గంగై అమరన్‌కు తీవ్ర అస్వస్థత

సీనియర్‌ సంగీత దర్శకుడు, ఇళయరాజా సోదరుడు గంగై అమరన్‌ తీవ్ర అస్వస్థతకు గురయ్యారు. దీంతో ఆయనను మదురైలో ఆస్పత్రిలో చేర్పించి చికిత్స అందిస్తున్నారు. 77 యేళ్ళ గంగై అమరన్‌ ఓ కొత్త చిత్రంలో నటిస్తున్నారు. ఈ సినిమా షూటింగ్‌ మానామదురై, శివగంగై ప్రాంతాల్లో జరుగుతోంది. ఈ షూటింగ్‌లో పాల్గొనేందుకు వెళ్ళిన ఆయన ఉన్నట్టుండి తీవ్ర అస్వస్థతకు లోనయ్యారు. దీంతో ఆయనను హుటాహుటిన మానామదురైలోని ప్రభుత్వ ఆస్పత్రిలో చేర్చి ప్రాథమిక వైద్యం చేయించారు. అక్కడ నుంచి మెరుగైన వైద్య సేవల కోసం మదురై ప్రభుత్వ ఆస్పత్రికి తరలించారు. ఈ విషయం తెలుసుకున్న గంగై అమరన్‌ కుమారుడు, దర్శకుడు వెంకట్‌ ప్రభు, నటుడు ప్రేమ్‌జీ అమరన్‌ మదురైకు చేరుకున్నారు. చలికాలం కావడంతో అమరన్‌ శ్వాస పీల్చడంలోనే సమస్యలు మినహా ఆరోగ్యపరంగా బాగానే ఉన్నారని వైద్యులు వెల్లడించారు.