వివాదాస్పద పాటలో మార్పు

తమిళ నటుడు సంతానం హీరోగా నటించిన ‘డెవిల్స్‌ డబుల్‌ నెక్స్ట్‌ లెవల్‌’ చిత్రంలోని ‘శ్రీనివాసా గోవిందా’ పాటలో మార్పులు చేసి, మళ్లీ సెన్సార్‌ బోర్డు నుంచి సర్టిఫికేట్‌ తీసుకుంటామని చిత్ర నిర్మాత హైకోర్టుకు తెలిపారు. ఈ చిత్రం శుక్రవారం విడుదలకానుంది. అయితే, ఈ చిత్రంలో ‘శ్రీనివాసా గోవిందా’ అనే పాట చరణాలు శ్రీవేంకటేశ్వర స్వామిని కించపరిచేలా ఉన్నాయంటూ విమర్శలు వచ్చాయి. ఈ పాటను తక్షణం తొలగించాలని, లేనిపక్షంలో రూ.100 కోట్ల పరువునష్టం చెల్లించాలంటూ హీరో సంతానంకు టీటీడీ పాలక మండలి సభ్యుడు భానుప్రకాశ్‌ లీగల్‌ నోటీసులు పంపించారు. అదేవిధంగా చెన్నైకి చెందిన బాలాజీ అనే వ్యక్తి ఈ చిత్ర సెన్సార్‌ సర్టిఫికేట్‌ను రద్దు చేయాలని, విడుదలను అడ్డుకోవాలని కోరుతూ మద్రాస్‌ హైకోర్టును ఆశ్రయించారు. గురువారం ఇరుపక్షాల వాదనలు విన్న ధర్మాసనం తదుపరి విచారణను శుక్రవారానికి వాయిదా వేసింది.