విశ్వంభర కోసం రెడీ అవుతున్న బాస్, వీడియో చూసారా

కొన్ని రోజుల క్రితం 'పద్మవిభూషణ్' అందుకున్న చిరంజీవి తన తదుపరి సినిమా దర్శకుడు మల్లిడి వసిష్ఠతో చేస్తున్న సంగతి అందరికీ తెలిసిన విషయమే. ఈ సినిమాకి 'విశ్వంభర' అనే పేరు కూడా ఖరారు చేసి, సంక్రాంతికి వూరికే అలా సినిమా టైటిల్ ఒక చిన్న ప్రచార వీడియోని విడుదల చేస్తే అది ఎంత పెద్ద వైరల్ అయిందో కూడా తెలిసిన విషయమే. చిరంజీవి ఈరోజు నుండి ఈ సినిమా సెట్స్ లోకి అడుగుపెడుతున్నారు. ఇది ఒక ఫాంటసీ నేపథ్యంలో సాగే సినిమా. ఈ సినిమాకి చాలా ప్రీ ప్రొడక్షన్ పని చేశారు.

69 ఏళ్ళ చిరంజీవి ఈ సినిమా కోసం కొన్ని రోజుల నుండి జిమ్ కి వెళ్లి కసరత్తులు చేస్తున్నారు. అసలు ఈ వయస్సులో చిరంజీవి ఉత్సాహం, అతను కసరత్తులు చేస్తున్న తీరు చూస్తుంటే ఒక యువ నటుడులా కనపడుతున్నారు. అతను అంత చురుకుగా చేస్తున్న ఆ కసరత్తులు వీడియో ఇప్పుడు విడుదల చేశారు, ఇది సామజిక మాధ్యమాల్లో చక్కర్లు కొడుతోంది.

ఇప్పుడొస్తున్న యువనటులకు చిరంజీవి ఈ వయసులో కూడా చేస్తున్న ఇటువంటి కసరత్తులు స్ఫూర్తినిస్తాయి అనటంలో ఎటువంటి సందేహం లేదు. సినిమా చేస్తున్నప్పుడు ఎంత కష్టపడాలో చిరంజీవిని ఈ వీడియోలో చూస్తే అర్థం అవుతుంది. అతనే ఎన్నోమార్లు అన్నారు, కష్టపడకకుండా చెయ్యకపోతే ఎటువంటి ఫలితం రాదు అని. మొదటి షెడ్యూల్ లో భాగంగా సుమారు రెండు వారాలపాటు ఈ 'విశ్వంభర' సినిమా షూటింగ్ లో చిరంజీవి పాల్గొంటారని తెలిసింది.