మాజీ రాష్ట్రపతి కలామ్‌ బయోపిక్‌లో ధనుష్‌

తమిళ హీరో ధనుష్‌ హీరోగా మరో క్రేజీ ప్రాజెక్ట్‌ సిద్ధమవుతోంది. మాజీ రాష్ట్రపతి, శాస్త్రవేత్త ఏ.పీ.జే అబ్దుల్‌ కలామ్‌ జీవితం ఆధారంగా తెరకెక్కనున్న బయోపిక్‌లో ఆయన నటించనున్నారు. బుధవారం, కేన్స్‌ చిత్రోత్సవంలో ఈ సినిమా పోస్టర్‌ను ఆవిష్కరించారు. ఈ చిత్ర టైటిల్‌ ‘కలామ్‌’. ‘ద మిస్సైల్‌ మ్యాన్‌ ఆఫ్‌ ఇండియా’ అనేది ఉపశీర్షిక. ‘తానాజీ: ద అన్‌సంగ్‌ వారియర్‌’, ‘ఆదిపురుష్‌’ చిత్రాల దర్శకుడు ఓం రౌత్‌ తెరకెక్కించనున్నారు. అభిషేక్‌ అగర్వాల్‌, భూషణ్‌కుమార్‌, అనిల్‌ సుంకర, కృషన్‌కుమార్‌ నిర్మించనున్నారు. అబ్దుల్‌ కలామ్‌ జీవితాన్ని, భారతీయ అంతరిక్ష, రక్షణ రంగాలకు ఆయన చేసిన అపూర్వ సేవలను ఈ చిత్రం ద్వారా హృద్యంగా ఆవిష్కరించనున్నారు. ఇతర వివరాలను త్వరలోనే ప్రకటించనున్నారు.