Nandamuri Balakrishna: షూటింగ్ కి బ్రేక్ ఇస్తున్న బాలకృష్ణ, ప్రచారానికి శ్రీకారం

నందమూరి బాలకృష్ణ ప్రస్తుతం బాబీ కొల్లి దర్శకత్వంలో సినిమా చేస్తున్న సంగతి తెలిసిన విషయమే. ఈ సినిమా చిత్రీకరణ ప్రస్తుతం రామోజీ ఫిలిం సిటీలో జరుగుతోంది అని వార్త. దర్శకుడు బాలకృష్ణ, ఇంకా కొంతమంది నటీనటులపై ఒక పోరాట సన్నివేశాన్ని చిత్రీకరిస్తున్నట్టుగా భోగట్టా. ఈ పోరాట సన్నివేశం రేపు శనివారంతో అయిపోనుందని తెలుస్తోంది. దీని తరువాత బాలకృష్ణ ఈ సినిమా షూటింగ్ నుండి ఎన్నికలు అయ్యే సమయం వరకు విరామం తీసుకుంటారని తెలుస్తోంది.

బాలకృష్ణ ఆంధ్రప్రదేశ్ లో శ్రీ సత్యసాయి జిల్లాకు చెందిన హిందూపురం అసెంబ్లీ నియోజకవర్గం నుండి ఈసారి కూడా పోటీ చేస్తున్న విషయం తెలిసిందే. ఈ నేపథ్యంలో సినిమా చిత్రీకరణ నుండి విరామం తీసుకొని ప్రచారానికి శ్రీకారం చుట్టనున్నారని వార్తలు వస్తున్నాయి. అందుకనే రేపటి వరకు ఈ సినిమా చిత్రీకరణలో బాలకృష్ణ పాల్గొని ఆదివారం వీలైతే ఒకరోజు విశ్రాంతి తీసుకొని, సోమవారం నుండి హిందూపూర్ వెళ్లనున్నారని తెలుస్తోంది.

అయితే ఇదే సినిమాలో మలయాళం నటుడు దుల్కర్ సల్మాన్ నటించ నున్నారని కూడా వార్తలు వచ్చాయి. కానీ తాజా సమాచారం ప్రకారం దుల్కర్ ఈ సినిమాలోకి ఇంకా ఎంటర్ అవలేదని, ఎప్పుడు డేట్స్ ఇస్తారో కూడా తెలియదని, బాలకృష్ణ ఈ సినిమా బ్రేక్ తీసుకున్న సమయంలో దుల్కర్ కనక అంగీకరిస్తే అతనిపై సన్నివేశాలు చిత్రీకరించాల్సి ఉందని తెలుస్తోంది. అయితే దుల్కర్ ఈ సినిమాలో నటిస్తున్నారో లేదో కూడా ఇంతవరకు క్లారిటీ లేదని కూడా తెలుస్తోంది. ఈ సినిమాలో ఊర్వశి రౌటేలా పోలీసాఫీసర్ పాత్రలో నటిస్తోందని భోగట్టా. శ్రద్ధ శ్రీనాథ్ బాలకృష్ణ పక్కన నటిస్తోందని ఇంకో వార్త.