హృదయాలను హత్తుకునే సినిమా

ప్రముఖ దర్శకుడు సుకుమార్‌ బండ్రెడ్డి తనయురాలు సుకృతి వేణి ప్రధాన పాత్రలో నటించిన చిత్రం ‘గాంధీ తాత చెట్టు’. పద్మావతి మల్లాది దర్శకురాలు. ఇప్పటికే పలు అంతర్జాతీయ ఫిల్మ్‌ ఫెస్టివల్స్‌లో ఎన్నో అవార్డులను దక్కించుకున్న ఈ చిత్రం ఈనెల 24న విడుదలవుతోంది. ఈ సందర్భంగా దర్శకురాలు పద్మావతి మల్లాది మీడియాతో ముచ్చటించారు. ‘నాకు స్వతహాగా పచ్చదనం, చెట్టు అంటే చాలా ఇష్టం. మొక్కల గురించి తదుపరి తరం వాళ్లకు చెప్పాలనే సంకల్పంతో ఈ కథ రాసుకున్నాను. ఒక అమ్మాయి అహింసవాదంతో ఊరిని, చెట్టును ఎలా కాపాడింది అనేది ఈ చిత్ర కథ. పూర్తి సందేశంతో పాటు కమర్షియాలిటీ ఉన్న సినిమా. తప్పకుండా అందరి హృదయాలను హత్తుకుంటుంది. ఈ కథ 1947లో గాంధీగారు చనిపోయినప్పుడు తాత నాటిన చెట్టుతో ప్రారంభమవుతుంది. ఈ సినిమాతో అహింస గురించి చెప్పాను. మనుషుల మధ్య నేచర్‌ మధ్య అహింస చాలా అవసరం’ అని అన్నారు.