28న చిరంజీవికి ఏఎన్‌ఆర్‌ అవార్డు ప్రదానం

అక్కినేని నాగేశ్వరరావు శత జయంతిని పురస్కరించుకుని ఈనెల 28న ప్రతిష్ఠాత్మక ‘ఏఎన్‌ఆర్‌ అవార్డు’ను బాలీవుడ్‌ నటుడు అమితాబ్‌ బచ్చన్‌ చేతుల మీదుగా మెగాస్టార్‌ చిరంజీవికి ప్రదానం చేయనున్నారు. ఈ కార్యక్రమానికి సినీ పరిశ్రమకు చెందిన ప్రముఖులు హాజరవుతున్నట్లు అక్కినేని కుటుంబం తెలిపింది. ఈ మేరకు నాగార్జున చిరంజీవిని స్వయంగా కలసి ఆహ్వానించారు. ‘మా నాన్న ఏఎన్‌ఆర్‌ శత జయంతి వేడుకలు జరుగుతున్న ఈ సంవత్సరం చాలా ప్రత్యేకమైనది. ఈ మైలురాయికి గుర్తుగా ఏఎన్‌ఆర్‌ అవార్డ్స్‌ 2024 ప్రదానోత్సవ కార్యక్రమంలో పాల్గొనడానికి అమితాబ్‌ బచ్చన్‌ అంగీకరించడం ఆనందంగా ఉంది. ఈ అవార్డు ఫంక్షన్‌ను మరపురానిదిగా చేద్దాం!’ అని నాగార్జున తన ఎక్స్‌ అకౌంట్‌లో పోస్టు చేశారు.