Mahesh Babu: 'గుంటూరు కారం' నుండి 'మసాలా బిర్యానీ' పాట లీక్ అయింది, ఎలా ఉందంటే...
ABN , First Publish Date - 2023-11-04T12:12:56+05:30 IST
మహేష్ బాబు, త్రివిక్రమ్ శ్రీనివాస్ కాంబినేషన్ లో వస్తున్న 'గుంటూరు కారం' నుండి మొదటి పాట కోసం మహేష్ అభిమానులు ఎదురుచూస్తున్న సమయంలో ఆ సినిమాలోంచి ఒక పాట లీక్ అవటం, అది వైరల్ అవటం జరుగుతోంది.
మహేష్ బాబు (MaheshBabu), త్రివిక్రమ్ శ్రీనివాస్ (TrivikramSrinivas) కాంబినేషన్ లో వస్తున్న సినిమా 'గుంటూరు కారం' #GunturKaaram నుండి ఒక పాట లీక్ అయింది. సాంఘీక మాధ్యమంలో ఈ పాటలో ఒక చిన్న బిట్ వైరల్ అవుతోంది. ఈ సినిమాకి థమన్ (SSThaman) సంగీతం సమకూరుస్తున్నాడు. ఎందుకో ఈ సినిమా మొదలైన దగ్గరనుంచీ వార్తల్లో ఉంటూ వస్తోంది. షూటింగ్ చాలాసార్లు పోస్టుపోన్ అవటం, మధ్యలో కథానాయకురాలి మారటం, తరువాత ఛాయాగ్రహకుడు మారిపోవటం, ఇలా ఈ సినిమా వార్తల్లో ఉంటూ వస్తోంది.
మహేష్ బాబు అభిమానులు ఈ సినిమా నుండి ఎప్పుడు మొదటి పాట విడుదలవుతుందా అని ఎదురుచూస్తూ వున్న సమయంలో ఇందులోంచి ఒక పాట లీక్ అవటం, అందులో ఒక బిట్ వైరల్ అవటంతో మళ్ళీ ఈ సినిమా వార్తల్లో నిలిచింది. ఈ సినిమాకి సూర్యదేవర రాధాకృష్ణ (చినబాబు) నిర్మాత, శ్రీలీల (Sreeleela), మీనాక్షి చౌదరి (MeenakshiChaudhary) కథానాయికలు కాగా, ఇందులో రమ్యకృష్ణ (RamyaKrishna), ప్రకాష్ రాజ్ (PrakashRaj), రావు రమేష్ (RaoRamesh), మురళి శర్మ (MuraliSharma) ఇంకా చాలామంది నటులు వున్నారు.
దర్శకుడు త్రివిక్రమ్ పుట్టినరోజు ఈనెల 7వ తేదీన ఈ సినిమా నుండి ఏదైనా ఒకటి విడుదల చెయ్యాలని చిత్ర నిర్వాహకులు అనుకున్నారు, అందులో పాట అయితే బాగుంటుంది అని కూడా అనుకున్నారు. #GunturKaaramFirstSingle ఇంతలోపే ఇలా లీక్ అవటంతో ఈ పాటనే 7వ తేదీన విడుదల చేయొచ్చు అని కూడా ఒక వార్త నడుస్తోంది.
ప్రముఖ సంగీత దర్శకుడు, గాయకుడు అనిరుధ్ (AnirudhRavichander) ఈ 'గుంటూరు కారం' లో ఓ పాట పాడాడు. ఇప్పుడు లీక్ అయిన పాట 'మసాలా బిర్యానీ' అనేది అతను పాడిందే. అయితే ఇలా లీక్ అయిన పాట 'మసాలా బిర్యానీ' బావుందని మహేష్ బాబు అభిమానులు అంటున్నారు.