట్‌కు నేషనల్ అవార్డు గ్రహీత, లిమ్కా బుక్ ఆఫ్ రికార్డ్స్ హోల్డర్ తవ్వ శ్రీనివాస్ రూపకర్తగా వ్యవహరించారు. మీడియా సమావేశంలో ఆయన మాట్లాడుతూ.. “భారతీయుల మేధస్సు, సృజనాత్మకతను ప్రపంచానికి చాటిచెప్పడమే మా లక్ష్యం. ఈ రంగంలో 25 ఏళ్ల అనుభవంతో హైదరాబాద్ ప్రజలకు ప్రపంచస్థాయి అడ్వెంచర్ అనుభూతిని అందిస్తున్నాం. ఇది తొలి దశ మాత్రమే. రాబోయే రోజుల్లో దేశవ్యాప్తంగా 27 కొత్త కాన్సెప్ట్‌లను ప్రవేశపెట్టాలనుకుంటున్నాం” అని తెలిపారు.

ఈ ప్రాజెక్ట్ ఆపరేషన్ డైరెక్టర్ చందన లిపి మాట్లాడుతూ, మొదటి దశలో నాలుగు ప్రత్యేకమైన సాహస ప్రపంచాలను అందుబాటులోకి తీసుకొచ్చామని చెప్పారు. హైదరాబాద్‌కు అంతర్జాతీయ స్థాయి అడ్వెంచర్ ఎంటర్‌టైన్‌మెంట్‌ను తీసుకురావాలన్నదే తమ లక్ష్యమని ఆమె వెల్లడించారు.

ప్రస్తుతం అందుబాటులో ఉన్న

• జోంబీ సిటీ (Zombie City): జోంబీలు ఆక్రమించిన నగరంలో చిక్కుకుని, ప్రాణాలతో బయటపడే ఉత్కంఠభరిత సర్వైవల్ అడ్వెంచర్.

• స్కేరీ ఎస్కేప్స్ (Scary Escapes): భయానక వాతావరణంలో క్లూస్‌ను కనుగొని, పజిల్స్‌ను పరిష్కరిస్తూ టీమ్ వర్క్‌తో తప్పించుకోవాల్సిన అనుభవం.

• స్కేరీ హౌస్ (Scary House): హార్డ్‌కోర్ హారర్ ప్రియుల కోసం లైవ్ పాత్రలు, భయంకరమైన సౌండ్ ఎఫెక్ట్స్‌తో రూపొందించిన ప్రత్యేక ప్రపంచం.

• బూ బూ హౌస్ (Boo Boo House): చిన్నారుల కోసం రూపొందించిన ఫన్ & స్పూకీ థీమ్. భయం కాకుండా ధైర్యాన్ని పెంపొందించేలా ఇది ప్రత్యేక ఆకర్షణగా నిలుస్తుంది.

నిర్వాహకుల్లో ఒకరైన కే రాజ్ కుమార్ మాట్లాడుతూ, “మేము రూపొందించిన ఈ కొత్త కాన్సెప్ట్‌కు అద్భుతమైన స్పందన లభిస్తోంది. మొత్తం ఏడు విభిన్న థీమ్‌లను ప్లాన్ చేయగా, ప్రస్తుతం తొలి దశలో నాలుగు మాత్రమే ప్రారంభించాం” అని తెలిపారు.