Geetha LLB: బుల్లితెర ప్రేక్షకుల ముందుకు ఓ డైనమిక్ అమ్మాయి కథ
ABN , Publish Date - Nov 29 , 2024 | 03:17 PM
ఒక సగటు అమ్మాయి జీవితంలో.. ఎవరు తనకు ప్రేరణ అనుకుందో అతనితోనే గొడవకు దిగాల్సి రావడం ఆమెకు ఎదురైన అతిపెద్ద సవాల్. ఆ సవాల్‌ని గీత అనే అమ్మాయి ఎలా స్వీకరించిందో తెలియాలంటే డిసెంబర్ 2 వరకు వెయిట్ చేయాల్సిందే. పూర్తి వివరాల్లోకి వెళితే..
మహిళలు ఏ రంగంలో అయినా తమ ప్రతిభతో రాణిస్తున్నారు. వారి విజయానికి ఆకాశమే హద్దు అనేలా ఎందరో తమ సత్తా నిరూపించుకుని చరిత్ర సృష్టించారు. ఈ పరంపరలో ఎల్‌ఎల్‌బి చదువుకుని, లాయర్‌గా తన వాదన వినిపించడానికి వస్తున్న గీత కథ ఇప్పుడు ప్రతి తెలుగు లోగిలికి చేరబోతోంది. ధైర్యసాహసాలతో, ఆత్మవిశ్వాసంతో లక్ష్య సాధన కోసం నమ్ముకున్న సిద్ధాంతాన్ని ఆచరించే ‘స్టార్ మా’ సీరియల్ కథల పరంపరలో రానున్న ‘గీత ఎల్‌ఎల్‌బి’ సీరియల్ పూర్తిగా ఒక విలక్షణమైన కథ. బంధాలకు విలువ ఇచ్చి, వాటిని నిలబెట్టాలనుకునే అమ్మాయి జీవితంలో ఎదురయ్యే ఒడుదుడుకులు, తడబడినా నిలబడడానికి ఆ అమ్మాయి చేసే ప్రయత్నాలు, ఈ ప్రయత్నంలో ఎదురయ్యే రకరకాల మనుషులను దాటుకుంటూ నడిచిన గీత జీవితమిది.
Also Read- Prashanth Varma: సింహమంటి చిన్నోడే వేటకొచ్చాడే.. గెట్ రెడీ ఫర్ 'మోక్ష‌జ్ఞ'
ఒక సగటు అమ్మాయి జీవితంలో.. ఎవరు తనకు ప్రేరణ అనుకుందో అతనితోనే గొడవకు దిగాల్సి రావడం ఆమెకు ఎదురైన అతిపెద్ద సవాల్. న్యాయాన్ని గెలిపించడానికి ఆ అమ్మాయి పడే తపన, కొన్నిసార్లు ఆమె అనుభవించే సంఘర్షణ.. ఈ సీరియల్‌ని విభిన్నమైన సీరియల్‌గా నిలబెట్టబోతోందని అంటున్నారు స్టార్ మా యూనిట్. మనకి బాగా పరిచయమైనట్టుగా, మనం రోజూ చూసే ఒక సగటు అమ్మాయిగా కనిపించినా ఆమె లోతైన పరిశీలన, అవగాహన ఆమె పాత్ర చిత్రణలోని బలాలు. స్టార్ మా అందించబోతున్న ఈ సరికొత్త సీరియల్ ఇంటిల్లిపాదికీ వినోద పరంగా, ఎమోషనల్ గానూ దగ్గర అవుతుందని సీరియల్ మేకర్స్ ఆశాభావం వ్యక్తం చేస్తున్నారు. ఆమెలోని డైనమిజం ఆశ్చర్యపరుస్తుంది. ఆమె షార్ప్ రియాక్షన్స్ చూస్తే ముచ్చటేస్తుంది. గీత మాటలు వింటే అలా వింటూ ఉండాలనిపిస్తుంది. కోర్టులో ఆమె పట్టుకున్న పాయింట్‌ని తలుచుకుంటే ‘భలే తెలివైన అమ్మాయి’ అని అనిపిస్తుంది. ప్రతి ఇంట్లోనూ ఇలాంటి అమ్మాయి ఉండాలి అనుకునేలా అందరి మనసులు ఆకట్టుకుంటుందీ గీత అని చెబుతున్నారు.
గీతకు ఎన్ని సమస్యలు వచ్చినా బంధాలు నిలబెట్టడానికే ఎప్పుడూ ఆమె ప్రయత్నం చేస్తుంది. ఆమెకి కేవలం ‘లా’ మాత్రమే కాదు సినిమాలన్నా చాలా ఇష్టం. ఎంత మక్కువ అంటే - ఆమె సంభాషణల్లో సినిమా మాటలు వస్తుంటాయి. సినిమాల్లో కొన్ని సంఘటనలను ఆమె గుర్తుపెట్టుకుని మరీ తన వృత్తిలో ఉపయోగిస్తుంది. ఇలాంటివి ఎన్నో గీత పాత్రని మరపురానిదిగా మార్చనున్నాయని మేకర్స్ సీరియల్‌పై హైప్‌ని పెంచుతున్నారు. ఇంతకీ ఈ సీరియల్ ఎప్పుడు టెలికాస్ట్ అవుతుందని అనుకుంటున్నారా.. డిసెంబర్ 2 నుంచి రాత్రి 9.30 గంటలకు ‘స్టార్ మా’లో ఈ సీరియల్ ప్రారంభం కాబోతోంది. సోమవారం నుంచి శుక్రవారం వరకు ఈ సీరియల్ ప్రతివారం అలరించబోతోంది.