ప్రాణం గడ్డిపోస అనుకో..

బాబీ సింహా, వేదిక, అనన్య త్రిపాఠి, ప్రేమ, ఇంద్రజ, మకరంద్‌ దేశ్‌పాండే ముఖ్య పాత్రలు పోషించిన ‘రజాకార్‌’ చిత్రం త్వరలో విడుదల కానుంది. యాటా సత్యనారాయణ దర్శకత్వంలో గూడురు నారాయణరెడ్డి ఈ చిత్రాన్ని నిర్మించారు. ఈ సినిమా నుంచి ‘ప్రాణం గడ్డిపోస అనుకో..’ అనే పాటను విడుదల చేశారు. సుద్దాల అశోక్‌తేజ రాసిన ఈ పాటను శంకర్‌ మహదేవన్‌ పాడారు. బీమ్స్‌ సిసిరోలియో సంగీత దర్శకుడు. ఈ సందర్భంగా దర్శకుడు మాట్లాడుతూ ‘మా సినిమాలోని ఎమోషన్‌ను అర్థం చేసుకుని సుద్దాల అద్భుతంగా పాట రాశారు. మన పూర్వీకులను గుర్తు చేసుకుంటూ నివాళులు అర్పిస్తూ తీస్తున్న సినిమా’ అని చెప్పారు. ‘రజాకార్లను ఉద్దేశించి మాత్రమే ఈ సినిమా తీశాం. త్వరలోనే విడుదల తేదీని ప్రకటిస్తాం’ అని చెప్పారు నిర్మాత.