7G Brindavan Colony 2: ‘7G బృందావన కాలనీ 2’ మూవీ అప్డేట్ వచ్చేసింది..
ABN , Publish Date - Jan 01 , 2025 | 04:39 PM
కల్ట్ క్లాసిక్ ‘7G బృందావన కాలనీ’ మూవీకి సీక్వెల్గా రూపుదిద్దుకుంటోన్న ‘7G బృందావన కాలనీ 2’ చిత్ర అప్డేట్ని మేకర్స్ న్యూ ఇయర్ స్పెషల్గా ప్రకటించారు. రవికృష్ణ హీరోగా, అనశ్వర రాజన్ హీరోయిన్గా నటిస్తున్న ఈ చిత్రానికి సంబంధించిన అప్డేట్ ఏమిటంటే..
‘7G బృందావన కాలనీ’ కల్ట్ క్లాసిక్ సినిమా. ఈ సినిమా అప్పట్లో ఎటువంటి సంచలన విజయాన్ని అందుకుందో తెలిసిందే. సినిమా విడుదలై రెండు దశాబ్దాలవుతున్నా, ఇప్పటికీ ఎందరికో అభిమాన చిత్రంగా ఉంది. అలాంటి ఈ కల్ట్ క్లాసిక్ చిత్రానికి సీక్వెల్గా ‘7G బృందావన కాలనీ 2’ తెరకెక్కుతోన్న విషయం తెలిసిందే. శ్రీ సూర్య మూవీస్ పతాకంపై పలు అద్భుతమైన బ్లాక్ బస్టర్ చిత్రాలను అందించిన ప్రముఖ నిర్మాత ఎ.ఎం. రత్నం ప్రతిష్టాత్మకంగా ఈ చిత్రాన్ని నిర్మిస్తున్నారు. ప్రేక్షకులంతా ఎంతో ఆసక్తిగా ఎదురుచూస్తున్న ఈ సీక్వెల్ అప్డేట్ను న్యూ ఇయర్ స్పెషల్గా మేకర్స్ తెలియజేశారు.
ప్రస్తుతం ఈ చిత్ర చిత్రీకరణ తుది దశకు చేరుకుందని నూతన సంవత్సరం సందర్భంగా చిత్ర బృందం ప్రకటించింది. ‘7G బృందావన కాలనీ 2’ చిత్రానికి ప్రముఖ దర్శకుడు సెల్వరాఘవన్ దర్శకత్వం వహిస్తున్నారు. కట్టిపడేసే కథాకథనాలు, హత్తుకునే భావోద్వేగాలతో ప్రేక్షకులకు గొప్ప అనుభూతిని అందించేలా అద్భుతంగా ఈ సీక్వెల్ను తెరకెక్కిస్తున్నట్లుగా.. ఇంకా చెప్పాలంటే మొదటి భాగాన్ని మించేలా రెండో భాగంతో ప్రేక్షకులకు ట్రీట్ ఇచ్చేలా ఈ సీక్వెల్ని దర్శకుడు సిద్ధం చేశాడనేలా టాక్ వినబడుతుంది. మొదటి భాగంలో తన అద్భుతమైన నటనతో ప్రేక్షకుల మనసు గెలిచిన రవికృష్ణ, మరోసారి తనదైన శైలిలో మెప్పించడానికి సిద్ధమవుతున్నారు. ఆయన సరసన అనశ్వర రాజన్ నటిస్తున్నారు.
Also Read- కాశీ యాత్రలో రేణు దేశాయ్, అకీరా, ఆద్య.. సింప్లిసిటీకి కేరాఫ్ అడ్రస్
సీక్వెల్పై ప్రేక్షకులలో ఆసక్తిని మరింత పెంచేలా, ఈ చిత్రంలో జయరామ్, సుమన్ శెట్టి, సుధ వంటి ప్రముఖ నటీనటులు ముఖ్య పాత్రలు పోషిస్తున్నారు. మొదటి భాగం విజయంలో యువన్ శంకర్ రాజా సంగీతం కీలక పాత్ర పోషించిన విషయం తెలిసిందే. ఈ సీక్వెల్తో కూడా ఆయన మరోసారి తన సంగీతంతో మ్యాజిక్ చేయబోతున్నారు. ప్రముఖ ఛాయగ్రాహకుడు రామ్జీ తనదైన కెమెరా పనితనంతో సీక్వెల్ కి మరింత అందం తీసుకురానున్నారు. ఈ చిత్రం గురించి నిర్మాత ఎ.ఎం. రత్నం మాట్లాడుతూ ‘‘7G బృందావన కాలనీ చిత్రం ప్రేక్షకుల హృదయాలను హత్తుకున్న చిత్రం. సినీ చరిత్రలో ఈ చిత్రం ఒక ప్రత్యేక స్థానాన్ని కలిగి ఉంది. ఇప్పుడు ఈ చిత్ర సీక్వెల్తో నేటి ప్రేక్షకుల అభిరుచికి తగ్గట్టుగా సరికొత్త మరియు ఆకట్టుకునే కథనాన్ని అందించి, అప్పటి మ్యాజిక్ను పునఃసృష్టి చేయాలని మేము లక్ష్యంగా పెట్టుకున్నాము’’ అని అన్నారు.