Allu Aravind: అప్పుడు లావణ్య త్రిపాఠికి చెప్పిందే ఇప్పుడు మృణాల్ ఠాకూర్ కి కూడా...
ABN , First Publish Date - 2023-10-30T18:32:57+05:30 IST
అల్లు అరవింద్ ఏమని దీవిస్తే అది అయిపోతోంది. అప్పుడెప్పుడో లావణ్య త్రిపాఠిని తెలుగు అబ్బాయిని పెళ్లిచేసుకొని తెలుగింటి కోడలుగా ఇక్కడకి వచ్చేయి అని దీవించారు, లావణ్య అదే చేసింది, ఆ దీవెన కరెక్టు అయింది. ఇప్పుడు మృణాల్ ఠాకూర్ కి కూడా...
ప్రముఖ నిర్మాత అల్లు అరవింద్ (AlluAravind) దీవెనలకి ఒక మహత్యం ఉందేమో, అతను ఏమని దీవిస్తే అది అయిపొయింది. ఇంతకు ముందు ఒక సభలో నటి లావణ్య త్రిపాఠి (LavanyaTripathi) ని ఉద్దేశించి మాట్లాడుతూ, నువ్వు చక్కగా తెలుగు మాట్లాడుతున్నావు, తెలుగు అబ్బాయిని పెళ్లి చేసుకొని ఇక్కడే హైదరాబాదులో (Hyderabad) ఉండిపో అని ఆమెని దీవించారు. అంతే లావణ్య త్రిపాఠి, అల్లు అరవింద్ మేనల్లుడు అయిన వరుణ్ తేజ్ (VarunTej) ని ప్రేమించి, రేపు నవంబర్ 1 వ తేదీన ఇటలీలో వివాహం చేసుకుంటోంది.
అదే అల్లు అరవింద్ ఇప్పుడు ఇంకో నటిని కూడా అలానే దీవించారు. సైమా 2023 #SIIMA2023 అవార్డు ఫంక్షన్ లో లావణ్య త్రిపాఠి ని ఎలా అయితే దీవించారో, అలానే మృణాల్ ఠాకూర్ (MrunalThakur) ని కూడా దీవించారు. మృణాల్ 'సీతారామం' #SitaRamam సినిమా ద్వారా తెలుగు తెరకి పరిచయం అయింది, అందులో సీత పాత్రలో అందరినీ మెప్పించింది. సైమా 2023 లో సీత పాత్రకి గాను ఉత్తమనటిగా అవార్డు అందుకుంది. ఈ అవార్డు అల్లు అరవింద్ చేతుల మీదుగా అందుకుంది మృణాల్ ఠాకూర్.
ఈ సందర్భంగా అల్లు అరవింద్ మాట్లాడుతూ, "ఇంతకు ముందు ఒక హీరోయిన్ ని తెలుగు అబ్బాయిని పెళ్లిచేసుకొని తెలుగింటి కోడలిగా రమ్మని బ్లెస్సింగ్స్ ఇచ్చాను. ఆమె ఒక తెలుగు హీరోని ప్రేమించి, ఇప్పుడు పెళ్లి కూడా చేసుకోబోతోంది. ఇప్పుడు నీకు కూడా అదే బ్లెస్సింగ్ ఇస్తున్నా, నువ్వు కూడా ఇక్కడికే వచ్చేయాలి," అని చెప్పారు. ఈ వీడియో ఇప్ప్పుడు నెట్టింట్లో బాగా వైరల్ అవుతోంది. మృణాల్ ఠాకూర్ మాట్లాడుతూ ఉత్తమనటిగా ఇది తన మొదటి అవార్డు అని తెలుగు అమ్మాయిలా ఆదరించినందుకు అందరికీ కృతజ్ఞతలు అని చెప్పింది, ముఖ్యంగా 'సీతారామం' చిత్ర యూనిట్ కి. అలాగే బాలీవుడ్ లో అందరూ నేను హైదరాబాదు షిఫ్ట్ అయ్యాను అని అనుకుంటున్నారు, తనకి కూడా హైదరాబాదు వదిలి వెళ్లాలని లేదు అని కూడా చెప్పింది.