The Vaccine War: షూటింగ్‌లో ప్రమాదం.. నటికి తీవ్ర గాయాలు

‘ది కశ్మీర్ ఫైల్స్’ (The Kashmir Files) చిత్రంతో సంచలన విజయం అందుకున్న దర్శకుడు వివేక్ రంజన్ అగ్నిహోత్రి (Vivek Ranjan Agnihotri).. ప్రస్తుతం తెరకెక్కిస్తోన్న పాన్ ఇండియా చిత్రం ‘ది వాక్సిన్ వార్’ (The Vaccine War). ఐ యామ్ బుద్ధ ప్రొడక్షన్స్ (I Am Buddha Productions) పతాకంపై పల్లవి జోషి (Pallavi Joshi) ఈ చిత్రాన్ని నిర్మించడంతో పాటు కీలక పాత్రలో నటిస్తున్నారు. ప్రస్తుతం ఈ సినిమాకు సంబంధించి చివరి షెడ్యూల్ షూటింగ్‌లో హైదరాబాద్‌లో జరుగుతోంది. తాజాగా ఈ సినిమా సెట్స్‌లో ఓ సన్నివేశం చిత్రీకరిస్తుండగా నటి పల్లవి జోషి గాయపడ్డారు. ఓ వాహనం అదుపు తప్పి ఢీ కొట్టిందని స్థానికులు తెలిపారు. ఈ ప్రమాదంలో ఆమెకు స్వల్ప గాయాలయ్యాయి. దీంతో దగ్గరలోని హాస్పిటల్‌లో ఆమెకు చికిత్స అందించినట్లుగా తెలుస్తుంది.

ఈ ఘటనపై చిత్రయూనిట్ స్పందిస్తూ.. ప్రస్తుతం ఆమె ఆరోగ్యం బాగానే వుందని, అభిమానులెవరు ఆందోళన చెందాల్సిన అవసరం లేదని తెలిపింది. అనుపమ్ ఖేర్, నానా పటేకర్, దివ్య సేథ్ తదితరులు ప్రధాన పాత్రలలో నటిస్తున్న ఈ చిత్రాన్ని.. ‘ది కశ్మీర్ ఫైల్స్’ కోసం వివేక్ అగ్నిహోత్రితో కలిసి పనిచేసిన అభిషేక్ అగర్వాల్ (Abhishek Agarwal) తన అభిషేక్ అగర్వాల్ ఆర్ట్స్ బ్యానర్ ద్వారా దేశవ్యాప్తంగా విడుదల చేయనున్నారు.

2023 స్వాతంత్ర్య దినోత్సవం సందర్భంగా ఆగస్టు 15న ఈ చిత్రాన్ని ప్రేక్షకుల ముందుకు తీసుకురానున్నారు. ఈ చిత్రం హిందీ, ఇంగ్లీష్, గుజరాతీ, పంజాబీ, భోజ్‌పురి, బెంగాలీ, మరాఠీ, తెలుగు, తమిళం, కన్నడ, ఉర్దూ, అస్సామీలతో సహా 10 భాషలకు పైగా విడుదల కానుంది.